ချင်းပြည်နယ်၊ ရေဇွာမြို့နဲ့ မကွေးတိုင်း ဂန့်ဂေါမြို့ကို ဆက်သွယ်ထားတဲ့ ဂန့်ဂေါ-ရေဇွာ ကားလမ်းဟာ မိုးရွာသွန်းမှုများပြီး မြေပြိုတဲ့အတွက် ကားလမ်းပျက်စီးပြီး ဒေသခံတွေ သွားရေးလာရေး ခက်ခဲနေတယ်လို့ ရေဇွာဒေသခံတွေက ပြောပါတယ်။
ရေဇွာမြို့မှာ မေ ၂၄ ရက်ကတည်းက မိုးသည်းထန်စွာ ရွာသွန်းနေပြီး ဂန့်ဂေါ-ရေဇွာလမ်း ၄၆ မိုင်မှာ မြေသားလမ်းပြိုကျခဲ့တာ ဖြစ်ပါတယ်။
လမ်းပျက်စီးသွားတဲ့အတွက် ဒေသခံတွေ သွားရေးလာရေး အခက်ကြုံပြီး ကုန်တင်ကား ၁၀ စီးကျော်လည်း ပိတ်မိနေတယ်လို့ သိရပါတယ်။
ရေဇွာဒေသခံတဦးက “အပေါ်က ကျောက်ခဲတွေကျတယ်၊ တခါတလေ မြေပြန်ပြန်ပြိုတယ်၊ ဘယ်မှသွားလို့မရဘူး။ ဆိုင်ကယ်လည်း သွားလို့မရဘူး။ မိုးက အဆက်မပြတ် ၃ ရက်လောက်ရွာတဲ့ အခါကျတော့ မြေတော်တော်ပြိုတယ်။ လူတောင်မှ သွားဖို့ သိပ်မလွယ်ဘူး” လို့ ပြောပါတယ်။
ပြီးခဲ့တဲ့ ၂၀၂၃ ခုနှစ် အောက်တိုဘာလကလည်း ဂန့်ဂေါ-ရေဇွာလမ်း ပြိုကျပျက်စီးခဲ့ပြီး တလနီးပါး လမ်းပိတ်ခဲ့ပါတယ်။
မိုးလေဝသနဲ့ ဇလဗေဒ ညွှန်ကြားမှုဦးစီးဌာနရဲ့ မေ ၂၇ ရက် ည ထုတ်ပြန်ချက်မှာ ချင်းပြည်နယ်မှာ နေရာကွက်ကြား မိုးကြီးနိုင်ပြီး ရာနှုန်းပြည့် မိုးရွာသွန်းနိုင်တယ်လို့ ဖော်ပြထားပါတယ်။
