အမေရိကန်သမ္မတဟောင်း ဒေါ်နယ်ထရမ့်ပ်ကို လုပ်ကြံဖို့ ကြိုးစားသူရဲ့ ရှုပ်ထွေးတဲ့ နောက်ကြောင်းနဲ့  ပထမအကြိမ် လုပ်ကြံမှုအပြီး နှစ်လကျော်အကြာမှာ ထပ်ဖြစ်တဲ့ အခုဖြစ်စဉ်ကြောင့် မေးခွန်းထုတ်စရာတွေ အများကြီး ရှိလာခဲ့ပါတယ်။

ကျူးလွန်သူဟာ တကိုယ်တော်လား၊ နောက်ကွယ်မှာ ဘယ်သူရှိနေသလဲဆိုတဲ့ မေးခွန်းမျိုးပါ။

ပြိုင်ဘက်က လုပ်ကြံသလား၊ ကိုယ့်ဘက်က ဇာတ်လမ်းဆင်သလား၊ အမေရိကန် ဒီမိုကရေစီ အပေါ် အယုံအကြည်ပျက်အောင် ကြားလူက ခလောက်ဆန်သလား စသဖြင့် အယူအဆတွေလည်း အမျိုးမျိုးရှိနေပါတယ်။

ဒါပေမဲ့ Conspiracy Theory လို့ခေါ်တဲ့ နောက်ကွယ်မှာ လျှို့ဝှက် ပူးပေါင်းကြံစည်မှုတွေ ရှိတယ်ဆိုတဲ့ အယူအဆမျိုးဟာ ခိုင်ခိုင်မာမာ သက်သေပြနိုင်တာတော့ မရှိသလောက် နည်းပါးပါတယ်။ အဲဒီတော့ နောက်ဆုံးသိရသမျှ ခိုင်မာတဲ့ အချက်အလက်တွေနဲ့ ထရမ့်ပ် ကိုယ်တိုင် အပါအဝင် အဓိကတာဝန်ရှိသူတွေရဲ့ ပြောကြားချက်တွေကို အရင်ကြည့်ရအောင်ပါ။

စက်တင်ဘာလ ၁၅ ရက်နေ့မှာ ဖလော်ရီဒါပြည်နယ်၊ ဝက်စ်ပမ်ဘိချ်က  ထရမ့်ပ် အပြည်ပြည်ဆိုင်ရာ ဂေါက်ကလပ်မှာ ထရမ့်ပ်ကို လုပ်ကြံဖို့ ကြိုးပမ်းခဲ့တယ်လို့ သံသယရှိသူ အသက် ၅၈ နှစ်အရွယ် ရိုင်ယန်ဝက်စလေ ရောက်သ်ကို ဖမ်းဆီးပြီး FBI က စုံစမ်းစစ်ဆေးနေပါတယ်။

ပြီးခဲ့တဲ့ ဇူလိုင်လတုန်းက ပင်ဆယ်လ်ဗေးနီးယားပြည်နယ်မှာ မဲဆွယ်နေစဉ် ထရမ့်ပ်ကို ပစ်ခတ်လုပ်ကြံဖို့ ကြိုးစားမှု ဖြစ်ပွားခဲ့အပြီး ၆၄ ရက်အကြာမှာ အခုလို ဒုတိယအကြိမ်လုပ်ကြံဖို့ ကြိုးစားမှုနဲ့ ထပ်မံကြုံတွေ့ခဲ့ရတာ ဖြစ်ပါတယ်။

ဒေါ်နယ်ထရမ့်ပ်  ကိုယ်တိုင် လူမှုကွန်ရက် X မှာ ပြန်ပြောတဲ့အကြောင်းကို နားထောင်ကြည့်ရအောင်ပါ။

“ကျုပ်မိတ်ဆွေနဲ့ ဂေါ့ဖ်ရိုက်နေတာ၊ တနင်္ဂနွေနေ့ မနက်ခင်းလေ၊ အေးအေးချမ်းချမ်းနဲ့ ရာသီဥတုကလည်း အရမ်းသာယာတာ၊ အကုန်လှပနေတာပေါ့။ တကယ်ကောင်းတဲ့နေရာ ရောက်နေတာ။ အဲဒီအချိန် သေနတ်ပစ်သံတွေ ကြားလိုက်ရတယ်။ ကျည်ဆန်သံလိုမျိုး လေးငါးချက် ရှိမယ်ထင်တယ်။ ဒါပေမဲ့ ကျုပ်က ဘာသိမှာလဲ။ လျှို့ဝှက်ထောက်လှမ်းရေးက ကျည်ဆန်သံမှန်း သိတယ်လေ၊ ကျုပ်ကို ဆွဲပြီး၊ ကျုပ်ထင်တာ နောက်တယောက်လည်း ပါမယ်၊ စတိဗ်လေ၊ ကျုပ်မိတ်ဆွေတွေထဲက တယောက်ပေါ့၊ စတိဗ်ဝစ်ဗ်ကော့ဖ်က နယူးယောက်နဲ့ ဖလော်ရီဒါက စီးပွားလုပ်ငန်းရှင်ကြီးလေ၊​ တကယ်ကောင်းတဲ့ပုဂ္ဂိုလ်ပါ၊ ကျုပ်တို့က အုပ်စုလိုက် ဆိုတော့၊ အစောင့်တွေပါ ရောက်လာပြီး မြန်မြန်ဆန်ဆန်ပဲ ရွှေ့ကြရတာပေါ့။ ကျုပ်နဲ့ အေးဂျင့်တယောက်ပါတယ်၊ အေးဂျင့်ကလည်း သူ့အလုပ်သူ ကောင်းကောင်းလုပ်နိုင်ပါတယ်။  ကျုပ်တို့ ကွင်းကနေ လမ်းကြောင်းလွဲသွားတာတော့ ပြောစရာကို မလိုဘူးပေါ့ဗျာ။ ကျုပ်က နောက်ဆုံးကျင်း စိမ်ချင်သေးတာ။ ဒါပေမဲ့ ဒီကထွက်မယ်ဆိုပြီးတော့၊ သေနတ်သံနဲ့ ပတ်သက်ပြီး စိတ်ဝင်စားစရာကောင်းတာက၊ လျှို့ဝှက်ထောက်လှမ်းရေးတယောက်က AK-47 ရဲ့ သေနတ်ပြောင်း ထွက်နေတာကို စမြင်တာ၊ အင်မတန်အားကောင်းတဲ့ ရိုင်ဖယ်သေနတ်ပေါ့၊ အဲဒါနဲ့ ပြောင်းရှိတဲ့နေရာ၊ ခြုံပုတ်တွေထဲကို စပစ်ခဲ့တာ”

