(က)
“အညာ ပြည်သူ့ကာကွယ်ရေးတပ်က PDF လူငယ်အချို့ သူတို့အိမ်တံခါးတွေကို သူတို့ကိုယ်တိုင် ပြန်ဖွင့်ပြီးဝင်နိုင်တာ တွေ့ရတော့ စိတ်ထဲ ကြည်နူးမိတယ်ကွာ။”
“အေးကွ မူးသာရ . . . ကြင်စိုး သာဝ မအလကြီးကြောင့် အိုးတွေအိမ်တွေပစ်ပြီး နွေဦးတော်လှန်ရေး ခရီးကြမ်းလမ်းမကြီးပေါ်ကို ရဲရဲဝံ့ဝံ့ စွန့်စွန့်စားစား လျှောက်လှမ်းခဲ့ကြသူတွေထဲက တချို့တော့ အိမ်ကို ပြန်ရောက်လာကြပြီပေါ့။”
၂၀၂၁ ခုနှစ် ဖေဖော်ဝါရီ ၁ ရက်နေ့မှာ တိုင်းပြည်နဲ့လူထုကို ချောက်ထဲကန်ချခဲ့တဲ့ မအလကြီးဟာ အခုလို ၃ နှစ်ကျာ်ကာလမှာ မျက်ကလဲဆန်ပျာ အရူးမီးဝိုင်းဖြစ်နေပြီး ‘စစ်ရှုံးကောင်စီ’ ရဲ့ တိုက်တိုင်းရှုံး၊ လွှတ်တိုင်းပြေး၊ တက်တိုင်းသေ ဖက်ဆစ်တပ်ကြီးရဲ့ ‘တပ်ပြုတ်ကြီး’ ဖြစ်နေပြီလို့ အရွှင်အဘတွေက ဆိုကြပါသဗျ။
“မအလတို့ သူ့ရဲ့ခိုင်းဖတ် နောက်တော်ပါ ကျွန်ယုံ မုသာဝါဒသတင်းမှား ဖြန့်ချိရေးတာဝန်ခံ ဇော်မဲလုံးတို့ဟာ GZ တဖြစ်လဲ PDF တွေကို အထင်သေး အမြင်သေးနဲ့ နင်ပဲငဆ သရော်တော်တော် ပြောခဲ့တာ မှတ်မိလား စိမ်းမောင်။”
“အေး . . . အဲ . . . ငါ မသိဘူး။”
“မင်းတို့ပဲ မြဝတီက ဇော်မဲလိမ်ရဲ့ သတင်းစာရှင်းလင်းပွဲတွေကို အားရပါးရ ထိုင်ထိုင်ကြည့်ခဲ့ပြီး ငါတို့ကို မြိန်ရေရှက်ရေ ပြန်ပြန် ဖောက်သည်ချခဲ့တာလေကွာ။”
“အဲ . . . ငါ . . . ငါ . . မေ့နေပြီ။”
“ဟား ဟား ဟား ဟား ဟား ဟား။”
ဟိုစဉ်က TV မှနေ၍ မဲလုံးက ပလုပ်ပလောင်း ဗလုံးဗထွေး ရိသဲ့သဲ့ဖြင့် PDF တွေကို မှိုချိုးမျှစ်ချိုး အတော်ပြောခဲ့ပါ၏။
“စတင်းန်ဒတ်အာမီကို လာမယှဉ်နဲ့၊ သေရဲတဲ့ကောင် ထွက်ခဲ့” ဘာညာ စိန်ခါ်ခဲ့တာ မြန်မာသိ ကမ္ဘာသိကိုးခင်ဗျ။
“အခုတော့ PDF တွေက ဖက်ဆစ်တပ်တွေရဲ့ ခြံစည်းရိုးရှေ့ကနေ တပ်ထဲကိုလှမ်းကြည့်ပြီး “သေရဲတဲ့ကောင် ထွက်ခဲ့” လို့ ပြန်အော်နေကြပြီ။”
