ရှမ်းပြည်နယ်မြောက်ပိုင်း၊ ကျောက်မဲမြို့က စစ်ကောင်စီတပ် လက်အောက်ခံရုံး ၁၀ ရုံး၊ အမြောက်တပ်နဲ့ ပြည်သူ့ဆေးရုံတွေကို ဇွန် ၂၅ ရက် မနက်မှာ တအာင်းအမျိုးသားလွတ်မြောက်ရေးတပ် (TNLA) က သိမ်းပိုက်ရရှိထားတယ်လို့ တိုက်ပွဲပါဝင်နေသူတွေဆီက သိရပါတယ်။

ကျောက်မဲမြို့ကို TNLA နဲ့အတူ ကျောက်မဲခရိုင် အထူးတိုက်ခိုက်ရေးတပ်ဖွဲ့တွေလည်း ပါဝင်တိုက်ခိုက်နေပြီး အခုလက်ရှိအချိန်ထိ စစ်ကောင်စီတပ်ရဲ့ နောင်ပိန်ကျေးရွာစခန်း အပါအဝင် ရုံး ၁၀ ရုံးကို သိမ်းထားနိုင်ပြီလို့ ကျောက်မဲခရိုင်မှူးက ပြောပါတယ်။

“စစ်တပ်ဘက်ကတော့ လေယာဉ်နဲ့ လာပစ်တယ်၊ စစ်သားတွေ​တော့ အများကြီးသေတယ်။ ငြိမ်းချမ်းရေးကုန်းမှာလည်း စစ်သားအလောင်းတွေ များတယ်။”

ကျောက်မဲမြို့ထဲမှာ တိုက်ပွဲဆက်လက်ဖြစ်နေပြီး စစ်ကောင်စီတပ် လက်နက်ကြီးကျည် လူနေရပ်ကွက်တွေထဲ ကျတာကြောင့် အရပ်သားထိခိုက်မှုတွေ ရှိနေတယ်လို့ သိရပါတယ်။

ကျောက်မဲမြို့မှာ ဇွန် ၂၄ ရက်က စတင်ကာ စစ်ကောင်စီတပ်နဲ့ TNLA တပ်တို့ တိုက်ပွဲ ပြင်းထန်နေတာဖြစ်ပြီး တိုက်ပွဲကာလအတွင်း လက်နက်ကြီး ကျရောက်ပေါက်ကွဲတာကြောင့် အရပ်သား ၆ ဦး သေဆုံးထားပါတယ်။