ရောက်သ်ကို အေးဂျင့်က ပစ်ခတ်ခဲ့ချိန်ဟာ မွန်းလွဲ ၁ နာရီ ၃၁ မိနစ် ဖြစ်ပါတယ်။ ခြုံပုတ်ထဲက သေနတ်ပြောင်း ထွက်နေတာမြင်လို့ လှမ်းပစ်ခဲ့တာဖြစ်ပြီး အဲဒီအချိန်မှာ သေနတ်သမားဟာ ထရမ့်ပ်နဲ့ ကိုက် ၄၀၀ အကွာလောက်ထိ ရောက်နေပြီဖြစ်ပါတယ်။ ဒါပေမဲ့ ထရမ့်ပ်ကို ပစ်ခတ်ဖို့ ချိန်ရွယ်နိုင်တဲ့ အခြေအနေအထိ မရောက်ခဲ့သလို အေးဂျင့်က ခြုံပုတ်ထဲ မှန်းပစ်ချိန်မှာလည်း ရောက်သ်ဟာ လက်နက်ပစ္စည်းတွေချပြီး ထွက်ပြေးသွားခဲ့ပါတယ်။

“သေနတ်ပြောင်းကို မြင်တာ၊ တော်သေးတာပေါ့၊ ဟုတ်တယ်မလား၊ သေနတ်ပြောင်းလေးပဲ မြင်တာ၊​ အဲဒါပေါ် အခြေခံပြီး စပစ်တာ၊ ပြီး ပစ်မှတ်ဆီကို ပြေးသွားပြီး၊ လိုက်ပစ်တာပေါ့လေ၊ ဒါကတော့ ကျုပ်တို့ကြားရသမျှ သေနတ်သံပေါ့။ ဟိုဘက်ကတော့ တချက်မှ မပစ်လိုက်ရဘူး၊ လမ်းဟိုဘက်ခြမ်းကို ကူးပြီး ကားယူပြီး၊ ထရပ်လား ကားလားတော့ မသိဘူး၊ မောင်းပြေးတာ၊ အံ့ဩစရာက အဲဒီဧရိယာက အရပ်သားတယောက်က မြင်လိုက်တာ၊ သံသယဖြစ်စရာပဲ ဆိုပြီးတော့ အဲဒီကားနောက်ကို လိုက်ပြီးတော့ လိုင်စင်ပလိပ်ပြားပုံ ဓာတ်ပုံရိုက်ပြီး ရဲမှူးရုံးကို ပေးတာ၊ ရဲမှူး ဘရတ်ရှောကလည်း အင်မတန်တော်တဲ့ ရဲမှူးပါ၊ ဟိုအရင်ကတည်းက ကျုပ် သူ့ကိုသိတာ၊ အချိန်တိုအတွင်းမှာပဲ အမြန်လမ်းမှာ အဲဒီလူကို ခြေရာခံပြီး အမြန်လိုက်ဖမ်းတာပေါ့ဗျာ၊ သူတို့ အဲဒီလိုနဲ့ မိသွားတာပေါ့၊ သူတို့မိသွားတာပေါ့။”

နံပါတ်စဉ်ဖျက်ထားတဲ့ စကုပ်တပ်ထားတဲ့ SKS စတိုင် ရိုင်ဖယ်တလက်၊ ကျည်ကာနိုင်တဲ့ အပြားတွေပါတဲ့ ကျောပိုးအိတ်နှစ်လုံး၊ အစားအသောက်တွေပါတဲ့ ပလတ်စတစ်အိတ်၊ ဂိုးပရို ကင်မရာတွေကို ရောက်သ် ပုန်းအောင်းခဲ့တဲ့နားက သိမ်းဆည်းမိခဲ့ပါတယ်။ ရောက်သ်ဟာ အနက်ရောင် နစ်ဆန်း SUV ကားနဲ့ ထွက်ပြေးခဲ့တာဖြစ်ပြီး ပြည်နယ်ချင်းဆက်လမ်း အင်တာစတိတ်-၉၅ မှာ ရောက်သ်ကို ဖမ်းမိခဲ့ပါတယ်။ ဖမ်းမိချိန် ရောက်သ် လက်ထဲမှာ လက်နက်ရှိမနေပါဘူး။

