၂၀၂၄-၂၀၂၅ ဘောလုံးရာသီ ဥရောပချန်ပီယံလိဂ် အုပ်စုအဆင့်ပွဲစဉ်တွေကို မနေ့ညက စတင်ယှဉ်ပြိုင်ရာ လီဗာပူး၊ ရီးရဲလ်နဲ့ ဘိုင်ယန်မြူးနစ်အပါအဝင် အသင်းကြီးတွေအားလုံး ဂိုးပြတ်နိုင်ပွဲတွေနဲ့ အဖွင့်လှပခဲ့ပါတယ်။
မနေ့ညက ယှဉ်ပြိုင်ခဲ့တဲ့အထဲ ထိပ်သီးအသင်းအချင်းချင်း တွေ့ဆုံတဲ့ အေစီမီလန်နဲ့ လီဗာပူးပွဲစဉ်မှာ လီဗာပူးက ၃ ဂိုး ၁ ဂိုးနဲ့ အနိုင်ရခဲ့ပါတယ်။
အိမ်ရှင် အေစီမီလန်အသင်းက ပွဲအစ ၃ မိနစ်မှာ ပူလီဆစ်ရဲ့ဂိုးနဲ့ ဦးဆောင်နိုင်ခဲ့ပေမဲ့လည်း လီဗာပူး က ပွဲချိန် ၂၃ မိနစ်မှာ ကိုနာတေး၊ ၄၁ မိနစ်မှာ ဗန်ဒိုက်နဲ့ ၆၇ မိနစ်မှာ ဇိုဘော့စလိုင်းတို့က အသီးသီး ဂိုးတွေ သွင်းယူပြီး နိုင်ပွဲရခဲ့တာပါ။
နည်းပြသစ် ကွန်ပနီနဲ့ နိုင်ပွဲဆက်နေတဲ့ ဂျာမန်ထိပ်သီး ဘိုင်ယန်မြူးနစ်ကလည်း ခရိုအေးရှားကလပ် ဒိုင်နမိုဇာဂရက်ကို အိမ်ကွင်းမှာ ၉ ဂိုး ၂ ဂိုးနဲ့ ဂိုးပြတ်နိုင်ပွဲရခဲ့ပါတယ်။
ဘိုင်ယန်မြူးနစ်အတွက် တိုက်စစ်မှူး ဟယ်ရီကိန်း တယောက်တည်းက ၄ ဂိုးသွင်းခဲ့ပြီး အိုလီဆေးက ၂ ဂိုး၊ ဂွါရဲယိုး၊ ဆာနေးနဲ့ ဂိုရက်ဇ်ကာတို့က ၁ ဂိုးစီ သွင်းယူပေးခဲ့ပါတယ်။
စပိန်ထိပ်သီး ရီးရဲလ်မက်ဒရစ်ကလည်း အိမ်ကွင်းမှာ ဂျာမန်ကလပ် စတုဂတ်ကို ၃ ဂိုး ၁ ဂိုးနဲ့ အနိုင်ရခဲ့ပါတယ်။
ရီးရဲလ်အတွက် ဂိုးတွေကို အမ်ဘာပေ၊ ရူဒီဂါနဲ့ အန်းဒရစ်တို့က သွင်းယူပေးခဲ့ပြီး စတုဂတ်အတွက် ချေပဂိုးတဂိုးကိုတော့ အန်ဒတ်ဗ်က သွင်းယူပေးခဲ့ပါတယ်။
အီတလီထိပ်သီး ဂျူဗင်တပ်ကလည်း အိမ်ကွင်းမှာ နယ်သာလန်ကလပ် ပီအက်စ်ဗွီကို ၃ ဂိုး ၁ ဂိုးနဲ့ အနိုင် ရခဲ့ပါတယ်။
ကျန်ပွဲစဉ်တွေမှာတော့ အင်္ဂလန်ကလပ် အက်စ်တွန်ဗီလာက ဆွစ်ကလပ် ယန်းဘွိုင်းစ်ကို ၃ ဂိုး ဂိုးမရှိ၊ ပေါ်တူဂီကလပ် စပို့တင်းက ပြင်သစ်ကလပ် လိုင်လီကို ၂ ဂိုး ဂိုးမရှိနဲ့ အသီးသီး အနိုင်ရ သွားပါတယ်။
ချန်ပီယံလိဂ် အုပ်စုပွဲစဉ်တွေကို ဒီနေ့ညမှာလည်း ဆက်လက်ယှဉ်ပြိုင်မှာဖြစ်ပြီး ဘိုလော့နာနဲ့ ရှက်တာဒိုးနက်၊ စပါတာပရပ်ဂ်နဲ့ ဆာလ်ဇ်ဘာ့ဂ်၊ ဆဲလ်တစ်နဲ့ ဆလိုဗန်၊ ကလပ်ဘရုဂေးနဲ့ ဒေါ့မွန်၊ မန်စီးတီးနဲ့ အင်တာမီလန်၊ ပီအက်စ်ဂျီနဲ့ ဂျီရိုနာတို့ အသီးသီး တွေ့ဆုံနေပါတယ်။
Photo-Reuters
