ထိုင်းနိုင်ငံမှာ လွန်ခဲ့တဲ့ ၃ နှစ်ကျော်က ဒသမမြောက်ထိုင်းဘုရင်ရဲ့ ဓာတ်ပုံပါပိုစတာကြီးကို ဓာတ်ဆီလောင်းမီးရှို့ပြီး ဆန္ဒပြခဲ့တဲ့ ထိုင်းအနုပညာရှင် အဲမ်မိ Amy the Bottom Blues ကို ထိုင်းရာဇဝတ်မှုတရားရုံးက ထောင်ဒဏ် ၄ နှစ် ပြစ်ဒဏ်ချမှတ်လိုက်ပါတယ်။ 

သူ့ရဲ့အမှုကို  ဘန်ကောက်ရာ့ချ်ဒါးဖိဆစ်နယ်မြေရှိ ရာဇဝတ်မှုဆိုင်ရာတရားရုံးက  မေ ၂၇ ရက် ဒီမနက်မှာ အပြီးသတ်စစ်ဆေးပြီး ထောင်ဒဏ် ၄ နှစ်ကျခံစေဖို့  စီရင်ချက်ချလိုက်တာပါ။

ဒါ့အပြင် သူနဲ့ကြံရာပါ အပေါင်းအဖော် နိုင်းထနဖတ်ဆိုသူမှာလည်း ထောင်ဒဏ် ၃ နှစ် အမိန့်ချမှတ်ပြီး သူကတော့ ပြစ်မှုကျူးလွန်စဉ် အသက် ၁၈ နှစ်သာရှိသေးတဲ့လူရွယ်ဖြစ်တာက တကြောင်း၊ အမှုစစ်ဆေးစဉ်  ကောင်းမွန်စွာဖြေဆိုပြီး အချက်အလက်တွေပေးတဲ့အတွက်  ထောင်ဒဏ် ၁ နှစ် နဲ့ ၆ လထိ လျှော့ပေါ့ပေးလိုက်ပါတယ်။ 

သူတို့ ၂ ဦးဟာ ပြီးခဲ့တဲ့   ၂၀၁၁ ခုနှစ် ဖေဖော်ဝါရီလကုန်ပိုင်း ညသန်းခေါင်ယံမှာ ဘန်ကောက် ခလောင်းပဲန်အကျဉ်းထောင်ရှေ့မှာ ထောင်ထားတဲ့ လက်ရှိ မဟာဝဇီရာလောင်ကွန်းရဲ့  ဓာတ်ပုံပါ ဆိုင်းဘုတ်ကို ဓာတ်ဆီလောင်း မီးရှို့ခဲ့ရုံတင်မက ဗွီဒီယိုရိုက် ကူးပြီး သူ့ရဲ့လူမှုကွန်ရက်ပေါ်မှာ တင်ထားခဲ့ပါတယ်။ 

ဒါကြောင့် တာဝန်ရှိသူတွေက အဲမ်မိကို ပုဒ်မ ၁၁၂ နိုင်ငံ့ဦးသျှောင်ဘုရင့်သိက္ခာစော်ကားမှု ၊  ပုဒ်မ ၂၁၇ အများပြည်သူပိုင်ပစ္စည်းဖျက်စီးမှု၊ ပုဒ်မ ၁၄(၃) မဟုတ်မမှန်သတင်းဖြန့်ဝေမှု (ကွန်ပြူတာဥပဒေ ) စတဲ့ စွဲချက် ၃ ခုနဲ့ တရားစွဲခဲ့တာ ဖြစ်ပါတယ်။ 

တရားစွဲခံရပြီးနောက် အာမခံနဲ့ ပြင်ပကနေ အမှုရင်ဆိုင်နေတာမှာ ဒီကနေ့မှာ ထောင်ဒဏ်အပြစ် ပေးခံ လိုက်ရတာပါ။ 

အဲမ်မိ Amy the Bottom Blues ရဲ့ အမည်ရင်းမှာ နိုင်းချိုင်းအမွန်း ကယောက်ဝိကွန်းဖန်းဖြစ်ပြီး အသက် ၃၅ နှစ်ရွယ်ရှိပါတယ်။ သူဟာ လူငယ်တွေကြားရေပန်းစားတဲ့ အဆိုတော် / မော်ဒယ်လ် တဦးဖြစ်သလို တေးရေးသူ / ဂီတာတီးခတ်ကျွမ်းကျင်သူအနုပညာရှင်လည်းဖြစ်ပါတယ်။ 

နိုင်ငံရေးတက်ကြွလှုပ်ရှားသူတဦးလည်းဖြစ်ပြီး  ထိုင်းမှာ စစ်အာဏာရှင်စနစ်ပပျောက်ရေး၊ စစ်မှန်သောဒီမိုကရေစီစနစ် ထွန်းကားရေးနဲ့ တော်ဝင်မိသားစုဆိုင်ရာ ပုဒ်မ ၁၁၂ ဖျက်သိမ်းရေး ဆန္ဒပြပွဲတွေမှာ ရှေ့တန်းကအမြဲပါဝင်ခဲ့သူလည်းဖြစ်ပါတယ်။ 

Source/ Photo Credit- Matichon/Thai PBS