မန္တလေးတိုင်း၊ မိုးကုတ်မြို့အနောက်ပိုင်း မြို့ပေါ်ရပ်ကွက်မှာ ဇွန် ၂၇ ရက် မနက် ၈ နာရီဝန်းကျင်က စတင်ပြီး စစ်ကောင်စီတပ်နဲ့ TNLA တပ်တို့ကြား တိုက်ပွဲပြင်းထန်နေပြီး လက်နက်ကြီး နေအိမ်အပေါ်ကျတာကြောင့် နေအိမ်အချို့ မီးလောင်နေတယ်လို့ ဒေသခံတွေဆီက သိရပါတယ်။

မိုးကုတ်မြို့အနောက်ပိုင်း အေးစေတီမှာ တပ်စွဲထားတဲ့ စစ်ကောင်စီ ခလရ ၈၈ လက်အောက်ခံ လပခ၊ ခလရ ၁၄၈ တပ်စခန်းကို ဇွန် ၂၇ ရက် မနက်ပိုင်းမှာ ထိုးစစ်ဆင် တိုက်ခိုက်နေတယ်လို့ TNLA က သတင်းထုတ်ပြန်ထားပါတယ်။

မိုးကုတ်အ​နောက်ပိုင်းမှာ နေထိုင်သူတဦးက “မြို့တွင်းရပ်ကွက်မှာ တိုက်ပွဲပြင်းထန်နေပါတယ်။ လက်နက်ကြီးတွေလည်း ဆက်တိုက်ပဲ၊ ဂျက်ဖိုက်တာလည်း ရဲစခန်းနားကို လာကြဲသွားတယ်။ လက်နက်ကြီးကျလို့ အိမ်တချို့ မီးလောင်နေတယ်။ အိမ်မှာ သက်ကြီးရွယ်အိုတွေ ရှိတယ်လို့ သိထားရတယ်” လို့ ပြောပါတယ်။

မိုးကုတ်မြို့အနောက်ပိုင်းက ရဲစခန်းအနီး ​နေထိုင်သူတွေ မြို့ပြင်ကို ပြောင်းရွှေ့နေပြီး အခုလက်ရှိ မိုးကုတ်မြို့တွင်းမှာ စစ်ကောင်စီတပ်နဲ့ TNLA တပ်တွေ တိုက်ပွဲ ဆက်ဖြစ်နေပါတယ်။

တိုက်ပွဲပြင်းထန်နေတဲ့ မိုးကုတ်အနောက်ပိုင်း ကျပ်ပြင်ရပ်ကွက်၊ ကျပ်ပြင်ရဲစခန်းနားကို စစ်ကောင်စီတပ်က ဇွန် ၂၇ ရက် နေ့ခင်း ၁ နာရီကျော်မှာ ဂျက်ဖိုက်တာနဲ့ ဗုံးတလုံး ကြဲချခဲ့ပါတယ်။