ပဲခူးတိုင်း၊ တောင်ငူမြို့နယ်ရှိ စစ်ကောင်စီတပ်ရဲ့ တောင်ငူလေတပ်စခန်းကို ၁၀၇ မမ ရှော့တိုက်ဒုံး တွေနဲ့ ပစ်ခတ်တိုက်ခိုက်ခဲ့တယ်လို့ Brave Warriors For Myanmar (BWM) အဖွဲ့က ဩဂုတ် ၂၁ ရက်မှာ ထုတ်ပြန်ပါတယ်။
ဩဂုတ် ၂၀ ရက် ည ၁၁ နာရီ ၅၆ မိနစ်မှာ ၁၀၇ မမ ရှော့တိုက်ဒုံး ၇ လုံးပစ်ခတ်ခဲ့တာဖြစ်ပြီး ပစ်မှတ်သို့ ၄ လုံး ထိမှန်ခဲ့ကြောင်း ထုတ်ပြန်ပေမဲ့ ထိခိုက်ပျက်စီးမှု အသေးစိတ် အတိအကျကို ဆက်လက်စုံစမ်းနေဆဲလို့ ဆိုပါတယ်။
အဆိုပါတိုက်ခိုက်မှုကို Brave Warriors for Myanmar (BWM) အဖွဲ့ရဲ့ ဦးဆောင်စီမံမှုနဲ့ Mountain Knights Civilian Defense Force (MKCDF) ဟာ သံတောင်မြောက်ပိုင်းအထူးဒေသအဖွဲ့၊ စစ်ဒေသ ၃၁ ပါတီရဲဘော်များအဖွဲ့ ၊ Mercury Revolution Force (MRF) အဖွဲ့တို့နဲ့ ပူးပေါင်း ဆောင်ရွက်ခဲ့တာ ဖြစ်ပါတယ်။
မန္တလေးတိုင်း၊ တံတားဦးမြို့နယ်ရှိ စစ်ကောင်စီတပ်ရဲ့ တံတားဦး လေကြောင်းရန်ကာကွယ်ရေး တပ်စခန်းကိုလည်း သြဂုတ် ၂၀ ရက် ညနေ ၃ နာရီ၀န်းကျင်မှာ သိမ်းပိုက်ရရှိခဲ့တယ်လို့ Natogyi People Defense Force ဆီကနေ သိရပါတယ်။
