ကချင်ပြည်နယ်၊ ရွှေကူမြို့နယ်၊ မြို့ကုန်းတိုက်နယ်ဆေးရုံကို ဇွန် ၁ ရက်နေ့ ည ၁၂ နာရီဝန်းကျင်မှာ စစ်ကောင်စီတပ်က လေကြောင်းကနေ ဗုံးကြဲခဲ့တဲ့အတွက် ကလေးငယ် ၁ ယောက် သေဆုံးပြီး ဆေးရုံတက်နေတဲ့လူနာတချို့လည်း ဒဏ်ရာရခဲ့ကြတယ်လို့ ဒေသခံတွေဆီကနေ သိရပါတယ်။

ဆေးရုံနဲ့ နီးစပ်သူတယောက်က “ဆေးရုံအဆောင်၊ ဆေးရုံအသုံးအဆောင်တွေနဲ့  ဆေးဝါးတွေ ပျက်စီးကုန်ပါတယ်ဗျာ။ ကလေးငယ် ၁ ယောက်လည်း ဆုံးသွားပါတယ်။ လူနာတွေထဲက ဒဏ်ရာရတဲ့သူတွေလည်း ရှိပါတယ်။ ဆေးရုံကို ဗုံးကြဲတိုက်ခိုက်ခံရလို့ ဆေးကုသမှုခံယူနေတဲ့ လူနာတွေကို နေရာရွှေ့ပြောင်းနေရတဲ့အတွက် ဒဏ်ရာရတဲ့လူနာတွေကို စာရင်းပြုစုနေဆဲဖြစ်ပါတယ်” လို့ ဒီဗွီဘီကိုပြောပါတယ်။

မြို့ကုန်းတိုက်နယ်ဆေးရုံကို စစ်ကောင်စီတပ်က လေကြောင်းကနေ ပေါင် ၅၀၀ ဗုံးကြဲချခဲ့တာကြောင့် ဆေးကုသမှုခံယူနေတဲ့ အသက် ၈ နှစ်အရွယ် မောင်ထက်ဦးဝေယံ သေဆုံးသွားတယ်လို့ ဆေးရုံနဲ့နီးစပ်တဲ့သူတွေဆီကနေ သိရပါတယ်။

ဒေသပြည်သူ့ကာကွယ်ရေးတပ်ဖွဲ့ရဲ့ တာ၀န်ခံတယောက်က “အခုရက်ပိုင်းထဲ ဒီရွှေကူမြို့နယ်ထဲမှာ တိုက်ပွဲဖြစ်တာမရှိ​ဘူး။ အကြမ်းဖက်စစ်တပ်က ဆေးရုံကို တမင်ဗုံးကြဲတာ။ ပေါင် ၅၀၀ ဗုံး ကြဲချခဲ့တာပါ” လို့ပြောပါတယ်။

အခုရက်ပိုင်းမှာ ကချင်ပြည်နယ်၊ ဗန်းမော်မြို့နယ်အတွင်းက မိုးမောက်မြို့နယ်နဲ့ မံစီမြို့နယ်တို့မှာ ကချင်လွတ်လပ်ရေးတပ်မတော် (KIA) ပူးပေါင်းတပ်ဖွဲ့တွေနဲ့ စစ်ကောင်စီတပ်တို့အကြား တိုက်ပွဲပြင်းထန်နေတာလည်း ဖြစ်ပါတယ်။

ချင်းပြည်နယ်မှာလည်း မင်းတပ်မြို့နယ်ထဲက ဝမ္မသူးဆေးရုံကို စစ်ကောင်စီတပ်က ပြီးခဲ့တဲ့ ဧပြီ ၂၅ ရက်နေ့နဲ့ ၂၆ ရက်နေ့မှာ ၂ ရက်ဆက်တိုက် လေကြောင်းကနေ ဗုံးကြဲတိုက်ခိုက်ခဲ့တဲ့အတွက် ဆေးကုသမှုခံယူနေသူ ၅ ယောက် သေဆုံးပြီး ဆေးရုံပျက်စီးမှုတန်ဖိုး ကျပ်သိန်း ၁ သောင်းနီးပါး ဆုံးရှုံး ခဲ့ရပါသေးတယ်။