ပမ်ဘိချ်က ထရမ့်ပ် အပြည်ပြည်ဆိုင်ရာဂေါက်ကွင်းဟာ လမ်းမကြီးတွေနဲ့ နီးကပ်တဲ့အတွက် လုံခြုံရေးယူရတာတော့ ခက်ခဲမှုရှိပါတယ်။ ဒါပေမဲ့ တကြိမ်ကြုံခဲ့ဖူးတဲ့ အနေအထားမှာ နောက်တခါ ထပ်ဖြစ်တယ် ဆိုတာချည်းကတော့ ဝေဖန်စရာ ကောင်းနေပါတယ်။ ထရမ့်ပ် ကိုယ်တိုင်က လျှို့ဝှက်ထောက်လှမ်းရေးရဲ့ လျင်လျင်မြန်မြန် ကာကွယ်နိုင်မှုကို ချီးကျူးခဲ့ပေမဲ့ ထရမ့်ပ် အနီးနားအထိ လွယ်လွယ်ကူကူ ​ရောက်လာနိုင်ခဲ့တာ၊ ချက်ချင်းမဖမ်းနိုင်ဘဲ ကားနဲ့ထွက်ပြေးသွားနိုင်ခဲ့သေးတာလိုမျိုး ကိစ္စတွေအတွက် ဝေဖန်မှုတွေ ရှိနေပါတယ်။ ပင်ဆယ်လ်ဗေးနီးယား လုပ်ကြံမှု အပြီးမှာ ထရမ့်ပ်ကို သူ့ပြိုင်ဘက် ကင်မလာဟဲရစ်နဲ့ လယ်ဗယ်တူ ဒုသမ္မတ လုံခြုံရေးအဆင့်အတန်း ပေးထားတယ်လို့ ဆိုပါတယ်။ ဒါပေမဲ့ သမ္မတအဆင့်တော့ မဟုတ်ပါဘူး။ ဒါကြောင့်လည်း ဂေါက်ကွင်းဧရိယာ အလုံးစုံကို လုံခြုံရေးပေးမထားနိုင်ခဲ့တာလို့ ဖြေရှင်းပါတယ်။ နောက်တချက်က ဂေါက်ကွင်းကိုလာဖို့ဟာ ထရမ့်ပ်ရဲ့ စီစဉ်ထားတဲ့ အချိန်ဇယားမှာ မပါဝင်ပါဘူး။ ဒီအချက်တွေကြောင့် ဂေါက်ကွင်းတကွင်းလုံး ကြိုတင်ရှာဖွေ လုံခြုံရေးမယူနိုင်ဘဲ ထရမ့်ပ် ဂေါ့ဖ်ရိုက်ရင်း ရောက်တဲ့ကျင်းနားပဲ ကြိုရှင်းပေးခဲ့တာ ဖြစ်ပါတယ်။ အကယ်၍များ သေနတ်ပြောင်းသာ ထွက်မနေခဲ့ရင် ဆိုတဲ့ မေးခွန်းက တော်တော်စိုးရိမ်စရာ ကောင်းပါတယ်။

ရီပတ်ဘလီကန် ဒုသမ္မတလောင်း ဂျေဒီဗင့်စ်န်က “ကျနော်က စင်စင်နက်တီအိမ်မှာ ကလေးတွေနဲ့ ထိုင်နေကြတာ၊ ဖုန်းဝင်လာတယ်၊ ဒေါ်နယ်ထရမ့်ပ်တဲ့၊ အဲဒါနဲ့ ကိုင်လိုက်တာပေါ့၊ ဂျေဒီရေ၊ မင်း ယုံမှာတောင်မဟုတ်ဘူး၊ သူတို့ ထပ်လုပ်ကြပြန်ပြီတဲ့၊ အဲဒါနဲ့ ပြန်ပြောတာပေါ့၊ ဟာ မဟုတ်တာ၊ နောက်နေပြန်ပြီ၊ ဘယ်လိုဖြစ်တာလဲခင်ဗျာ ဆိုတော့ ပြောပြတယ်၊ ငါ ဂေါ့ဖ်ရိုက်နေတာ၊ ငါ့ကိုပစ်ဖို့ ကြိုးစားတဲ့သူကို လျှို့ဝှက်ထောက်လှမ်းရေးက  တွေ့တာတဲ့၊ အဲဒါနဲ့ ကျနော်လည်း ဘုရားတမိတာပေါ့၊ အဆင်ပြေလို့ တော်သေးတာပေါ့၊ တကယ်ရော အဆင်ပြေရဲ့လား၊ ရုပ်ပိုင်းဆိုင်ရာတင် မဟုတ်ဘဲ အစစ အဆင်ပြေရဲ့လားပေါ့၊ သူကတော့ ပြေပါတယ်ပဲ ပြောတာပဲ၊ ဒေါ်နယ်ထရမ့်ပ်ဆိုတာ ဘယ်လိုလူလဲ သိတဲ့အတိုင်းပဲ၊ ဘာပြောတယ်ထင်လဲ၊ ငါ နည်းနည်းတော့ “ပေါက်” သွားတယ်ကွာ၊ မင်းသိလား၊ ငါက ခြောက်ကျင်းမြောက်မှာ တချက်လျော့၊ ဘာဒီနဲ့ ကျင်းဝင်တော့မှာပါ၊ အဲဒါ ငါ့ကို ပြီးအောင်ပေးမဆော့ဘူးလို့ ပြောတယ်။ အဲဒီဘဲက အဲလိုဗျ၊ ဖြစ်ဖြစ်ပြီးချင်း ၁၀ မိနစ်လောက်ပဲ ရှိသေးတယ် ဖုန်းခေါ်ပြီးပြောပြတာ၊ AK47 ကိုင်ထားတဲ့ လူတယောက်က သူ့ကိုပစ်ဖို့ လုပ်တာတောင် တချက်လျှော့ ကျင်းမစိမ်လိုက်ရလို့ စိတ်ပျက်နေတဲ့သူမျိုး၊ ခင်ဗျားတို့ အဲဒီလိုလူမျိုးကို အမေရိကန်သမ္မတနေရာ တင်ချင်ကြတာမဟုတ်လား။ ဘာကိုမှ မတုန်လှုပ်တဲ့သူ၊ ဖြစ်ပြီးချိန်မှာတောင် ဟာသပြောမပျက်တဲ့ သူမျိုးလေ” လို့ ပြောပါတယ်။

