မန္တလေးတိုင်း၊ နွားထိုးကြီးမြို့နယ်မှာ ရွာကို မီးရှို့ပြီးထွက်လာတဲ့ စစ်သားတွေ မိုင်းဆွဲတိုက်ခိုက်ခံရလို့ ၉ ယောက်သေ၊ ၇ ယောက် ဒဏ်ရာရပြီး မကွေးတိုင်း၊ စလင်းမြို့နယ်ထဲမှာလည်း စစ်ကောင်စီတပ်စစ်ကြောင်း ၃ ရက်ဆက် တိုက်ခိုက်ခံရလို့ စစ်ကြောင်းမှူးအပါအဝင် ၄ ယောက် သေဆုံးခဲ့တယ်လို့ သိရပါတယ်။

နွားထိုးကြီးမြို့နယ်၊ ဖောင်ချဉ်းကျေးရွာက နေအိမ်တွေကို မီးရှို့ပြီးထွက်လာတဲ့စစ်ကား ၂ စီးကို ဇွန် ၇ ရက်နေ့၊ ညနေ ၆ နာရီဝန်းကျင်မှာ မိုင်းဆွဲတိုက်ခိုက်ခဲ့လို့ စစ်ကောင်စီတပ်သား ၉ ယောက် သေဆုံးပြီး ၇ ယောက် အပြင်းအထန်ဒဏ်ရာရသွားကြတယ်လို့ နဂါးနီပြောက်ကျားတပ်ဖွဲ့ (မြင်းခြံ) ဆီကနေ သိရပါတယ်။

နဂါးနီပြောက်ကျားတပ်ဖွဲ့ (မြင်းခြံ) ရဲ့ တာဝန်ရှိသူတယောက်က “ခွေးသူခိုးတွေက ဖောင်ချဉ်းရွာက အိမ်တွေထဲက ပစ္စည်းတွေခိုးယူပြီး ရွာကိုမီးရှို့တယ်။ ရွာထဲမှာ ခွေးနည်းနည်းပဲ ချန်ထားခဲ့ပြီး ၇၀ လောက်က ကား ၂ စီးနဲ့ မြို့သာဘက်ကိုထွက်လာတော့ လမ်းကနေစောင့်ပြီး ပဒေသာမိုင်း ၇ လုံး၊ ရှေ့ထွက်မိုင်း ၁ လုံး ဆွဲလိုက်တာ မိုင်းကွင်းအလယ်တည့်တည့်ရောက်လာကားကို အပီအပြင်ထိပြီး ခွေး ၉ ကောင်သေတယ်။ ၇ ကောင်က အပြင်းအထန်ဒဏ်ရာရသွားတယ်။ ဒဏ်ရာရတဲ့ခွေးတွေကို မြို့သာဆေးရုံမှာ ဆေးကုနေတယ်လို့ မြေပြင်အဖွဲ့ဆီကနေ သတင်းပို့ထားပါတယ်ဗျ” လို့ ဒီဗွီဘီကို ပြောပါတယ်။

အဲဒီ စစ်ကောင်စီတပ်သားတွေဟာ နွားထိုးကြီးမြို့နယ်ထဲက နဘူးတောတောင်ကျေးရွာ၊ နဘူးတောမြောက်ကျေးရွာ၊ မကျည်းကုန်းကျေးရွာ၊ ဖောင်ချဉ်းကျေးရွာတို့က ဒေသခံ ပြည်သူတွေရဲ့ပစ္စည်းတွေကို ခိုးယူသယ်ဆောင်ပြီး နေအိမ်တွေကိုမီးရှို့ခဲ့ကြသူတွေဖြစ်တယ်လို့ သိရပါတယ်။

နဂါးနီပြောက်ကျားတပ်ဖွဲ့ရဲ့ ရဲဘော်တယောက်က “ဖောင်ချဉ်း​ရွာမှာကျန်နေခဲ့တဲ့ခွေးတွေက ဖောင်ချဉ်းရွာနဲ့ ဆူးဖြူကုန်းရွာတွေထဲ ဝင်မွှေနေတယ်။ သေနတ်ဖောက်တဲ့ အသံတွေလည်း ကြားနေရတယ်” လို့ ပြောပါတယ်။

ဇွန် ၆ ရက်နေ့က စစ်ကောင်စီတပ်သားတွေ မီးရှို့လို့ ရွာကြီးတရွာဖြစ်တဲ့ ဖောင်ချဉ်း​ကျေးရွာက အိမ်ခြေရာဂဏန်းနီးပါး၊ မကျည်းကုန်းကျေးရွာက အိမ်ခြေ ၃၅ လုံးနီးပါးနဲ့ နဘူးတောကျေးရွာက အိမ်ခြေ ၁၇ လုံးနီးပါး မီးလောင်ပျက်စီးခဲ့ရတယ်လို့ သိရပါတယ်။

