မွန်ပြည်နယ်၊ သထုံမြို့နယ်၊ ထောင်မှူးကျေးရွာ၊ သထုံ-ဘားအံ ကားလမ်းမကြီးပေါ်မှာ စက်တင်ဘာ ၂၃ ရက် ညနေက လက်ကိုင်ဖုန်းအတွင်း တော်လှန်ရေးတပ်ဖွဲ့ပုံတွေ တွေ့ရှိမှုကြောင့် သထုံဒေသခံ လူငယ် ၂ ယောက်ကို စစ်ကောင်စီအဖွဲ့တွေက ဖမ်းဆီးခဲ့ကြောင်း ဒေသခံတွေထံက သိရပါတယ်။

စစ်ကောင်စီ ပူးပေါင်းတပ်ဖွဲ့ဝင်တွေဟာ လုံခြုံရေးအကြောင်းပြချက်နဲ့ စက်တင်ဘာ ၂၃ ရက် ညနေ ၅ နာရီက ထောင်မှူးကျေးရွာ ကားလမ်းပေါ် ပိတ်ဆို့ရှာဖွေ စစ်ဆေးခဲ့ရာမှာ အဲဒီလူငယ် ၂ ယောက်ရဲ့ လက်ကိုင်ဖုန်းအတွင်း သေနတ်ကိုင်ဆောင်ပြီး ပြောက်ကျားဝတ်စုံတွေနဲ့ ရိုက်ထားတဲ့ ဓာတ်ပုံတချို့ တွေ့ရှိခဲ့တာကြောင့် ဖမ်းဆီးခံခဲ့ရတာလို့ လုံခြုံရေးအဖွဲ့နဲ့ နီးစပ်သူတယောက်က ပြောပါတယ်။

“နှစ်ယောက်လုံးက အနန်းပင်ကျေးရွာအုပ်စု၊ အင်းကွဲကျေးရွာက မောင်ဝင်းထိုက်စိုးနဲ့ စိုးမိုးထွန်းပါ။ ပူးပေါင်းအဖွဲ့တွေက ထောင်မှူးကားလမ်းပေါ် ယာဥ်စစ်လုပ်နေတဲ့အချိန် သထုံမြို့ဘက်မှ ကြာပန်းကျေးရွာဘက်ကို မောင်းနှင်လာတာတွေ့ပြီး မသင်္ကာလို့ စစ်ဆေးကြည့်တာ PDF လူငယ်တွေ ဖြစ်နေလို့ ဖမ်းဆီးထိန်းသိမ်းထားတာပါ။”

ဖမ်းဆီးခံထားရတဲ့ လူငယ် ၂ ယောက်ကို လက်ရှိအချိန်ထိ သုဓမ္မဝတီနယ်မြေရဲစခန်းမှာ စစ်ဆေး မေးမြန်းနေကြောင်း သိရပါတယ်။

အလားတူ စက်တင်ဘာ ၁၈ ရက် ညနေပိုင်းကလည်း သထုံမြို့နယ်၊ ဒုံဝန်းကျေးရွာအုပ်စု၊ ကမာစိုင်ကျေးရွာက မျိုးမင်းဆန်း (ခ) ခေါင်းချွန်နဲ့ ကံထူးအောင် (ခ) မောင်လူဆိုးတို့ ၂ ယောက်ကို လမ်း၊ တံတားမိုင်းခွဲမှုတွေမှာ ပါဝင်ခဲ့တဲ့ PDF တပ်ဖွဲ့ဝင်တွေဆိုတဲ့ စွပ်စွဲချက်နဲ့ သိမ်ဆိပ်ရဲစခန်းမှ (ပ) ၅၀/၂၀၂၄၊ အကြမ်းဖက်မှုတိုက်ဖျက်ရေး ဥပဒေပုဒ်မ-၅၀(က)/၅၂(က) နဲ့ အမှုဖွင့် အရေးယူထားကြောင်း ရဲမှတ်တမ်းတွေအရ သိရပါတယ်။

စစ်ကောင်စီ အာဏာသိမ်းကာလအတွင်း အကြောင်းအမျိုးမျိုးပြ ဖမ်းဆီးမှုကြောင့် နိုင်ငံတဝန်းမှာ ဖမ်းဆီးခံရသူ ၂၇,၀၀၀ ကျော်ရှိနေပြီး အဲဒီထဲမှာ ၂၀,၀၀၀ ကျော် ဆက်လက်ထိန်းသိမ်းခံ ထားရကြောင်း နိုင်ငံရေးအကျဉ်းသားများကူညီစောင့်ရှောက်ရေးအသင်း (AAPP) က ထုတ်ပြန် ထားပါတယ်။