ကျူးလွန်ဖို့ ကြိုးစားသူ

ကျူးလွန်ဖို့ ကြိုးစားသူအကြောင်း ဆက်လေ့လာကြည့်ရအောင်ပါ။ အသက် ၅၈ နှစ်အရွယ် ရိုင်ယန်ဝက်စလေ ရောက်သ်ဟာ ဟာဝိုင်ယီဒေသခံဆိုပေမဲ့ တဘဝလုံးနီးပါး မြောက်ကာရိုလိုင်းနားမှာ နေခဲ့သူ ဖြစ်ပါတယ်။ ရောက်သ်နဲ့ သူ့သားဟာ ဟာဝိုင်ယီမှာ ပစ္စည်းထားတဲ့ အလုပ်ရုံလို အဆောက်အအုံတွေ ဆောက်လုပ်တဲ့ ကုမ္ပဏတခု ထောင်ထားပါတယ်။ မြောက်ကာရိုလိုင်းနားပြည်နယ် စိုက်ပျိုးရေးနဲ့ နည်းပညာ တက္ကသိုလ်ကနေ ၁၉၉၈ မှာ ဘွဲ့ရခဲ့သူ ဖြစ်ပါတယ်။

အွန်လိုင်းမှာရော ပြင်ပမှာပါ နိုင်ငံရေးလှုပ်ရှားမှု သမိုင်းနောက်ခံရှိသူဖြစ်ပြီး ၁၉၉၆ ခုနှစ် လောက်ကတည်းက  ဂရက်ဖတီတွေ ရေးဆွဲတာ ဆန့်ကျင်တဲ့ လှုပ်ရှားမှုမှာ ပါဝင်ခဲ့ဖူးပါတယ်။ ၂၀၁၆ တုန်းက ထရမ့်ပ်ကို မဲပေးခဲ့ဘူးပေမဲ့ နောင်တရတယ်လို့ တွစ်တာမှာ ရေးခဲ့ဖူးပါတယ်။ ၂၀၂၃ မှာ ကိုယ့်ဘာသာ ပုံနှိပ်ထုတ်ဝေတဲ့ စာအုပ်မှာလည်း ထရမ့်ပ်ကို ထောက်ခံခဲ့တာ သူအမှားလုပ်ခဲ့တာလို့ ရေးခဲ့ဖူးပါတယ်။ ဇန်နဝါရီ ၆ ကက်ပီတယ်လ်လွှတ်တော် အဆောက်အအုံ တိုက်ခိုက်ခံရမှု အတွက်လည်း ဒေါ်နယ်ထရမ့်ပ်ကို ဝေဖန်ရေးသားထားပါတယ်။

ထရမ့်ပ်ကိုမကြိုက်တော့ နောက်မှာ တခြားသမ္မတလောင်း ဖြစ်လာနိုင်သူ အများအပြားကို ပြောင်းလဲ ထောက်ခံခဲ့ပါတယ်။ ဒီမိုကရက်ဘက်မှာဆိုရင် ဂျိုးဘိုင်ဒင်၊ ကာမာလာဟဲရစ်၊ တူလ်ဆီဂါဘတ်တို့ကို ထောက်ခံတာတွေ့ရသလို ရီပတ်ဘလီကန်ဘက်မှာလည်း ထရမ့်ပ်နဲ့ ပြိုင်ခဲ့သေးတဲ့ ဗီဗက်ရာမဆွာမိ၊ နီကီဟေလီတို့ကို ထောက်ခံခဲ့ပါတယ်။ ၂၀၁၉ နောက်ပိုင်း ဒီမိုကရက် အကြိုရွေးကောက်ပွဲ စုဝေးပွဲတွေမှာ ဒေါ်လာ ၁၄၀ လှူခဲ့ဖူးပြီး မြောက်ကာရိုလိုင်းနားမှာ ပါတီစွဲမရှိ မဲဆန္ဒရှင်အဖြစ် မှတ်ပုံတင်ထားပါတယ်။ ဒါပေမဲ့ ၂၀၂၄ မှာ မြောက်ကာရိုလိုင်းနားပြည်နယ် ဒီမိုကရက်သမ္မတလောင်း အကြိုရွေးေကာက်ပွဲမှာ မဲပေးခဲ့ပါတယ်။

ရောက်သ်ရဲ့ အရေးအသားတွေ အရရော၊ သူနဲ့သိတဲ့သူတွေ အပြောအရပါ သူဟာ သူ့ကိုယ်သူ ကမ္ဘာ့အရေးရာတွေမှာ အရေးကြီးတဲ့ အခန်းကဏ္ဍက ပါဝင်နေတယ်လို့ ယူဆသူဖြစ်တာကို တွေ့ရပါတယ်။ ရောက်သ်ဟာ ကင်မ်ဂျုံအန်းတို့ အီလွန်မတ်စ်ခ်တို့ကို ဆက်သွယ်ဖို့ မကြာခဏ ကြိုးစားခဲ့ဖူးသူလည်း ဖြစ်ပါတယ်။ အမေရိကန်-အီရန် နျူးကလီးယား သဘောတူညီချက်ကို ဖျက်ပစ်တဲ့ ထရမ့်ပ်ကိုရော၊ ထရမ့်ပ်ကိုထောက်ခံခဲ့တဲ့သူကိုပါ အီရန်က လုပ်ကြံသင့်တယ်လို့လည်း သူ့စာအုပ်ထဲမှာ ရေးသားခဲ့ဖူးပါတယ်။

