ချင်းပြည်နယ်၊ ဖလမ်းမြို့က စစ်ကောင်စီလက်အောက်ခံ ရဲတပ်ကြပ်ကြီး ၁ ယောက် အပါအဝင် ရဲတပ်ဖွဲ့ဝင် ၃ ယောက်ဟာ မေ ၃၁ ရက်နေ့က CNO/CNDF ဆီကို အလင်းဝင်ရောက်လာတယ်လို့ သိရပါတယ်။
CNO/CNDF တာဝန်ခံတယောက်က “ဖလမ်းခရိုင်ရဲစခန်းက စစ်တပ်လက်အောက်ခံ ရဲတပ်ကြပ်ကြီးအဆင့်ရှိတဲ့ ဆန်ထောင်း၊ ရဲတပ်သား ဟိန်းထက်စံနဲ့ ဟွာခန့်စိန်တို့ ၃ ဦး အလင်းဝင်လာတာဖြစ်တယ်” လို့ DVB ကို အတည်ပြုပြောဆိုပါတယ်။
အလင်းဝင်ရောက်လာကြတဲ့ ရဲတပ်ဖွဲ့ဝင်တွေဟာ G3 သေနတ် ၁ လက်၊ လက်ပစ်ဗုံး ၆ လုံး၊ ၇ ဒသမ ၆၂ ကျည် အတောင့် ၂၉၀၊ ကျည်ဘောက် ၃ ခုတို့ကို ယူဆောင်လာတယ်လို့ သိရပါတယ်။
CNO/CNDF ရဲ့ ပြန်ကြားရေးတာဝန်ခံတယောက်ကလည်း “သူတို့ ၃ ဦးကို ဆုကြေငွေပေးအပ်ဖို့ စီစဉ် ဆောင်ရွက်နေသလို လုံခြုံတဲ့ လွတ်မြောက်နယ်မြေတနေရာကို ပို့ဆောင်ထားပြီး ဖြစ်ပါတယ်” လို့ ပြောပါတယ်။
ကျန်ရှိနေသေးတဲ့ စစ်ကောင်စီ လက်အောက်ခံတွေအနေနဲ့လည်း နီးစပ်ရာ ပြည်သူ့ကာကွယ်ရေး တပ်ဖွဲ့တွေနဲ့ ချိတ်ဆက်ပြီး ပြည်သူ့ရင်ခွင်ခိုလှုံ အမြန်ဆုံးအလင်းဝင်ကြဖို့ ဖိတ်ခေါ်ထားတယ်လို့လည်း သိရပါတယ်။
