မန္တလေးတိုင်း၊ အမရပူရမြို့နယ်က မြို့ပြစီမံကိန်း ဆောက်လုပ်ရေးလုပ်ငန်းခွင်အတွင်း ဧရာဝတီမြစ် တာရိုးကျိုးပေါက်ရာက ပျောက်ဆုံးခဲ့သူ ၇ ဦးရဲ့ ရုပ်အလောင်းတွေကို ဇူလိုင် ၁၆ ရက် ညနေ ၅ နာရီလောက်က ပြန်လည်ရှာဖွေတွေ့ရှိခဲ့ကြောင်း ကယ်ဆယ်ရေး ဆောင်ရွက်နေသူတွေထံက သိရပါတယ်။

ပြီးခဲ့တဲ့ ဇူလိုင် ၁၄ ရက် မနက်ပိုင်းက တာရိုးကျိုးပေါက်ပြီး လုပ်ငန်းခွင်ဧရိယာ ရေလွှမ်းသွားပြီးနောက် ပျောက်ဆုံးခဲ့သူ လုပ်သား ၇ ဦးမှာ ကွန်ကရစ် ရေဆိုးထုတ် မြောင်းအတွင်း ပိတ်မိနိုင်​ကြောင်း ယူဆကာ ရှာ​​ဖွေရာမှ ရုပ်အ​လောင်း ၇ ​လောင်းကို ရှာ​ဖွေ​တွေ့ရှိခဲ့တာလို့ မန္တလေးတိုင်း လူမှုကယ်ဆယ်ရေးအဖွဲ့ တာဝန်ရှိသူတဦးက ပြောပါတယ်။

“မနေ့မနက်ပိုင်းက ရုပ်အလောင်းတလောင်းကို အရင်ဆုံး ရှာဖွေတွေ့ရှိခဲ့တာပါ။ ညနေ ၃ နာရီလောက်မှာ ၄ လောင်းကို တနေရာတည်းမှာ ထပ်တွေ့ပြီး ကျန်တဲ့အလောင်းတွေကိုတော့ တနေရာစီ တွေ့တာပါ။”

အမရပူရမြို့တောင်ဘက် ဧရာဝတီမြစ်ကမ်းနဲ့ စစ်ကိုင်းတံတားအနီးမှာ တည်ဆောက်နေတဲ့ အမရပူရ မြို့ပြဖွံ့ဖြိုးရေးစီမံကိန်း လုပ်ငန်းခွင်ထဲက ရေဆိုးထုတ်မြောင်း လုပ်ငန်းခွင်အတွင်း ဧရာဝတီမြစ်ရေ မဝင်စေဖို့ ပိတ်တားထားတဲ့ နေရာက တာရိုးကျိုးပေါက်မှုကြောင့် ရုတ်တရက် မြစ်ရေတွေ ဝင်ရောက်လာချိန် အလုပ်သမား ၇ ဦးမှာ ပိတ်မိသွားခဲ့ကြတာလို့ သိရပါတယ်။

ပြီးခဲ့တဲ့ ၂၀၁၇ ခုနှစ်ကစပြီး အမရပူရမြို့နယ်၊ မြို့ပြစီမံကိန်းကို ခရိုနီ စီးပွားရေးလုပ်ငန်းရှင် ဦးမောင်ဝိတ် ပိုင်ဆိုင်​တဲ့ Mandalay Business Capital City Development MBCCD ကုမ္ပဏီက အ​ကောင်အထည်​ဖော် ​ဆောင်ရွက်​နေတာဖြစ်​ကြောင်း ဒေသခံတွေဆီက သိရပါတယ်။