မွန်ပြည်နယ်၊ ဘီးလင်းမြို့နယ်မှာ ဇူလိုင် ၂၇ ရက် မနက် ၉ နာရီက မိုးသည်းထန်စွာ ရွာသွန်းတာကြောင့် ကုက္ကိုလ်ပင် လဲကျပြီး နေအိမ် ၃ လုံး ပျက်စီးခဲ့တယ်လို့ ကူညီပေးတဲ့သူတွေက ပြောပါတယ်။
မိုးသည်းထန်စွာ ရွာသွန်းတာကြောင့် ဘီးလင်းမြို့၊ ဆရာစံရပ်ကွက်၊ ပြည်သာယာလမ်း ဗိုလ်တဲဝင်းရှိ လုံးပတ် ၁၀ ပေ၊ အရှည်ပေ ၂၀ ရှိတဲ့ ကုက္ကိုလ်ပင်တပင် လဲကျခဲ့ပါတယ်။
သစ်ပင်လဲကျမှုကြောင့် လမ်းတဘက်ရှိ သုံးပင်နှစ်ခန်းတွဲနေအိမ် ၂ လုံး၊ သုံးပင်လေးခန်းတွဲ နေအိမ်တလုံး နဲ့ အုတ်တံတိုင်း ၄ ပေခန့် ပျက်စီးခဲ့ပါတယ်။
ကူညီပေးခဲ့တဲ့သူတဦးက “မိုးအရမ်းရွာလို့ မြေနူးပြီး ပင်စည်အမြစ်ကနေ ကျွတ်ထွက်ပြီး သစ်ပင် ပြိုလဲသွားခဲ့တာပါ။ သစ်ပင်အကိုင်းတွေက လမ်းတဘက်ရှိ နေအိမ်တွေကို ကျသွားပြီး အိမ်ထိခိုက်သွားတာ၊ လူထိခိုက်မှုတွေတော့ မရှိပါဘူး။ မိုးကမရပ်သေးသလို ရေက ထင်သလောက် မကျသေးတော့ ကယ်ဆယ်မှုတွေ လုပ်နေရတုန်းပါပဲ” လို့ ပြောပါတယ်။
ကုက္ကုလ်ပင်လဲကြမှုကြောင့် နေအိမ် ၃ လုံးနဲ့ ခြံစည်းရိုးအုတ်တံတိုင်းတို့ ပျက်စီးမှုအတွက် တသိန်းကျော် ရှိတယ်လို့ မီးသတ်တပ်ဖွဲ့ဝင်တွေက ပြောပါတယ်။
ဘီးလင်းမြို့မှာ ဇူလိုင် ၂၄ ရက်ကပြီး မိုးသည်းထန်စွာရွာသွန်းမှုကြောင့် မြစ်ရေမြင့်တက်ပြီး ဘီးလင်းမြို့ပေါရပ်ကွက် ၅ ရပ်ကွက်ရှိ အိမ်ခြေ ၃၀၀ ကျော်မှ လူ ၁၀၀၀ ရေလေးဒုက္ခခံစားခဲ့ရသလို ရန်ကုန်-မော်လမြိုင်ကားလမ်းမှာ ရေကျော်နေတဲ့အတွက် ကားကြီး၊ကားသေးများ အလှည့်ကျဖြတ်သန်းနေရပါတယ်။
ရေဘေးဒုက္ခသည် ၁၀၀၀ ကျော်ဟာ ဘုန်းကြီးကျောင်းတွေ၊ စာသင်ကျောင်းတွေနဲ့ အားကစားခန်းမတွေမှာ နေထိုင်ရပြီး အစားအသောက်နဲ့ ဆေးဝါးလိုအပ်ချက်တွေရှိနေတယ်လို့ ပရဟိသမားတဦးက ပြောပါတယ်။
