“ကျုပ်တို့ရန်သူဟာ ခင်ဗျားတို့ရန်သူပဲ” လို့ အစ္စရေးဝန်ကြီးချုပ် ဘင်ဂျမင် နေတန်ယာဟုက အမေရိကန် ကွန်ဂရက်လွှတ်တော်မှာ မိန့်ခွန်းပြောချိန် ထည့်ပြောသွားခဲ့ပါတယ်။

နေတန်ယာဟုဟာ လွှတ်တော်အဆောက်အအုံမှာ ၄ ကြိမ်မြောက်  ပြောကြားခွင့်ရတဲ့ မိန့်ခွန်းမှာ ဂါဇာစစ်ပွဲအတွက် ထောက်ခံမှုရရေး အဓိက တိုက်ပွဲဝင်ခဲ့တာ ဖြစ်ပေမဲ့ အဆောက်အအုံအတွင်း၊ အပြင် နှစ်ဖက်စလုံးမှာ ဆန္ဒပြမှုတွေနဲ့ ရင်ဆိုင်ခဲ့ရပါတယ်။

အီရန်နဲ့ တိုက်နေတာဟာ အမေရိကန်ပြည်ထောင်စုရဲ့ အစွန်းရောက်ဆုံးနဲ့ သတ်ဖြတ်နိုင်စွမ်းအရှိဆုံး ရန်သူတော်ကို တိုက်ပေးနေတာဖြစ်တယ်လို့ ဝန်ကြီးချုပ်က ပြောခဲ့ပါတယ်။

“ဒါကြောင့် ကျုပ်တို့တိုက်ပွဲဟာ ခင်ဗျားတို့တိုက်ပွဲ ဖြစ်သလို ကျုပ်တို့အောင်ပွဲဟာလည်း ခင်ဗျားတို့အောင်ပွဲပဲ” လို့ ဖြည့်စွက်ပြောကြားခဲ့ပါတယ်။

အစ္စရေးကို စစ်ရေးအကူအညီ ရက်ရက်ရောရော ပေးခဲ့တဲ့အတွက် အမေရိကန်ကို ကျေးဇူးတင်ကြောင်းနဲ့ လက်ရှိမှာလည်း မြန်ဆန်ချောမွေ့အောင် ဆောင်ရွက်ပေးဖို့ တောင်းဆိုခဲ့ပါတယ်။

ဒါမှသာ ဂါဇာစစ်ပွဲ မြန်မြန်အဆုံးသတ်နိုင်ပြီး ပိုကျယ်ပြန့်တဲ့ ဒေသတွင်းစစ်ပွဲ မဖြစ်လာအောင် ဟန့်တားနိုင်မှာလို့ ဆိုပါတယ်။

ဒုတိယကမ္ဘာစစ်တုန်းက ဗြိတိန်ဝန်ကြီးချုပ် ဝင်စတန်ချာချီက အမေရိကန်ပြည်သူတွေကို ပြောတဲ့ မိန့်ခွန်းကို ကိုးကားပြီး “ကျုပ်တို့ကို လက်နက်ကိရိယာတွေသာ ပေးပါ၊ အလုပ်ပြီးအောင် လုပ်ပေးပါမယ်” လို့ ပြောခဲ့ပါတယ်။

စစ်ပွဲအလွန် ဂါဇာကမ်းမြောင်ဟာ အစ္စရေးထိန်းချုပ်မှုအောက်က စစ်မဲ့၊ အစွန်းရောက်မဲ့ ဒေသ ဖြစ်ရမယ်လို့လည်း ပြောသွားပါတယ်။

ဂါဇာမှာ အစ္စရေးကိုဖျက်ဆီးဖို့ မကြိုးစားတဲ့ ပါလက်စတိုင်းတွေက ကွပ်ကဲတဲ့ အရပ်သားအစိုးရတရပ် ရှိသင့်ပြီး ဒါဟာ အများကြီးတောင်းဆိုတာ မဟုတ်ဘူးလို့ ပြောသွားပါတယ်။ ဒါပေမဲ့ နှစ်နိုင်ငံ အတူယှဉ်တွဲပေါ်ပေါက်ရေးကိုတော့ ထည့်မပြောခဲ့ပါဘူး။

နေတန်ယာဟုကို ရီပတ်ဘလီကန် နိုင်ငံရေးသမားအများစုက ကျယ်ကျယ်လောင်လောင် အားပေးခဲ့ကြပေမဲ့ ဒီမိုကရက်အမတ် ဒါဇင်နဲ့ချီပြီး မတက်ရောက်ခဲ့ပါဘူး။

တချို့ ဒီမိုကရက်အမတ်တွေကတော့ အပြင်ဘက် လမ်းပေါ်က ထောင်ချီတဲ့ ဆန္ဒပြသူတွေနဲ့ ပူးပေါင်းခဲ့ပါတယ်။ မိန့်ခွန်းပြောနေချိန်  နှောင့်ယှက်ဖို့ကြိုးစားသူ ၅ ဦး အဖမ်းခံခဲ့ရပါတယ်။

နေတန်ယာဟုကတော့ ဆန္ဒပြသူတွေဟာ အီရန်ရဲ့ တရားဝင် အသုံးဝင်တဲ့ ငပိန်းတွေ  ဖြစ်လာပြီလို့ ဝေဖန်ခဲ့ပါတယ်။

Source-Reuters