ယူကရိန်းဘက်က ဝင်တိုက်ပေးလိုသူ

အထူးခြားဆုံးကိစ္စကတော့ ရုရှားက ယူကရိန်းကို ကျူးကျော်ချိန်မှာ ယူကရိန်းဘက်က ဝင်တိုက်ပေးဖို့ လုပ်တဲ့ကိစ္စ ဖြစ်ပါတယ်။ ဒီကိစ္စနဲ့ပတ်သက်ပြီး ရောက်သ်နဲ့ သတင်းဌာန အင်တာဗျူးထားတဲ့ ရုပ်သံဖိုင်တွေတောင် ရှိပါတယ်။ အဲဒီအထဲက တချို့ကို ကောက်နုတ် ဖော်ပြလိုက်ပါတယ်။

ရိုင်ယန် ဝက်စ်လေ ရောက်သ်က “ကျနော့် မူလရည်မှန်းချက်က ဒီကိုလာပြီး တိုက်ပွဲဝင်ဖို့ပဲ၊ တကမ္ဘာလုံးက လူတိုင်း၊ ကျား မ၊ အသက်အရွယ်မရွေး ယူကရိန်းပြည်သူတွေကို ထောက်ပံ့ပေးသင့်တယ်၊ ယူကရိန်းတပ်မတော်ကို ပံ့ပိုးသင့်တယ်။ ဒါပေမဲ့ ကျနော်က ၅၆ နှစ်ရှိပြီ၊ အရင်ကလည်း စစ်ရေးအတွေ့အကြုံ မရှိဘူးပေါ့။ အဲဒီတော့ သူတို့ကကျတော့ ကျနော်က သင့်တော်တဲ့သူ မဟုတ်ဘူးလို့ မြင်တာပေါ့။ မသင့်တော်ဘူးလို့ ပယ်ချတာပေါ့။  အဲဒီတော့ Plan B အနေနဲ့ ကိယက်ဗ်ကိုလာပြီး ဒီကို လူတွေအများကြီးလာအောင် လှုံ့ဆော်ပေးနေတာပါ။ ယူကရိန်းမှာ  တိုက်ပွဲဝင်ဖို့ လူတွေ ထောင်ချီ၊ ထောင်ချီပြီးတော့ကို လိုအပ်တယ်။ တကမ္ဘာလုံးမှာဗျာ နိုင်ငံပေါင်း ၁၉၀ ရှိတယ်၊ အဲဒီနိုင်ငံ အကုန်လုံးကနေ ထောင်ဂဏန်းစီ လိုတာ။ အစိုးရတွေက သူတို့ တရားဝင်စစ်တပ်တွေ မလွှတ်ဘူးဆိုရင်၊ ကျုပ်တို့ အရပ်သားတွေက ရှေ့ဆောင်ပြီး ဒီလိုဖြစ်အောင် လုပ်ရမှာပေါ့။ ပြီးတော့ ကျုပ်တို့မှာ အရမ်းအံ့အားသင့်စရာကောင်းတဲ့လူတွေ ဒီမှာ ရှိနေတယ်၊ ဒါပေမဲ့ ရှိသင့်တဲ့ အရေအတွက်နဲ့ ယှဉ်ရင် နည်းနည်းပဲ ရှိသေးတယ်။ ကျုပ်တို့မှာ ၅,၀၀၀ ရှိရင်၊ တိုက်ပွဲဝင်ပေးမယ့်သူ ၁၀,၀၀၀ ရှိရင်တောင် ကမ္ဘာ့လူဦးရေ သန်း ၅,၀၀၀ နဲ့စာရင် နည်းနည်းလေးပဲရှိသေးတယ်။ လူတိုင်း ဒီမှာလာပြီး တိုက်ပွဲဝင်ဖို့ လိုအပ်တယ်။ အဲဒါကြောင့် ကျနော် ကိယက်ဗ်ကို ရောက်နေတာပါ။”

ဒါပေမဲ့ ရောက်သ်ဟာ စိတ်ကယောင်ချောက်ချားနဲ့ ထင်ရာပြောတတ်သူသာ ဖြစ်တယ်လို့ ယူကရိန်းအတွက် အပြည်ပြည်ဆိုင်ရာတပ်ဖွဲ့မှာ   စေတနာ့ဝန်ထမ်းတပ်ဖွဲ့ဝင် လုပ်ခဲ့သူတွေက ပြောပါတယ်။

ရောက်သ်ဟာ ဒီအဖွဲ့မှာ ဘယ်တုန်းကမှ  အဖွဲ့ဝင်မဖြစ်ခဲ့သလို ထင်ရာပြော ထင်ရာလုပ်ခဲ့တာကြောင့် ယူကရိန်းဘက်က ဝင်တိုက်ပေးတဲ့ နိုင်ငံတကာ စေတနာ့ဝန်ထမ်း တပ်ဖွဲ့တွေ အတွက်ပါ ခေါင်းခဲစရာ အနှောင့်အယှက် ဖြစ်ခဲ့တယ်လို့ ကိုယ်တွေ့ကြုံရသူတွေက ဖြေရှင်းပါတယ်။

