မွန်ပြည်နယ်၊ သံဖြူဇရပ်မြို့နယ်မှာ လေပြင်းတိုက်ခတ်တာကြောင့် နေအိမ် ၁၅၀ လောက်ပျက်စီးပြီး လူ ၃ ဦးလည်း ထိခိုက်ဒဏ်ရာရရှိခဲ့တယ်လို့ ဒေသခံတွေက ပြောပါတယ်။
သံဖြူဇရပ်မြို့၊ အနင်းကျေးရွာမှာ ဇူလိုင် ၂၆ ရက် မွန်းလွဲ ၂ နာရီခွဲကျော်က မိုးသည်းထန်စွာ ရွာသွန်းပြီး လေပြင်းတိုက်ခိုက်တာကြောင့် နေအိမ်အလုံး ၁၅၀ လောက် ပျက်စီးခဲ့ပြီး ဓာတ်တိုင်၊ သစ်ပင်တွေ လဲကျခဲ့သလို လူ ၃ ဦးလည်းထိခိုက်ဒဏ်ရာရရှိခဲ့ပါတယ်။
အနန်းရွာခံတဦးက “မိုးတွေရွာပြီး လေပြင်းက အကုန်ဝင်မွှေသွားတာ။ အိမ် ၁၀ လုံးက လုံးဝပျက်စီးသွားတယ်။ အိမ်အလုံး ၁၃၀ ကျော် ၁၄၀ လောက်က အမိုးတွေကွာတာတို့ တခြား ထိခိုက်ပျက်စီးမှုတွေ ရှိတယ်။ လေပြင်းရော လေဆင်နှာမောင်းရော တိုက်တာ။ သစ်ပင်တွေရော ဓာတ်တိုင်တွေပါ လဲကျသွားတယ်။ သစ်ကိုင်းတွေနဲ့ ထိမိပြီး လူ ၃ ယောက် ထိခိုက်ဒဏ်ရာရတယ်” လို့ ပြောပါတယ်။
လေပြင်းတိုက်ခိုက်မှုကြောင့် ထိခိုက်ဒဏ်ရာရသွားတဲ့သူ ၃ ဦးကို ဒေသခံ လူမှုကူညီရေးအဖွဲ့အစည်းတခုက သံဖြူဇရပ်ပြည်သူ့ဆေးရုံကြီးဆီကို ပို့ဆောင်ခဲ့ပါတယ်။
မွန်ပြည်နယ်အတွင်းမှာ ဇူလိုင် ၂၀ ရက်ကစပြီး နေ့စဉ် မိုးသည်းထန်စွာ ရွာသွန်းနေတာကြောင့် မြစ်ရေတွေတက်ပြီး ပြည်နယ်တခုလုံးနီးပါး ရေကြီးရေလျှံနေသလို မြေပြိုတာတွေ၊ နေအိမ် ထိခိုက်ပျက်စီးဆုံးရှုံးတာတွေလည်း ရှိနေပါတယ်။
