ထိုင်းနိုင်ငံအလယ်ပိုင်း အယုဒ္ဓယခရိုင်၊ ဘန်ထိုင်းမြို့ရှိ ပုဂ္ဂလိကသင်္ဘောကျင်းလုပ်ငန်းတခုမှာ ပြီးခဲ့တဲ့ ရက်ပိုင်းက ပေါက်ကွဲမှုဖြစ်ပြီး မြန်မာလုပ်သား ၂ ဦး သေဆုံးပြီး ၇ ဦး ဒဏ်ရာရခဲ့တယ်လို့ Top News ထိုင်းသတင်းမှာ ဖော်ပြပါတယ်။
ဩဂုတ် ၅ ရက် မွန်းလွဲ ၂ နာရီကျော်လောက်က ဘန်ထိုင်းမြို့၊ ဆနမ်ချိုင်းအုပ်စုရှိ ချတ်ချွန်းထန်း ရုန့်ဆဝဒီသင်္ဘောကျင်းမှာ ပေါက်ကွဲမှုဖြစ်ကြောင်း အကြောင်းကြားချက်ရတဲ့အတွက် လူနာတင်ကား ကယ်ဆယ်ရေးအဖွဲ့တွေနဲ့အတူ သွားရောက်ကယ်ဆယ်ခဲ့တယ်လို့ ဘန် ထိုင်းနယ်မြေ ရဲစခန်း တာဝန်ရှိသူက ပြောပါတယ်။
“အခင်းဖြစ်တဲ့နေရာမှာ အသက် ၂၀ မှ ၂၅ ကြားရှိ လူရွယ် ၂ ဦး ပွဲချင်းပြီး သေဆုံးပြီး ၇ ဦး ထိခိုက် ဒဏ်ရာ ရခဲ့တယ်။ ၁ ဦးမှာ ဒဏ်ရာပြင်းထန်တယ်။ သေဆုံးဒဏ်ရာရသူတွေကို အယုဒ္ဓယခရိုင် ပြည်သူ့ဆေးရုံကြီးကို ပို့ဆောင်ပေးခဲ့တယ်၊ အဆိုပါပေါက်ကွဲမှုမှာ ခွေး ၂ ကောင်ပါ သေဆုံးတယ်”လို့ ဆိုပါတယ်။
ဘန်ထိုင်းမြို့နယ်အုပ်ချုပ်ရေးမှူး နိုင်းဆုမ်ယုဒ် ကေဆုဝမ်းက “သေဆုံးသူ ၂ ဦး နဲ့ ဒဏ်ရာရသူ ၇ ဦး တို့ဟာ မြန်မာရွှေ့ပြောင်းအလုပ်သမားတွေဖြစ်တယ်၊ သူတို့ဟာ သင်္ဘောနံရံ အစိပ်အပိုင်းတခုကို ဆေးသုတ်နေတာ၊ ခန့်မှန်းချက်အရ အခင်းဖြစ်တဲ့နေရာမှာ တစုံတယောက်ဟာ ဆေးလိပ်တိုကို စည်းကမ်းမဲ့ ပစ်ချလိုက်လို့ ဆေးလိပ်မီးပွားတွဟာ သင်္ဘောဆေးထဲပါတဲ့ တင်ဒါတွေနဲ့ ဓာတ်ပြုပြီး ပေါက်ကွဲတာလို့ ယူဆတယ်၊ ဒါပေမဲ့ အသေးစိတ်ကို ဆက်လက်စုံစမ်းစစ်ဆေးရဦးမယ်”လို့ ပြောသွားပါတယ်။
အဆိုပါသင်္ဘာကျင်းမှာ ၂၀၁၆ ခု ဇူလိုင် ၁ ရက်ကလည်း ပေါက်ကွဲမှုတကြိမ် ဖြစ်ပွားခဲ့ဖူးပြီး ထိုစဉ်က လူ ၄ ဦး သေဆုံးခဲ့တယ်လို့ သတင်းမှာ ဖော်ပြပါတယ်။
Source: topnews
