တနင်္သာရီတိုင်း၊ ပုလောမြို့နယ်၊ ပလမြို့မှာ စစ်ကောင်စီဘက်က အင်အားဖြည့်တင်းထားပြီး အရပ်သား ၁၀ ယောက်ကျော်ကို ဖမ်းဆီးထိန်းသိမ်းထားတယ်လို့ ဒေသခံတွေက ပြောပါတယ်။

စက်တင်ဘာ ၁ ရက်မှာ စစ်ကောင်စီတပ်သားတွေက ကျောက္ကာရွာကနေ ရေလမ်းကတဆင့် ပလမြို့ရဲစခန်းမှာ ခန့်မှန်းအင်အား ၈၀ လောက် ဖြည့်တင်းထားတယ်လို့ ပုလောပကဖဆီက သိရပါတယ်။

စက်တင်ဘာ ၄ ရက် မနက် ၆ နာရီဝန်းကျင်လောက်မှာ ပလမြို့အောက်ဘက်ကို စစ်ကောင်စီတပ်သားတွေ စစ်ကြောင်းထိုးတာကြောင့် ဒေသတွင်းတော်လှန်ရေးတပ်ဖွဲ့တွေနဲ့ ထိတွေ့တိုက်ပွဲ ဖြစ်ပွားခဲ့ပါတယ်။

PDF မြိတ်ခရိုင်၊ အမှတ် ၁ တပ်ရင်း သတင်းနဲ့ပြန်ကြားရေးတာဝန်ခံက “စစ်ကောင်စီတပ်က အရပ်သားတွေ ဖမ်းဆီးထားတာရှိတယ်။ တိုက်ပွဲကတော့ အခုလက်ရှိမှာ အခြေအနေ မတည်ငြိမ်သေးလို့ ပြောခွင့်မရှိသေးဘူး” လို့ ပြောပါတယ်။

အဆိုပါ ၄ ရက်မှာ စစ်ကောင်စီတပ်သားတွေက အရပ်သား ၁၉ ယောက်ကို ဖမ်းဆီးထိန်းသိမ်းခဲ့ပြီး အသက်ကြီးပိုင်း ၅ ယောက်ကို ပြန်လည်လွှတ်ပေးကာ ၁၄ ‌ေယာက်ကို ထိန်းသိမ်းထားတယ်လို့ ပုလော ပကဖ ကနေ သိရပါတယ်။

မြို့ခံတယောက်က “သူတို့ ပလမြို့မှာ အင်အားလာဖြည့်ကတည်းက ရွာသားတွေ ဘယ်သူမှ အပြင် မထွက်ဘူး။ ၄ ရက်နေ့မှာ စဖမ်းဆီးတော့ တချို့ကလည်း နီးစပ်ရာဆွေမျိုးတွေဆီ ထွက်ပြေး တိမ်းရှောင်တာတွေ ရှိတယ်” လို့ ပြောပါတယ်။

စစ်ကောင်စီတပ်သားတွေ ဖမ်းဆီးထားတဲ့ အရပ်သားတွေကို ပလမြို့မရဲစခန်းမှာ ထိန်းသိမ်းထားတယ်လို့ ဒေသခံတွေဆီက သိရပါတယ်။

စက်တင်ဘာ ၃ ရက်ကလည်း စစ်ကောင်စီရဲ့ ပလစစ်ဆေးရေးဂိတ်မှာ စစ်ကောင်စီတပ်သားတွေ က ရန်ကုန်ကလာတဲ့ ဘိုင်းပြင်ရွာသားတယောက်ကို ဖမ်းဆီးခဲ့တယ်လို့ သိရပါတယ်။