ယူကရိန်း နိုင်ငံတကာတပ်ဖွဲ့ဝင်ဟောင်း အိဗ်လင်း အက်ရှ်ချန်ဘရန်းနားက “သိတဲ့အတိုင်းပဲ သူက ထင်ယောင်ထင်မှား ဖြစ်နေတာ၊ ယူကရိန်းကို ဘယ်လိုကူညီရမလဲဆိုတာ သိတာ သူတယောက်တည်း ရှိတယ်လို့ ထင်နေတာ၊ သူပြောတာ နားမထောင်ရင်၊ သူလုပ်ချင်တဲ့အတိုင်း မလုပ်ရင်၊ သူ့ရဲ့ ရူးကြောင်ကြောင် အိုင်ဒီယာတွေကို မလိုက်နာရင်၊ ရှင်က ယူကရိန်းကို မကူညီချင်တဲ့လူမျိုး၊ ရုရှားကို နိုင်စေချင်နေတာ၊ အဲဒီလိုမျိုးကြီးရှင့်” လို့ ပြောပါတယ်။ 

အိဗ်လင်း အက်ရှ်ချန်ဘရန်းနားက ဆက်လက်ပြီး “ကျမကို စာရင်းတွေပေးတာ၊ ထောင်နဲ့ချီတယ်၊ အာဖဂန်နိုင်ငံသား ၅,၀၀၀၊ ၆,၀၀၀ လောက်ရှိတယ်။ သူတို့နာမည်တွေ၊ ရှေ့နာမည်နဲ့ မျိုးရိုးနာမည်၊ ဆက်သွယ်ရမယ့် အီးမေးလ်၊ ဖုန်းနံပါတ်၊ ပတ်စ်ပို့နံပါတ်၊ သူက ရော့ ဒီမှာ စစ်သားစာရင်း၊ နင်တို့လိုချင်ရင် အဆင်သင့်ပဲ၊ သူတို့က ဥရောပကို တရားဝင်မှ ဝင်လို့မရတာ၊ ပြီးတော့ ရှင်က တပ်သားစုဆောင်းတဲ့သူ မဟုတ်ဘူး။ တပ်နဲ့ ရှင်နဲ့ ဘာမှမဆိုင်ဘူး၊ ဒီလိုလုပ်ပိုင်ခွင့် မရှိဘူး ဆိုတာ ပြောပြရတယ်၊ ရှင်ဘာဖြစ်လို့ ဒီလိုလုပ်တာလဲပေါ့၊ ဒီသနားစရာကောင်းတဲ့ လူတွေကို ရှင်ဘာတွေ လျှောက်ပြောထားသလဲ ပြန်မေးရတယ်၊ အဲဒီအချိန် ယူကရိန်းက အရာရှိတိုင်း၊ တပ်မှူးတိုင်းက ရိုင်ယန် ဘယ်လိုလူလဲဆိုတာ သိကြတယ်၊ ဒီအမေရိကန်က ငါတို့နဲ့ ဘာဖြစ်ချင်နေတာလဲပေါ့၊ ဘာဖြစ်လို့ ကိုယ့်အိမ်ကိုယ် အေးဆေးမပြန်လဲပေါ့” လို့ ပြောပါတယ်။

ရောက်သ်ဟာ ပြစ်မှုကြောင်းအရ စွဲချက်အများအပြားနဲ့ ရင်ဆိုင်ခဲ့ဖူးသူ ဖြစ်ပါတယ်။ ၂၀၀၂ ခုနှစ်တုန်းကလည်း အစုလိုက် သေကျေပျက်စီးစေနိုင်တဲ့ လက်နက် လက်ဝယ်ထားရှိမှုနဲ့ အပြစ်ရှိကြောင်း ဆုံးဖြတ်ခံခဲ့ရပါတယ်။

ယာဉ်စည်းကမ်းကိစ္စကနေ အဖမ်းမခံဘဲ သူ့ကုမ္ပဏီရုံးခန်းထဲမှာ လက်နက်အပြည့်အစုံနဲ့ နာရီအတန်ကြာ ခိုအောင်းပြီး ခုခံဖို့ ကြိုးစားခဲ့တာ ဖြစ်ပါတယ်။ သူ့ပုံစံ ပုံမှန်မဟုတ်ဘူးလို့ပဲ ယူဆခဲ့ကြတဲ့အတွက် အပြစ်ရှိကြောင်း ဝန်ခံခဲ့တဲ့ ရောက်သ်ကို စိတ်ကျန်းမာရေးစစ်ဆေးဖို့နဲ့ လိုအပ်တဲ့ ကုသမှု ခံယူဖို့ပဲ တရားရုံးက ဆုံးဖြတ်ခဲ့ပါတယ်။

ဘဝတလျှောက်မှာ ပြစ်မှုကြောင်းအရ ကျူးလွန်မှု ၁၀၀ လောက်ရှိခဲ့ပြီး ယာဉ်စည်းကမ်း ဖောက်ဖျက်တာနဲ့ ခိုးရာပါပစ္စည်း လက်ဝယ်ထားရှိမှုတွေပဲ အဓိက ကျူးလွန်ခဲ့တာ ဖြစ်ပါတယ်။ ဒါပေမဲ့ ထောင်တခါမှ မကျဘူးပဲ ခံဝန်၊ ခြေချုပ်တွေနဲ့တင် ပြီးခဲ့တာဖြစ်ပါတယ်။

ဆက်လက်စုံစမ်းစစ်ဆေးမှုတွေအရ ရောက်သ်ရဲ့ နစ်ဆန်း SUV ကားမှာ တပ်ထားတဲ့ ကားနံပါတ်က အခိုးခံထားရတဲ့ ဖို့ဒ်ထရပ်ကားက ကားနံပါတ်ဆိုတာ တွေ့ရပါတယ်။

