မန္တလေးတိုင်း၊ စဉ့်ကူးမြို့ကို သိမ်းပိုက်နိုင်ပြီး စဉ့်ကူးမြို့နယ်ထဲက စစ်ကောင်စီစခန်းအားလုံးကို သိမ်းပိုက်နိုင်ပြီလို့ ပြည်သူ့ကာကွယ်ရေးတပ်မတော် (မန္တလေး)ရဲ့ စစ်ဦးစီးအဖွဲ့က ဒီနေ့ ဇူလိုင် ၂၀ ရက်နေ့မှာ ထုတ်ပြန်ပါတယ်။
ဇူလိုင် ၁၇ ရက်နေ့မှာ အပြီးသတ် သိမ်းပိုက်ရရှိခဲ့တာဖြစ်ပြီး စစ်ကောင်စီကင်းစင်သွားတဲ့ စဉ့်ကူးမြို့ဟာ ပြည်သူ့ကာကွယ်ရေးတပ်မတော် (မန္တလေး) က မန္တလေးတိုင်းအတွင်း ပထမဆုံးသိမ်းယူတဲ့ မြို့ဖြစ်လာတယ်လို့ ဆိုပါတယ်။
စဉ့်ကူးစစ်ဆင်ရေးကနေ သုံ့ပန်းအများအပြား ဖမ်းဆီးရမိခဲ့သလို လက်နက်ခဲယမ်းအများအပြားလည်း သိမ်းဆည်ရမိခဲ့ပြီး ပြည်သူ့ကာကွယ်ရေးတပ်မတော် (မန္တလေး)ဘက်ကလည်း ထိုက်သင့်တဲ့ ပေးဆပ်မှုတချို့ရှိခဲ့တယ်လို့ ထုတ်ပြန်ထားပါတယ်။
စဉ့်ကူးစစ်ဆင်ရေးတွေအတွင်း စစ်ကောင်စီက လေကြောင်းတိုက်ခိုက်တာတွေ အဆက်မပြတ် လုပ်ခဲ့သောကြောင့် မြို့နေဧရိယာတွေ၊ အရပ်သားပြည်သူနေအိမ်တွေလည်း ထိခိုက်ပျက်စီးခဲ့ရတယ်လို့ ဆိုပါတယ်။