“ဟုတ်တယ် လုံးတုံး၊ အခုတော့ မအလတပ်ပြုန်းကိုယ်တော်ကြီးမှာ ‘ဖက်ဆစ်တပ်သား’ အင်အားမရှိတော့သလောက် ဖြစ်နေပြီဖြစ်လို့ အခုဆိုရင် နေ့ခင်းကြောင်တောင်တောင် လမ်းပေါ်ဖြတ်သမျှ လူငယ်လူကြီးမချန် အတင်းအကျပ် ဖမ်းခေါ်ပြီး စစ်သင်တန်းကျောင်းကို ပို့နေရပြီလေ။”
“ခုဆိုရင် ငါတို့ရွာတွေနဲ့ တောမြို့လေးပေါ်ကို သွားတဲ့လမ်းမှာ လူမရှိဘဲ ခြောက်သွေ့သွားပြီ မဟုတ်လား စိမ်းမောင်ရ။”
“အေး . . . အဲ . . .။”
“ခုနက မူးသာပြောတဲ့ တော်လှန်ရေးတပ်သား လူငယ်အချို့ ကိုယ့်မြို့ကိုယ့်ရွာက ကိုယ့်အိမ်ကို ကိုယ်ကိုယ်တိုင် တံခါးဖွင့်ပြီး ဝင်နိုင်ခဲ့လို့ ဝမ်းသာပေမဲ့ တချို့လည်း ဖက်ဆစ်တော်လှန်ရေး အဆုံးသတ်တိုက်ပွဲအတွင်း မြင့်မြတ်စွာ အသက်ပေးလှူသွားခဲ့ကြလို့ အိမ်ပြန်မလာနိုင်ကြတော့ဘူး။”
" အေး ကွာ . . .”
“အဲဒါတွေကို တွေးမိတော့ ‘အိမ်အပြန်' ဆိုတဲ့ ကဗျာလေးကို သတိရမိတယ်ကွာ။”
‘သရက်သီး (ရေနံချောင်း)’ ကလောင်ရှင်ရေးတဲ့ ထိုကဗျာလေးကို ရွတ်ပြပါဟု တောင်းဆိုတော့ အဘလုံးတုံးက ရွတ်ပြပါ၏။
“အိမ်ရှေ့ရောက်တော့ တံခါးက ဖွင့်မရ။”
“အမေလို့ အော်ခေါ်တော့ တုံ့ပြန်ထူးသံ မကြားရ။”
“မထူးဘူးဆိုပြီး ခဲနဲ့ အိမ်ခေါင်မိုးကို ပေါက်လိုက်တော့ ဓာတ်မီးတဝင်းဝင်းနဲ့ အမေထွက်လာတယ်။”
“ကျနော့်ကိုကြည့်ပြီးတော့ ‘ငါ့သားရေ အမျှ အမျှ အမျှ’ တဲ့။”
ကဗျာရွတ်တာ ပြီးဆုံးသွားသည့်အခါ ကျနော်တို့စကားဝိုင်းမှာ ခေတ္တခဏ တိတ်ဆိတ်သွားပါလေ၏။
(ခ)
စကားဝိုင်းမှာ တိတ်ဆိတ်သွားပြီး အတွေးများကိုယ်စီနှင့်။ ခဏနေတော့မှ စကားပြန်ဆက်ကြပါ၏။ ပင်တိုင်ဇာတ်ကောင်ကား မြန်မာ့သမိုင်းမှာ အယုတ်တကာ့ထိပ်ခေါင် မအလမောင်မောင်ပဲ ဖြစ်ပါသဗျ။
“ဘာပဲဖြစ်ဖြစ် မင်းတို့ငါတို့တွေဟာ ဘုရင်ရူး ပလ္လင်ရူး သမ္မတရူး ကြင်စိုး သာဝ မအလကြီးရဲ့ နောက်ဆုံးဇာတ်သိမ်းခန်းကို ပျော်ပျော်ကြီး မြင်ခွင့်ရကြမယ့်သူတွေကွ။”
“ဟုတ်သကွ၊ ကျန်းမာရေးလည်း ဂရုစိုက်ကြ၊ တတ်နိုင်တဲ့ဘက်ကနေလည်း မပြတ်တမ်း ထောက်ပို့ကြ၊ ဒါမှ မအလရဲ့ မရှုမလှနိဂုံးကို အားရပါးရ ကြည့်ရှုခံစားကြရမှာကွ စိမ်းမောင်ရ။”
“အေး . . . အဲ . . .။”
