မွန်ပြည်နယ်၊ ကျိုက်မရောမြို့နယ် စပယ်ဂူတံတားနားမှာ စစ်ဆေးရေးပြုလုပ်နေတဲ့ ပြည်သူ့ကာကွယ်ရေး ပူးပေါင်းတပ်ဖွဲ့ကို စစ်ကောင်စီက ဒရုန်းနဲ့ဗုံးသီးချတိုက်ခိုက်တာကြောင့် PDF တပ်ဖွဲ့ဝင် ၂ ယောက် ဒဏ်ရာရရှိခဲ့တယ်လို့ ဂဠုန်စစ်ကြောင်းနဲ့ ဒေသခံတွေဆီက သိရပါတယ်။
ကျိုက်မရောမြို့နယ်၊ ကျိုက်မရော-စံပယ်ဂူ-ကော့ပနာလမ်းပိုင်းမှာရှိတဲ့ စံပယ်ဂူ(အတ္တရံမြစ်ကူး) တံတားနားမှာ စစ်ဆေးနေတဲ့ PDF တပ်ဖွဲ့ကို ဇွန် ၈ ရက်နေ့ ညနေ ၄ နာရီခွဲမှာ စစ်ကောင်စီက ဒရုန်းနဲ့ ဗုံးသီးချတိုက်ခိုက်ခဲ့တာ ဖြစ်ပါတယ်။
ဂဠုန်စစ်ကြောင်းတပ်ရေးဗိုလ်ရဲဘော်ဘဲဥက “မနေ့ ၄ နာရီခွဲက စံပယ်ဂူတံတားနားမှာ စစ်ဆေးနေတဲ့ မဟာမိတ်တပ်ဖွဲ့ကို စစ်တပ်က ဒရုန်းနဲ့တိုက်ခိုက်ခဲ့တာ ဟုတ်ပါတယ်။။ မဟာမိတ် ပူးပေါင်းတပ်ဘက်က ရဲဘော် ၂ ယောက် ဒဏ်ရာရတယ်။ စိုးရိမ်စရာ အခြေအနေတော့မရှိပါဘူး” လို့ ပြောပါတယ်။
စစ်ကောင်စီက PDF တွေစစ်ဆေးနေတဲ့နေရာကို ဒရုန်းနဲ့ ဗုံးသီး ၂ လုံးချ တိုက်ခိုက်ခဲ့ပြီး တလုံးဟာ PDF တွေ စစ်ဆေးတဲ့နေရာနားမှာ ကျခဲ့ပြီး PDF ၂ ယောက် ဒဏ်ရာရရှိခဲ့တယ်လို့ ဒေသခံတယောက်ကလည်း ပြောပါတယ်။
“စစ်နေတဲ့ဘေးနားကို တလုံးကျတာ ၂ ယောက်ဒဏ်ရာရတယ်။ ဒဏ်ရာရတဲ့ ၂ ယောက်ကို ရဲဘော်တွေက ချက်ချင်း ကားပေါ်တင်သွားတယ်။ ကြားတာကတော့ DKBA ပိုင်တဲ့ ဆေးရုံကိုခေါ်ပြီးကုတာတဲ့။ ဗုံးချခံရပြီး လမ်းဖြတ်သွားဖြတ်လာတောင်မရှိတော့ဘူး” လို့ ပြောပါတယ်။
ပြီးခဲ့တဲ့ ဇွန် ၄ ရက်နေ့ကလည်း ကော့ဒွန်း-ကော့ပနာကျေးရွာနားမှာ တပ်စွဲထားတဲ့ တော်လှန်ရေးတပ်ဖွဲ့တွေကို စစ်ကောင်စီက ဒရုန်းနဲ့ဗုံးသီးချတိုက်ခိုက်ခဲ့တာကြောင့် တော်လှန်ရေးရဲဘော် ၂ ယောက် ဒဏ်ရာရရှိခဲ့ပါတယ်။
