ထိုင်း-မြန်မာနယ်စပ်၊ တာ့ခ်ခရိုင်၊ မဲဆောက်မြို့၊ မယ်ပကျေးရွာအထွက်ဟွေ့ဟင်ဖွန် အကောက်ခွန် စစ်ဆေးရေးဂိတ်မှာ အရပ်ဘက်ကုန်ပစ္စည်းပို့ဆောင်ရေးကုမ္ပဏီပိုင် ကားတစီးပေါ်ကနေ ထိုင်းဘတ်ငွေ ၁ သန်းတန်ကြေးရှိတဲ့ တရားမ၀င် စစ်အသုံးအဆောင်ပစ္စည်းတွေ သိမ်းဆည်းရမိခဲ့တယ်လို့ ထိုင်းသတင်းတွေမှာ ဖော်ပြပါတယ်။
ဇွန် ၁၁ ရက် ညနေပိုင်းမှာ ရာ့ချ်မနူအထူးတပ်ဖွဲ့တပ်မှူးအပါအ၀င် မဲဆောက်လှည့်ကင်းရဲတပ်ဖွဲ့၊ မဲဆောက်အုပ်ချုပ်ရေးတာ၀န်ရှိသူတွေပါ၀င်တဲ့ အကောက်ခွန်စစ်ဆေးရေးအဖွဲ့က လုံခြုံရေး တာ၀န်ဆောင်ရွက်နေစဉ်မှာ ဖမ်းဆီးရမိခဲ့တာပါ။
အဲဒီကားပေါ်မှာ UV 8000D အမျိုးအစား စကားပြောစက်တွေ၊ စစ်ဘက်သုံးပလတ်စတစ်ဖိုင်ဘာ ကျည်ကာ ဦးထုပ်တွေ ၊ စစ်ဘက်သုံးကျည်ကာအင်္ကျီတွေ၊ စစ်ဖိိနပ်တွေ၊ စစ်ဘက်သုံး ယူနီဖောင်းတွေစတဲ့ ကာလတန်ဖိုး ဘတ် ၁ သန်းလောက်ကို ပိုင်ရှင်မဲ့သိမ်းဆည်းရမိခဲ့တယ်လို့ ဆိုပါတယ်။
မယ်ဟောင်ဆောင်ခရိုင်၊ မယ်စရီးယန်းမြို့ကို လိပ်မူထားတဲ့လိပ်စာပါရှိပြီး မြန်မာပြည်တွင်းထဲကို ပို့ဆောင်မဲ့ပစ္စည်းတွေဖြစ်ကြောင်းတော့ ဖော်ပြထားခြင်းမရှိပေမဲ့ ပြည်သူ့ကာကွယ်ရေးတပ် PDF အမှတ်တံဆိပ် အနီနောက်ခံကြယ်ဖြူဘတ်တံဆိပ်ကို ကျည်ကာအင်္ကျီမှာ တပ်ဆင်ထားတာ တွေ့ရပါတယ်။
ဖမ်းဆီးရမိတဲ့ စစ်အသုံးအဆောင်တွေကို ပိုင်ရှင်မဲ့သိမ်းဆည်းသွားမှာဖြစ်ပြီး တရားဥပဒေအရ ဆက်လက်အရေးယူဖို့ကြိုးစားနေတယ်လို့ ထိုင်းသတင်းမှာ ဖော်ပြထားပါတယ်။
Source/Photo: RDM News/ Nakhon Maesot Update