ရောက်သ် ထွက်ပြေးတာကို မြင်လိုက်ရတဲ့ မျက်မြင်သက်သေကလည်း ရောက်သ်ကို  ဖမ်းဆီးအပြီးမှာ သူမြင်ခဲ့တာ ဘယ်သူဖြစ်ကြောင်း မှန်မှန်ကန်ကန် ရွေးပြနိုင်ပါတယ်။ ရောက်သ်ရဲ့ ဖုန်းက အချက်အလက်တွေအရ သူဟာ မနက် ၁ နာရီ ၅၉ မိနစ်ကတည်းက ဂေါက်ကွင်းကို ရောက်နေခဲ့တာဖြစ်ပြီး ထရမ့်ပ် မရောက်ခင် ၁၂ နာရီလောက် ပုန်းအောင်း စောင့်ဆိုင်းခဲ့တာ ဖြစ်ပါတယ်။

FBI မိုင်ယာမီနယ်မြေ တာဝန်ခံ အေးဂျင့် ဂျက်ဖရီ ဘီ ဗယ်လ်ထရီက “ဆယ်လူလာ အချက်အလက်တွေအရ သံသယူရှိသူဟာ အမေရိကန် လျှို့ဝှက်ထောက်လှမ်းရေးနဲ့ ရင်ဆိုင်မတွေ့ခင် ဂေါက်ကွင်းနယ်နိမိတ်တဝိုက်မှာ ၁၂ နာရီလောက် ရှိနေခဲ့တယ်ဆိုတာ တွေ့ရပါတယ်။ ကျနော်တို့ စုံစမ်းစစ်ဆေးရေးအဖွဲ့တွေအနေနဲ့ သက်ဆိုင်ရာ ဗီဒီယို မှတ်တမ်းတွေ စုဆောင်းဖို့ အနားက ရပ်ကွက်တခုလုံး ခြုံပြီး စစ်ဆေးနေပါတယ်။ သံသယရှိသူဟာ အွန်လိုင်းမှာလည်း ပုံမှန်တင်တတ်သူဖြစ်ပြီး သူ့ အွန်လိုင်းပို့စ်တွေနဲ့ သူ့အွန်လိုင်းရှာဖွေမှုတွေကိုပါ စစ်ဆေးနေပါတယ်။ ဒါ့အပြင် မီဒီယာသတင်းတွေနဲ့ အများထုတ်ပြန်ချက်တွေအရ သိရတာက သူဟာ ယူကရိန်းအတွက် တိုက်ပေးဖို့  အာဖဂန်စစ်သားတွေနဲ့ တခြားလူတွေကို စုဆောင်းခဲ့တယ်လို့လည်း သိထားပါတယ်” လို့ ပြောပါတယ်။

အိမ်ဖြူတော်ရဲ့ တုံ့ပြန်မှု 

အခုအမှုကို အက်ဖ်ဘီအိုင်က ဦးဆောင်စစ်ဆေးနေပြီး လုပ်ကြံဖို့ ကြိုးစားမှုအဖြစ် သတ်မှတ်ထားပါတယ်။ ရောက်သ်ဟာ ထရမ့်ပ်ကို ပစ်ဖို့ ရည်ရွယ်ခဲ့တာလို့ တာဝန်ရှိသူတွေက ယုံကြည်ထားပေမဲ့ တခြားရည်ရွယ်ချက်ကိုတော့ မသိရသေးပါဘူး။ အမေရိကန်သမ္မတ ဂျိုးဘိုင်ဒင်ကတော့ လျှို့ဝှက်ထောက်လှမ်းရေးအတွက် အကူအညီပိုလိုအပ်တယ်လို့ သုံးသပ်ပါတယ်။

အမေရိကန်သမ္မတ ဂျိုးဘိုင်ဒင်က “သမ္မတ အဆင်ပြေတာ ဘုရားမတာပဲ။ အသေးစိတ် အစီရင်ခံစာတော့ မတက်သေးဘူး။ ဒီညသိရမှာပါ။ ဒါပေမဲ့ တခုရှင်းအောင်ပြောချင်တာ လျှို့ဝှက်ထောက်လှမ်းရေးအတွက် အကူအညီ ပိုလိုအပ်တယ် ဆိုတာပဲ။ သူတို့ရဲ့ လုံခြုံရေးဝန်ဆောင်မှု ပိုလိုအပ်နေရင် ဒီလိုအပ်ချက်ကို ဖြည့်ဆည်းပေးဖို့ ကွန်ဂရက်လွှတ်တော် အနေနဲ့ တုံ့ပြန်ဆောင်ရွက်သင့်တယ်လို့ ထင်ပါတယ်” လို့ ပြောပါတယ်။

ဘိုင်ဒင်က ထရမ့်ပ်ကို “သမ္မတ” ​လို့ပဲ သုံးသွားတာဖြစ်ပါတယ်။ သမ္မတဟောင်းတွေကိုလည်း သမ္မတလို့ လေးစားသမှုနဲ့ သုံးတတ်ကြပေမဲ့ အဲဒီလို သုံးမယ်ဆိုရင်တောင် “သမ္မတထရမ့်ပ်” ​လို့ ပြောရမှာဖြစ်ပါတယ်။ အဲဒီအစား “သမ္မတ” လို့ပဲ သုံးနှုန်းမိတာကတော့ ထုံးစံအတိုင်း လျှာချော်တာလည်း ဖြစ်နိုင်ပါတယ်။

