စစ်ခေါင်းဆောင်က လက်လွှတ်လိုက်ရတဲ့ မြို့နယ်တွေကို လေကြောင်းကနေ ဗုံးကြဲတိုက်ခိုက်မှာ ဖြစ်တဲ့အတွက် ပြည်သူတွေ သတိရှိကြဖို့ စက်တင်ဘာ ၇ ရက်ထုတ် စစ်ကောင်စီပိုင် ဝါဒဖြန့်သတင်းစာမှာ စတင်ဖော်ပြထားပါတယ်။
စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က တောင်ကြီးမြို့တော်ခန်းမမှာ စက်တင်ဘာ ၃ ရက်က ဌာနဆိုင်ရာဝန်ထမ်းတွေနဲ့ တွေ့ဆုံစဥ် ပြောဆိုခဲ့ပြီး စက်တင်ဘာ ၄ ရက်မှာ ရန်နိုင်မင်းစစ်ဆင်ရေး ဖွဲ့စည်းကာ လေကြောင်းကနေ မြို့ရွာတွေကို ဗုံးကြဲတိုက်ခိုက်ဖို့ ညွှန်ကြားခဲ့တာပါ။
ဗိုလ်ချုပ်မှူးကြီးမင်းအောင်လှိုင်နဲ့ အဖွဲ့ဟာ စက်တင်ဘာ ၄ ရက်မှာ ကရင်နီပြည်နယ် ဒေသကွပ်ကွဲမှုစစ်ဌာနချုပ် (လွိုင်ကော်) မှာ ရန်နိုင်မင်းစစ်ဆင်ရေးကို ဖွဲ့စည်းခဲ့တယ်လို့ ရပခနဲ့နီးစပ်တဲ့ သတင်းရင်းမြစ်က ပြောပါတယ်။
“ရန်နိုင်မင်းစစ်ဆင်ရေးက တပ်ချုပ် လွိုင်ကော် (ဒကစ) မှာ နယ်မြေစစ်ဆေးရေးလာတုန်း ဖွဲ့စည်းသွားတာ၊ ရေချုပ်နဲ့ လေချုပ်လည်း ပါတယ်။ ဒကစမှူး ဗိုလ်မှူးကြီးအောင်ကျော်ခိုင်ကို လွိုင်ကော်ပြန်လည်ထူထောင်ရေးအတွက် တာဝန်ပေးသွားတယ်။ အဲ့စစ်ဆင်ရေးက ရှမ်းတောင်နဲ့ ကယားအတွက် ဖွဲ့တာ။”
စစ်ကောင်စီက စက်တင်ဘာ ၃ ရက်ကနေ ၉ ရက်အတွင်း မန်တုံ၊ ဖယ်ခုံ၊ နမ့်ခမ်း၊ နွားထိုးကြီး၊ လားရှိုးမြို့နယ်က လူနေအိမ်၊ စစ်ဘေးရှောင်စခန်းတွေကို ဗုံးကြဲခဲ့လို့ ကိုယ်ဝန်ဆောင်အမျိုးသမီး၊ ကလေးငယ်တွေနဲ့ အရပ်သားပြည်သူ ၄၀ ထက်မနည်း သေဆုံးပြီး ဒါဇင်နဲ့ချီ ဒဏ်ရာရခဲ့ပါတယ်။
ဗိုလ်ချုပ်မှူးကြီးမင်းအောင်လှိုင် သြဂုတ် ၂၃ ရက်ကနေ စက်တင်ဘာ ၅ ရက်အထိ သွားခဲ့တဲ့ ၁၄ ရက်တာ ခရီးစဥ်မှာ တပခ၊ လပခ၊ ရပခ စတဲ့ တိုင်းစစ်ဌာနချုပ်က တိုင်းမှူးတွေ၊ လေတပ်စခန်းမှူး၊ ဌာနချုပ်မှူးတွေနဲ့ တွေ့ဆုံပြီး စစ်ရေးကိစ္စတွေ ညွှန်ကြားခဲ့ပါတယ်။
စစ်ခေါင်းဆောင်ရဲ့ ၁၄ ရက်တာခရီးစဥ်မှာ ဗိုလ်ချုပ်ကြီးရဲဝင်းဦး၊ ဗိုလ်ချုပ်ကြီးထွန်းအောင် (လေ)၊ ဒုဗိုလ်ချုပ်ကြီးထိန်ဝင်း (ရေ)၊ ဒုဗိုလ်ချုပ်ကြီးရာပြည့်နဲ့ ဒုဗိုလ်ချုပ်ကြီးထွန်းထွန်းနောင်တို့ လိုက်ပါခဲ့ပါတယ်။
