ချန်ပီယံရှစ်ကလပ် ဘန်လေအသင်းဟာ ဘရာဇီးဂန္ထဝင် ရော်နယ်ဒင်ညိုရဲ့ သားဖြစ်သူ ယိုအာ မန်ဒက်စ်ကို ၂ နှစ်စာချုပ်နဲ့ ခေါ်ယူလိုက်ပါတယ်။
အသက် ၁၉ နှစ်ရှိ ဘယ်သန်တိုက်စစ်ကစားသမား မန်ဒက်စ်ဟာ ဘာစီလိုနာ လူငယ်အသင်းကနေ ဘန်လေအသင်းဆီ ပြောင်းရွှေ့လာခဲ့တာပါ။
ဖခင်ဖြစ်သူရဲ့ အောင်မြင်ကျော်ကြားမှုကြောင့် နာမည်ကြီးနေပေမဲ့လည်း လူငယ်ကစားသမားတဦးအပေါ် ဖိအားတွေ ကျရောက်မှာကို မလိုလားကြောင်း ဘန်လေနည်းပြ စကော့ပါကားက ပြောပါတယ်။
ဒါ့အပြင် မန်ဒက်စ်ဟာ တိုးတက်နေဆဲ ကစားသမားတဦးသာ ဖြစ်တာကြောင့် ပုံမှန်ပွဲထွက်ခွင့်ရဖို့ ဆက်လက်ကြိုးပမ်းရဦးမယ်လို့လည်း နည်းပြ စကော့ပါကားက ပြောပါတယ်။
မန်ဒက်စ်ဟာ ဘရာဇီးကလပ်တွေဖြစ်တဲ့ ဖလာမင်ဂို၊ ဗက်စ်ကိုဒဂါးမား၊ ခရူဇီယို အစရှိတဲ့ ကလပ်တွေမှာ လူငယ်ကစားသမားဘဝ ဖြတ်သန်းခဲ့ပါတယ်။ ၂၀၂၃ ခုက ဘာစီလိုနာမှာ ခြေစွမ်းစမ်းသပ်မှု ခံယူခဲ့ပြီးနောက် လူငယ်အသင်းမှာ ၁ နှစ်ကြာ ကစားခဲ့တာဖြစ်ပါတယ်။
Photo-Reuters