“ဝါး . . ဟားဟား ဟားဟား ဟားဟား။”
“ဒါပေမဲ့လည်း မအလကြီးဟာ ခံစစ်ကို သေချာပုံဖော်နေပုံရတယ်ကွ။”
“သူ့မှာ နောက်လိုက်နောက်ပါ အသေခံတပ်သားတွေကော ရှိသေးလို့လားဟ။”
“မရှိရှိ ရှိရှိ လူရှိန်အောင်တော့ ဒီကောင်ကြီး ကြံနေတယ်ကွ။”
“ဘယ်လို ကြံနေတာတုန်းဟ။”
“နိုင်ငံတော်သမ္မတကြီး မအလက နိုင်ငံတော်ဝန်ကြီးချုပ် မအလအား အသိမ်းခံမြို့များ အမြန်ပြန်လည်ထိန်းချုပ်နိုင်ရေး ပြောဆိုရာ နိုင်ငံတော်ဝန်ကြီးချုပ် မအလက စကစဥက္ကဋ္ဌ မအလအား အမြန်ဆုံးဆောင်ရွက်နိုင်ရန် ပြောဆိုပြီးနောက် စကစဥက္ကဋ္ဌကြီး မအလက တပ်မတော်ကာကွယ်ရေးဦးစီးချုပ် ချိုကုတ်ဒူးကြီး မအလအား မြန်ဆန်စွာဆောင်ရွက် အကောင်အထည်ဖော်ရန် ညွှန်ကြားလိုက်ပြီတဲ့။”
“ဝါး . . ဟားဟား ဟားဟား ဟားဟား။”
ပေါ့ပေါ့ပါးပါး တဟားဟား ထရယ်မိကြလေရာ အဘစိမ်းမောင်ပါ အမှတ်မထင် ပါလာပါလေ၏ ခင်ဗျာ။
“ဟဲ့ကောင် စိမ်းမောင် . . . မင်းက ဘာဖြစ်လို့ ငါတို့နဲ့ရောပြီး လိုက်ရယ်တာလဲ။”
“အဲ . . . ဟဲ ဟဲ . . ဟို . . . ဒီလိုကွာ။”
“ဟား ဟား ဟား ဟား ဟား ဟား။”
ဘာပဲဖြစ်ဖြစ် အစွန်းရောက် စိမ်းသရဖူစိမ်းတွေပါ ရယ်တတ်လာတာကား ဝမ်းသာစရာပါ ခင်ဗျ။
(ဂ)
သို့ဖြင့် စကားဝိုင်းကို ဆက်ကြလေရာ စစ်ရှုံးကောင်စီဥက္ကဋ္ဌ မအလကြီးဟာ သူရဲဘောကြောင်သူ ဖြစ်သည့်အတွက် နောက်ဆုံးအချိန် အခြေအနေမလှရင် တော်လှန်ရေးတပ်တွေ PDF တွေရဲ့ လက်ထဲကို အမိခံမှာတော့မဟုတ်ဘဲ ‘ထွက်ပြေးမည့်သူ’ ဟု ဆိုကြပါ၏။
“ဘယ်ကို ထွက်ပြေးမှာလဲ မူးသာရ။”
“အရင်ကတော့ ‘တရုတ်’ တို့၊ ‘ရုရှား’ တို့ကိုပြေးမယ်လို့ ခန့်မှန်းခဲ့ကြတာပဲ။”
“အေး . . . ခုနောက်ပိုင်း ကိုပေါက်ဖော်နဲ့ ကိုပူတင်းတို့ကလည်း အင်တင်တင် လုပ်လာတော့ ‘ဒူဘိုင်း’ တို့ ဘာတို့ဆီ ပြေးမယ်လည်း ကြားရတယ်။”
“အေးပေါ့ကွာ . . . ဒီကောင်တွေဟာ တိုင်းပြည်ရဲ့ဘဏ္ဍာတွေကို ခိုး ဆိုး လုနှိုက်ပြီး နိုင်ငံတကာမှာ သူတို့နေဖို့ထိုင်ဖို့ဝယ်ထားတဲ့ အဖိုးတန်အိမ်ရာတွေဟာ နည်းသလားဟ။”