မကွေးတိုင်း၊ စလင်းမြို့နယ်ထဲမှာတော့ စစ်ကောင်စီတပ်စစ်ကြောင်းကို ဇွန် ၅ ရက်နေ့ကနေ ၇ ရက်နေ့ အထိ ၃ ရက်ဆက် တိုက်ခိုက်ခဲ့လို့ စစ်ကြောင်းမှူးအပါအဝင် ၄ ယောက် သေဆုံးခဲ့​တယ်လို့ မင်းဘူးခရိုင် အမှတ် ၁ တပ်ရင်းဆီကနေ သိရပါတယ်။

တပ်ရင်းတာဝန်ခံတယောက်က “ခွေးအကောင်ရေ ၈၀ နီးပါးနဲ့ လင်းဇင်းရဲစခန်းကနေ ထွက်လာတဲ့စစ်ကြောင်းကို ၃ ရက်ဆက်တိုက် ဖြတ်တိုက်ခဲ့တာ စစ်ကြောင်းမှူးအပါအဝင် အရာရှိ ၃ ကောင် သေတယ်။ ၁၀ ကောင်ထက်မနည်း ဒဏ်ရာရသွားတယ်လို့ တပ်တွင်းဖရဲသီးဆီကနေ သိရတာပါ” လို့ ဒီဗွီဘီကို ပြောပါတယ်။

စစ်ကောင်စီစစ်ကြောင်းဟာ ၃ ရက်ဆက်တိုက် ဖြတ်တိုက်ခံရတဲ့အတွက် အထိနာပြီး နောက်ကြောင်းပြန်ဆုတ်သွားခဲ့ပါတယ်။

မင်းဘူးခရိုင် အမှတ် ၄ တပ်ရင်းရဲ့ ​ပြောရေးဆိုခွင့်ရှိသူတယောက်က “ခွေးစစ်ကြောင်းက လာတုန်းက ခြေလျင်လာတာ။ သေတဲ့သူနဲ့ ဒဏ်ရာရတဲ့ကောင်တွေများတော့ ပြန်ဆုတ်တာကို ကားနဲ့ကြိုသွားတယ်။ ဒဏ်ရာရတဲ့ခွေးတွေကို ဆေးရုံတင်ထားတယ်လို့ သိရတယ်ဗျ” လို့ ပြောပါတယ်။

စစ်ကောင်စီစစ်ကြောင်းနဲ့ ၃ ရက်ကြာတိုက်ပွဲမှာ ပြည်သူ့ကာကွယ်ရေးတပ်ပေါင်းစုတွေ အထိအခိုက်မရှိဘဲ အောင်မြင်စွာတိုက်ခိုက်နိုင်ခဲ့တယ်လို့ သူက ဆက်လက်ပြောပြပါတယ်။

အဲဒီ တိုက်ခိုက်မှုကို မင်းဘူးခရိုင် အမှတ် ၁ တပ်ရင်း၊ အမှတ် ၄ တပ်ရင်း၊ အမှတ် ၅ တပ်ရင်း၊ စလင်း ပကဖ၊ ဒေါင်းစစ်အောင်၊ SLN LPDF၊ မကွေးခရိုင် တပ်ရင်း ၁၊ မကွေးတိုင်းလက်ရုံးဒရုန်းအဖွဲ့ တို့နဲ့အတူ မိုးကြိုးပြောက်ကျားတပ်ရင်း ၁၀၁ တို့ ပူးပေါင်း တိုက်ခိုက်ခဲ့တာဖြစ်တယ်လို့ သိရပါတယ်။

စစ်ကောင်စီစစ်ကြောင်းဟာ ပြည်သူ့ကာကွယ်ရေးတပ်ပေါင်းစုတွေရဲ့တိုက်ခိုက်မှုကြောင့် စစ်ကြောင်းမှူး အပါအဝင် အရာရှိ ၃ ယောက် သေဆုံးတယ်လို့ ဒေသပြည်သူ့ကာကွယ်ရေး တပ်ဖွဲ့တွေဆီကနေ သိရပေမယ့် ဒီဗွီဘီအနေနဲ့ သီးခြားအတည်မပြုနိုင်သလို စစ်ကောင်စီ ဘက်ကလည်း တစုံတရာထုတ်ပြန်ပြောဆိုလာတာ မရှိသေးပါဘူး။