ထိုင်းနိုင်ငံအလယ်ပိုင်း၊ ဆလာပူရီခရိုင်ထဲမှာ တရားမဝင် ဝင်ရောက်လာတဲ့ မြန်မာနိုင်ငံသား အယောက် ၂၀ ကို ထိုင်းပွဲစား ၃ ဦးနဲ့အတူ ဖမ်းဆီးရမိတယ်လို့ ဆယမ်ရတ် ထိုင်းသတင်းမှာ ဖော် ပြပါတယ်။
ဇူလိုင် ၂၅ ရက် က တာ့ခ်ခရိုင် မဲဆောက်မြို့နယ်ဘက်ကနေ တရားမဝင် အလုပ်သမားတွေ တင်ဆောင်တဲ့ကား ၂ စီး ထိုင်းနိုင်ငံအတွင်းပိုင်းဘက် ဝင်ရောက်သွားကြောင်း သတင်းရလို့ အဝေးပြေးလမ်းရဲတပ်ဖွဲ့ဝင်တွေဟာ ဖဟွန်ယိုးထင်းလမ်းမကြီးပေါ်မှာ စောင့်ကြပ်စစ်ဆေးနေခဲ့တယ်လို့ နယ်မြေခံ ရဲတပ်ဖွဲ့တာဝန်ရှိသူက ပြောပါတယ်။
အဲဒီနောက် ဆလာပူရီခရိုင်၊ ချလိုမ်ဖရကစ်မြို့နယ်၊ ဟွေ့ပုန်ရပ်ကွက်အပိုင်းထဲကို ဝင် ရောက်လာတဲ့ အနက်ရောင် ဖို့ဒ်မော်တော်ကား ၁ စီး နဲ့ ငွေရောင်တိုယိုတာ ဟိုင်းလပ်ကား ၁ စီး ပေါ်ကနေ တရားမဝင် မြန်မာအမျိုးသား ၁၅ ဦး ၊ အမျိုးသမီး ၅ ဦး တို့ကို ဖမ်းမိခဲ့တယ်၊ ဒါအပြင် သူတို့ကိုတင်ဆောင်လာတဲ့ ထိုင်းယာဉ်မောင်း ၂ ဦးနဲ့ အဖော် ၁ ဦး ပေါင်း ၃ ဦးတို့ပါ အဖမ်းခံရတယ်လို့ ဆိုပါတယ်။
အဆိုပါမြန်မာနိုင်ငံသားတွေဟာ မြန်မာပြည်ကနေ ဘန်ကောက်မှာအလုပ်သွားလုပ်ဖို့ ပွဲစားကို တယောက် ဘတ် ၁၅၀၀၀ မှ ၂၀၀၀၀ ထိ ပေးခဲ့ရတယ်၊ ကားသမားကတော့ သူတို့ကို ၁ ဦးလျှင် ဘတ် ၅၀၀ နှုန်းနဲ့ မဲဆောက်ကနေ ဘန်ကောက်ထိပို့ပေးဖို့ ပွဲစားက ဆက်သွယ်တာကြောင့် တင်ဆောင်လာတာလို့ ပြောပါတယ်။
တာဝန်ရှိသူတွေက ထိုင်း ၃ ဦးကို တရားမဝင်နိုင်ငံခြားသားတင်ဆောင်မှု၊ သူတို့အ ဖမ်းမခံရအောင် ကူညီအားပေးမှုတွေနဲ့ အရေးယူသွားမှာဖြစ်ပြီး ဖမ်းမိတဲ့မြန်မာနိုင်ငံသား အယောက် ၂၀ ကိုလည်း တရားမဝင် ဝင်ရောက်မှုနဲ့ အရေးယူပြီး ပြည်နှင်ဒဏ်ပေးမယ်လို့ တာဝန်ရှိသူက ပြောပါတယ်။
Source: Siamrath