“ထိုင်းတို့ စင်ကာပူတို့မှာတော့ ပြောမနေနဲ့၊ ဒီကောင်တွေဝယ်ထားတဲ့ နေရာကောင်းတွေမှ အများကြီး။”
“ဒါပေမဲ့လို့ အခုနောက်ပိုင်း ခန့်မှန်းကြတာက မအလနဲ့ လက်တဆုပ်စာ လူယုတ်မာတွေ ‘ပြေး’ မယ့်နိုင်ငံဟာ ငါတို့ထင်ထားတာတွေထဲက တခုမှမဟုတ်ဘူးဟ။”
“ဟေ . . . ဟုတ်လား၊ ဘယ်နိုင်ငံလဲ။”
ကြင်စိုး သာဝ မအလကြီး ပြေးမယ့်နိုင်ငံဟာ ကမ္ဘာကျော်ဘောလုံးသမားတွေထွက်တဲ့ ‘ဘရာဇီး’ နဲ့ ‘ပေါ်တူဂီ’ တို့ ဖြစ်ပါသတဲ့ ခင်ဗျ။
“အဲ . . . အဟုတ်လားဟ။”
“ကမ္ဘာ့ပလိပ်အဖွဲ့ကြီးက မအလကို အမြဲမပြတ် ခြေရာခံပြီး စောင့်ကြည့်နေတာပဲကွာ၊ ဘရာဇီးနဲ့ ပေါ်တူဂီကို ပြေးနိုင်တယ်လို့လည်း ကောက်ချက်ဆွဲကြသကွ။”
“ဒါဆိုရင်တော့ အတိတ်ကောင်း နိမိတ်ကောင်းပဲဟ။”
“ဒီမအလတွေ ဝိုင်းပြီး ‘အကန်ခံ’ ရလိမ့်ဦးမယ်ဆိုတဲ့ သဘောလား။”
“ဝါး . . ဟားဟား ဟားဟား ဟားဟား။”
အခုတော့ တိုင်းပြည်နှင့် လူထုအပေါ် ရာဇဝင် စာတင်လောက်အောင် ရက်စက်ယုတ်မာ ရမ်းကားနေဆဲ ကြင်စိုး သာဝ မအလကြီးကို တပြည်လုံးက ဝိုင်း၍ကန်နေကြလေရာ ဖွတ်ဖွတ်ညက်ညက် ကြေနေပြီဖြစ်၏။
မအလကား ထွက်ခတ် ခတ်နေပြီ ဖြစ်ပါ၏။ လူငယ်တွေကို အတင်းအဓမ္မ စစ်မှုထမ်းဖို့ ဆွဲခေါ်နေရာကနေ ယခုဆိုလျှင် အသက် ၆၅ နှစ်အထိ စစ်သင်တန်းတွေ မတက်မနေရ ဆွဲသွင်းနေပြီ ဖြစ်ပါ၏။
“ဘာပဲဖြစ်ဖြစ် မအလကြီးဟာ များမကြာခင် ကျဆုံးတော့မှာ ကျိန်းသေနေပြီကွ။”
“‘ကိုယ်ပြုတဲ့ကံ ကိုယ့်ထံပြန်’ ဆိုတာ လောကဓမ္မတာပဲကွ၊ ကဗျာဆရာ မင်းထင်ကိုကိုကြီးရဲ့ ‘အကျိုး’ ဆိုတဲ့ ကဗျာလေးလိုပေါ့ကွာ”
“ရွတ်ပြပါဦး မူးသာရာ။”
အဘစောမူးသာက ကဗျာကလေးကို သေသေသပ်သပ် ရွတ်ပြပါလေ၏ ခင်ဗျာ။
“ပြည့်ဝမ်းကိုလည်း ဖောက်သော
ပြည့်ဦးကင်းကိုလည်း နှိမ်သော
ပြည့်တံခွန်ကိုလည်း လှဲသော
ပြည့်မျက်စိကိုလည်း ထုတ်သော
ပြည့်အစွယ်ကိုလည်း ချိုးသော
ပြည့်မျက်နှာကိုလည်း ဖျက်သော
ပြည့်ခြေ ပြည့်လက်ကိုလည်း ဖြတ်သော
ဟယ် . . . အကြင်သူယုတ်။”
“သင်ပြုသမျှကံကား
သင့်ထံ ပြန်လာနေချေပြီ။”
“အသင့်ပြင်ထားလော့။”
ဖေကြီး(လေရှီး)
