ရန်ကုန်တိုင်း ဒေါပုံမြို့နယ်၊ ဗိုလ်ထွန်းစံရပ်ကွက်၊ ဗိုလ်ဆွန်ပက်လမ်းမှာ စက်တင်ဘာ ၄ ရက် ည ၇ နာရီလောက်က Level 1 အဆင့် မီးလောင်ခဲ့တာကြောင့် အိမ် ၂ လုံးနဲ့ တိုက်ခန်း ၁ ခန်း ပျက်စီးခဲ့သလို လူ ၂ ဦး ထိခိုက်ဒဏ်ရာရခဲ့တယ်လို့ အရပ်ဘက်ကယ်ဆယ်ရေးအဖွဲ့တွေက ပြောပါတယ်။ 

မီးစ‌လောင်တဲ့ သွပ်မိုးပျဥ်ကာအိမ်မှာ ဖယောင်းတိုင်ကနေ အိပ်ရာနဲ့ စောင်တွေကို မီးကူးစက်ရာမှ စတင်ခဲ့တာဖြစ်ပြီး ဘေးကပ်ရက်ရှိ သွပ်မိုးပျဉ်ကာအိမ်တလုံးနဲ့ ၆ ထပ်တိုက်ရဲ့ ၃ လွှာထဲကိုပါ လောင်ကျွမ်းနေခဲ့တာပါ။ 

ကယ်ဆယ်ရေးအဖွဲ့ဝင်တဦးက “အသက် ၃၀ ကျော် အမျိုးသား ၂ ဦး ဒဏ်ရာရတယ်။ တယောက်က ခေါင်းပေါက်ပြဲ၊ နောက်တယောက်က လက်တွေ ရှသွားတာ။ စိုးရိမ်စရာတော့ မရှိပါဘူး။ မီးလောင်တာက ဖယောင်းတိုင်ကနေ ပြောတယ်။ မီးပျက်နေလို့ အခန်းထဲ ထွန်းထားရာကနေ ဘေးကို ကူးပြီးလောင်တာ။ စုစုပေါင်း ၂ လုံးနဲ့ ၁ ခန်းပေါ့။ ဘေးက တိုက်က ၄ ထပ်မြောက် အလွှာဆို ၃ လွှာက ခုတင်နဲ့ ဗီရိုတွေ၊ အိပ်ခန်းပစ္စည်းတွေ လောင်သွားတာ။  Level 1 မီးငြှိမ်းသတ်ရေးယာဉ်တွေ လာကြပါတယ်"လို့ ဆိုပါတယ်။ 

မီးလောင်မှုကြောင့် ၁၅ ပေပတ်လည် သွပ်မိုးပျဉ်ကာအိမ် တလုံး၊ ၁၅ ပေ၊ ပေ၂၀  သွပ်မိုး ပျဉ်ကာအိမ် တလုံးနဲ့ ၃ လွှာရှိ ဘယ်ဘက်ခြမ်း တခန်း ပျက်စီးသွားပြီး မီးလောင်မှုကြောင့် ပျက်စီးဆုံးရှုံးမှုကို သက်ဆိုင်ရာ မီးသတ်က စစ်ဆေးတွက်ချက်နေဆဲ ဖြစ်ပါတယ်။

မီးသတ်တပ်ဖွဲ့တွေနဲ့ အရပ်ဘက်အသင်းတွေ ပူးပေါင်းငြှိမ်းသတ်ခဲ့တာကြောင့် ည ၇ နာရီ ၂၄ မိနစ်မှာ မီးထိန်းနိုင်ကာ ည ၇ နာရီ ၃၁ မိနစ်မှာ မီးငြိမ်းသွားပါတယ်။