ချင်းပြည်နယ်၊ ဟားခါးမြို့က စစ်ကောင်စီ တပ်သား ၂ ယောက်ဟာ သေနတ် ၂ လက်နဲ့အတူ စက်တင်ဘာ ၄ ရက်က အလင်း၀င်ရောက်လာတယ်လို့ Chinland Defense Force (Hakha) ဆီကနေ သိရပါတယ်။
Chinland Defense Force (Hakha) ရဲ့ ပြောရေးဆိုခွင့်ရှိသူတဦးက “ဟားခါးမြို့ပေါ်မှာတပ်စွဲနေတဲ့ စစ်ကောင်စီတပ်ထဲက တပ်သားအဆင့် ၂ ယောက် အလင်း၀င်လာတာ ဖြစ်ပါတယ်။ သူတို့ ၂ ယောက်လုံးကို ဆုကြေးငွေအသီးသီး ချီးမြှင့်ပေးထားပြီးတော့ လုံခြုံစိတ်ချရတဲ့နေရာကို ပို့ဆောင်ပေးထားပြီးပါပြီ” လို့ DVB ကို ပြောပါတယ်။
အဆိုပါ စစ်ကောင်စီတပ်သား ၂ ယောက်ဟာ G3 အမျိုးအစား သေနတ် ၂ လက်နဲ့အတူ အလင်း၀င်ရောက်လာကြတာ ဖြစ်ပါတယ်။
Chinland Defense Force (Hakha) ရဲ့ တာ၀န်ခံတဦးက “ကျနော်တို့ဆီကို စစ်ကောင်စီဘက်က အလင်း၀င်လာသူတွေ တိုးတိုးလာနေတယ်။ ဆက်လက်ပြီးတော့လည်း အကြမ်းဖက်စစ်ကောင်စီ လက်အောက်မှာ ဆက်လက်တာဝန်ထမ်းဆောင်လိုစိတ် မရှိကြတော့တဲ့ စစ်ကောင်စီတပ်သားတွေအနေနဲ့ ကျနော်တို့ဆီကို အမြန်ဆုံးဆက်သွယ်ပြီး အလင်းဝင်ရောက်ကြဖို့ တိုက်တွန်းလိုပါတယ်´´ လို့ ပြောပါတယ်။
Chinland Defense Force (Hakha) ကနေ စစ်ကောင်စီတပ်သားတွေနဲ့ ရဲတပ်ဖွဲ့၀င်တွေအနေနဲ့ အလင်း၀င်ရောက်ကြဖို့ ၂၀၂၃ ခုနှစ်၊ နို၀င်ဘာလထဲမှာ ကြေညာချက်ထုတ်ပြန်ပြီးတဲ့နောက်ပိုင်း အလင်း၀င်ရောက်လာသူတွေ လစဥ်တိုးတက်များပြားလာတယ်လို့ ဆိုပါတယ်။
လက်နက်ချ အလင်းဝင်လာတဲ့ စစ်ကောင်စီတပ်သားတွေကို လူသားဆန်ဆန်ဆက်ဆံသွားမှာ ဖြစ်တဲ့အပြင် CDF-Hakha ကနေ စီစဥ်ထားတဲ့ လုံခြုံသည့်နေရာတွေမှာ နေထိုင်နိုင်တယ်လို့ ဆိုပါတယ်။
ဒါ့အပြင် တော်လှန်ရေးပြီးဆုံးတဲ့အထိ စားဝတ်နေရေးနဲ့ ကျန်းမာရေးစောင်ရှောက်မှုတွေကအစ ဆောင်ရွက်ပေးသွားမှာဖြစ်ကာ အလင်း၀င်လာတဲ့သူတွေအနေနဲ့ သွားလိုရာနေရာရှိရင်လည်း သွားရောက်နိုင်ဖို့ စီစဥ်ဆောင်ရွက်ပေးမယ်လို့ CDF-Hakha ဆီကနေ သိရပါတယ်။
