၂၀၂၄ ဒုတိယသုံးလပတ်မှာ ပို့ကုန်အားကောင်းတာကြောင့် ဗီယက်နမ် စီးပွားရေးတိုးတက်မှု အရှိန်မြင့်လာခဲ့တယ်လို့ အစိုးရထုတ်ပြန်တဲ့ စာရင်းဇယားတွေက ဖော်ပြပါတယ်။ ဒါပေမဲ့ ငွေကြေးဖောင်းပွမှု မြင့်တက်လာတာကတော့ စိန်ခေါ်မှုအဖြစ် ရှိနေဆဲ ဖြစ်ပါတယ်။

ပြည်တွင်းအသားတင်ကုန်ထုတ်လုပ်မှု (GDP) ဟာ ဒုတိယသုံးလပတ်မှာ ၆ ဒသမ ၉၃ ရာခိုင်နှုန်းအထိ တိုးလာခဲ့ပြီး ပထမသုံးလပတ်ထက် တိုးတက်မှု မြန်ဆန်ခဲ့ပါတယ်။

ဒီနှစ် နှစ်ဝက်အတွင်း စီးပွားရေးလည်း ၆ ဒသမ ၄၂ ရာခိုင်နှုန်း တိုးလာခဲ့ပါတယ်။ ပြီးခဲ့တဲ့နှစ်က ကမ္ဘာ့ဝယ်လိုအား လျော့ကျမှုနဲ့ ဓာတ်အားမလုံလောက်မှုတွေကြောင့် ဖွံ့ဖြိုးမှုမျှော်မှန်းချက် မပြည့်မီခဲ့တဲ့ ဗီယက်နမ်ဟာ ဒီနှစ်မှာတော့ စမတ်ဖုန်း၊ အီလက်ထရောနစ်နဲ့ အထည်အလိပ် တင်ပို့မှုတွေ အားကောင်းနေခြင်းနဲ့အတူ တိုးတက်မှု ၆ ကနေ ၆ ဒသမ ၅ ရာခိုင်နှုန်း ရဖို့ မျှော်လင့်ထားပါတယ်။

ဗီယက်နမ်ပို့ကုန်ဟာ ပထမနှစ်ဝက်မှာ မနှစ်ကထက် ၁၄ ဒသမ ၅ ရာခိုင်နှုန်း တက်လာခဲ့ပြီး အမေရိကန်ဒေါ်လာ ၁၉၀ ဘီလီယံအထိ ရှိခဲ့ပါတယ်။ စက်မှုကုန်ထုတ်လုပ်မှုကလည်း ၁၀ ရာခိုင်နှုန်းကျော် တိုးလာပါတယ်။

ဗီယက်နမ်အစိုးရဟာ ငွေကြေးဖောင်းပွမှုကို ဒီနှစ်မှာ ၄ ဒသမ ၅ ရာခိုင်နှုန်းထက် မပိုအောင် ထိန်းနိုင်ဖို့ ကြိုးစားနေပြီး စျေးအတက်အကျပေါ်လိုက်ပြီး ဓာတ်အား၊ ဆေးကုသမှုနဲ့ ကျန်းမာရေးဝန်ဆောင်မှု နှုန်းထားတွေကို ပြင်ဆင်သွားဖို့ ရှိနေပါတယ်။

အစိုးရဝန်ထမ်းလစာတွေ ၃၀ ရာခိုင်နှုန်း တိုးပေးလိုက်တာ၊ ပင်စင်လစာ ၁၅ ရာခိုင်နှုန်း တိုးပေးလိုက်တာကလည်း ငွေကြေးဖောင်းပွမှုအပေါ် သက်ရောက်မှုရှိနိုင်တယ်လို့ ခန့်မှန်းထားပါတယ်။

Source-Reuters