အခင်းဖြစ်ပြီး မကြာမီမှာ ကမ္ဘာ့အချမ်းသာဆုံးပုဂ္ဂိုလ် အီလွန်မတ်စ်ခ်က သူပိုင်တဲ့ X လူမှုကွန်ရက်မှာ “ဘိုင်ဒင်/ကာမာလာ ကျတော့ ဘယ်သူမှ လုပ်ကြံဖို့ မကြိုးစားကြပါလား” ဆိုပြီး အငြင်းပွားဖွယ်ပို့စ်တခု တင်ခဲ့ပါတယ်။

ဒီပို့စ်ကြောင့် ဝိုင်းဝန်းဝေဖန်မှုတွေ ကြုံခဲ့ရအပြီးမှာတော့ ပြန်ဖျက်ချခဲ့ပြီး ဟာသအနေနဲ့ ရည်ရွယ်တာလို့ ပြန်ဖြေရှင်းခဲ့ပါတယ်။

အိမ်ဖြူတော်ကတော့ မတ်စ်ခ်ရဲ့ မှတ်ချက်ဟာ တာဝန်မဲ့လွန်းပြီး အကြမ်းဖက်မှုကို လှုံ့ဆော်တာ၊ နောက်ပြောင်တာ မလုပ်သင့်ဘဲ ရှုတ်ချဖို့သာ သင့်တယ်လို့ ဝေဖန်ခဲ့ပါတယ်။

လျှို့ဝှက် ပူးပေါင်းကြံစည်မှုလား

ဒီဖြစ်စဉ်နဲ့ ပတ်သက်ပြီး နောက်ကွယ်မှာ လျှို့ဝှက်ပူးပေါင်းကြံစည်မှု ရှိတယ်ဆိုတဲ့ Conspiracy Theory တွေကတော့ ရှိနေပါတယ်။ လက်ယာစွန်းဝါဒီတွေကတော့ ရောက်သ်နဲ့ အမေရိကန်စစ်ဘက် ပတ်သက်မှု ရှိနေသလား၊ ထောက်လှမ်းရေးနဲ့ ပတ်သက်မှု ရှိနေသလား၊ ဒီမိုကရက်တွေနဲ့ ပတ်သက်မှု ရှိနေသလားဆိုတဲ့ မေးခွန်းထုတ်မှုတွေ ရှိနေပါတယ်။ ကြိုတင်မစီစဉ်ထားဘဲ ​ဂေါ့ဖ်ကစားဖြစ်သွားတာကို သေနတ်သမားက ဘယ်လိုသိနေခဲ့တာလဲ ဆိုတဲ့ မေးခွန်းမျိုးတွေလည်း ထွက်ပေါ်လာနေပါတယ်။ အဲဒီလို လျှို့ဝှက်ကြံစည်မှု မရှိရင်တောင် လက်ဝဲစွန်း အယူအဆတွေ၊ ​ကွန်မြူနစ် အယူအဆတွေနဲ့ ထရမ့်ပ်အပေါ် အမုန်းပွားအောင် ဒီမိုကရက်တွေက လှုံ့ဆော်နေကြကြောင့် လုပ်ကြံသတ်ဖြတ်ရမယ်ဆိုတဲ့ အစွန်းရောက်တွေ ပေါ်လာတာလို့ စွပ်စွဲတာလည်း ရှိနေပါတယ်။

တဖက်မှာလည်း စကားစစ်ထိုးပွဲအပြီး ကာမာလာဟဲရစ်အပေါ် လူထုထောက်ခံမှု တက်လာတဲ့အချိန် ထရမ့်ပ်အပေါ် လုပ်ကြံဖို့ကြိုးစားမှု ထပ်ဖြစ်တာကို မေးခွန်းထုတ်တာ ရှိပါတယ်။ လုပ်ကြံမှု နှစ်ကြိမ်စလုံး အရာမထင်တာ၊ လုပ်ကြံသူတွေဟာ ပရော်ဖက်ရှင်နယ် သေနတ်သမားတွေ မဟုတ်ကြတာ ဆိုတဲ့အချက်တွေကို ထောက်ပြတာလည်း ရှိနေပါတယ်။  ဒါမှမဟုတ် ရန်ဘက်နိုင်ငံ၊​ ပြိုင်ဘက်နိုင်ငံတခုက၊​ တတိယအင်အားစုတခုက အမေရိကန်နိုင်ငံတွင်း အယူအဆမတူသူချင်း အမုန်းတရားအားကောင်းအောင်၊ အမေရိကန် ဒီမိုကရေစီကို စိတ်ပျက်လာအောင် ဖန်တီးနေသလားလို့ သုံးသပ်မှုတွေလည်း ရှိနေပါတယ်။

ဒါပေမဲ့ အချက်အလက်တွေအရ ဆိုရင်တော့ ယူကရိန်းဘက်က ဝင်တိုက်ပေးချင်တယ်ဆိုတဲ့ ကိုယ့်ကိုယ်ကိုယ် အရေးပါအရာရောက်တယ်လို့ ထင်နေသူတယောက်က ထရမ့်ပ်ကို လုပ်ကြံဖို့  တကိုယ်တော် ကြိုးစားခဲ့တယ်လို့ပဲ ​ကောက်ချက်ချလို့ ရပါတယ်။ အရင်တုန်းက အမေရိကန်သမ္မတတွေကို လုပ်ကြံမှုတွေ၊​ လုပ်ကြံဖို့ ကြိုးစားမှုတွေလိုပဲ တကိုယ်တော် လုပ်ကြံသူ၊ သေနတ်သမားရဲ့ မိုက်မဲတဲ့ လုပ်ရပ်ဆိုတဲ့ ပုံစံခွက်ထဲပဲ ဝင်သွားဖို့ ရှိနေပါတယ်။

စိုင်းခေတ်နွေ