ရှမ်းပြည်နယ်၊ ပလောင်ကိုယ်ပိုင်အုပ်ချုပ်ခွင့်ရဒေသ၊ မန်တုံမြို့ကို စစ်ကောင်စီက ဂျက်ဖိုက်တာနဲ့ ဗုံးကြဲမှုကြောင့် အမျိုးသားတယောက်ထိမှန်ဒဏ်ရာရခဲ့ပြီး လက်ဖက်စက်ရုံ ပျက်စီးသွားတယ်လို့ တအာင်းအမျိုးသမီးအဖွဲ့အစည်းက ထုတ်ပြန်ပါတယ်။
တိုက်ပွဲဖြစ်ပွားမှုမရှိဘဲ စစ်ကောင်စီက မန်တုံမြို့နယ်ကို စက်တင်ဘာ ၃ ရက် ည ၁၀ နာရီ ၄၅ မိနစ်မှာ ဂျက်ဖိုင်တာနဲ့ ပေါင် ၃၀၀ ဗုံးတွေနဲ့ ၂ ကြိမ် လာရောက်ဗုံးကြဲခဲ့တာဖြစ်တယ်လို့ ဆိုပါတယ်။
ဒီလို ဗုံးကြဲခံရမှုကြောင့် မန်တုံမြို့နယ် အောင်ချမ်းသာရပ်ကွက်နဲ့ မြို့မတံတားအနီးရှိ ဦးအိုက်အေး အချိုခြောက် လက်ဖက်စက်ရုံမှာ ပေါင် ၃၀၀ ဗုံး ၃ လုံး နဲ့ (၁၃၀) တပ်စခန်းကုန်းအတက်မှာ ၁ လုံး ကျရောက်ခဲ့ပြီး လက်ဖက်စက်ရုံအလုပ်သမားအမျိုးသား တယောက် ထိခိုက်ခဲ့တာလို့ ဆိုပါတယ်။
ထိခိုက်ဒဏ်ရသူမှာ အသက် ၂၁ နှစ်အရွယ် မောင်သက်နိုင်လင်းဖြစ်ပြီး ညာဘက်လက် ဗုံးစ ထိမှန်ခဲ့ကာ လက်ဖက်စက်ရုံ ၃ နေရာမှာ အမျာအပြား ထိခိုက်ပျက်စီးခဲ့တယ်လို့လည်း ထုတ်ပြန် ထားပါတယ်။
ရှမ်းပြည်မြောက်ပိုင်း တအာင်းဒေသ မန်တုံ၊ နမ့်ဆန်၊ မိုးမိတ်၊ မိုးကုတ်၊ ကျောက်မဲ၊ မိုင်းငေါ့၊ မိုင်းလုံမြို့နယ်တွေမှာ ဒုတိယအကြိမ် ၁၀၂၇ စစ်ဆင်ရေး စတင်ဖြစ်ပွားချိန်ကစပြီး ဒီကနေ့အထိ ဖုန်းလိုင်းနဲ့ အင်တာနက်လိုင်းတွေ ဖြတ်တောက်ထားခံထားရပါတယ်။
