မလေးရှားနိုင်ငံ၊ ဆာရာဘန်းမြို့က ချင်းဒုက္ခသည်ကလေးတွေအတွက် ဖွင့်လှစ်ထားတဲ့ စာသင်ကျောင်းကို မလေးရှားအာဏာပိုင်အဖွဲ့က ဝင်ရောက်ဖမ်းဆီးခဲ့တယ်လို မလေးရှားရောက် မြန်မာနိုင်ငံသားများအရေး အကူအညီပေးနေသူတွေဆီက သိရပါတယ်။
ဇွန် ၁၃ ရက်နေ့ မလေးစံတော်ချိန် မနက် ၁၀ နာရီမှာ ဆာရာဘန်းမြို့၊ လိုပတ်ရပ်ကွက်မှာရှိတဲ့ ချင်းဒုက္ခသည် MCA ကျောင်းကို မလေးရှားအာဏာပိုင် လဝကနဲ့ ရဲတွေက ဝင်ရောက်စီးနင်းခဲ့တာပါ။
ဝင်ရောက်စီးနင်းမှုအတွင်း ဆရာ၊ ဆရာမ ၃ ယောက်၊ ကျောင်းဝန်ထမ်းအမျိုးသမီးနဲ့ သူ့ကလေးတို့ကို ဖမ်းဆီးသွားပြီး ဝန်ထမ်းသားအမိကိုတော့ ဇွန် ၁၄ ရက်နေ့မှာ ပြန်လွှတ်ပေးလိုက်တယ်လို သိရပါတယ်။
ချင်းဒုက္ခသည်မဟာမိတ်အဖွဲ့ ACR တာဝန်ရှိသူက“ကျောင်းသားတွေကိုတော့မဖမ်းဘူး။ ဆရာ၊ ဆရာမ ၃ ဦးရယ်၊ ထမင်းချက်ရယ်၊ သူ့ကလေးရယ် ပါသွားတယ်။ နောက်ပိုင်းကျ ကလေးအမေနဲ့ ကလေးကိုတော့ ပြန်လွှတ်လိုက်ပြီး ဆရာ၊ ဆရာမတွေကိုတော့ သူတို့ ထိန်းထားသေးတယ်။ သူတို့မှာ အထောက်အထားလည်းမရှိတာကြောင့် ဖမ်းသွားတယ်” လို့ ပြောပါတယ်။
MCA စာသင်ကျောင်းဟာ ဘုရားကျောင်းနဲ့တွဲပြီး UN အကူအညီနဲ့ ဒုက္ခသည်ကလေးတွေကို စာသင်ပေးနေတာလို့ သိရပါတယ်။
ဖမ်းဆီးခံရတဲ့ ဆရာ၊ ဆရာမ ၃ ယောက် ဟာ ချင်းပြည်နယ်၊ မင်းတပ်မြို့နယ်နဲ့ ဟားခါးမြို့တို့က ဖြစ်ပြီး သူတို့ကို လိန်းကိန်းလန့် (လဝက) ထိန်းသိမ်းရေးစခန်းမှာ ဖမ်းဆီးထားတယ်လို သိရပါတယ်။
