မွန်ပြည်နယ်၊ ဘီးလင်းမြို့နယ်မှာ မေ ၂၄ ရက်နေ့က တိုက်ပွဲမဖြစ်ဘဲ လက်နက်ကြီးနဲ့ပစ်ခတ်တာကြောင့် အရပ်သားပြည်သူ ၂ ယောက် သေဆုံးပြီး ၅ ယောက် ဒဏ်ရာရရသလို နေအိမ် ၁၀ လုံး ထိခိုက်ပျက်စီးခဲ့တယ်လို့ ဒေသခံတွေက ပြောပါတယ်။
ဘီးလင်းမြို့ ၈ ရပ်ကွက်မှာရှိတဲ့ ခြေလျင်တပ်ရင်း ခလရ ၈ အခြေစိုက်တဲ့ မျှင်သာတောင် လက်နက်ကြီးကုန်းကနေ မေ ၂၄ ရက် မနက် ၁၁ နာရီက လက်နက်ကြီး ၅ လုံးပစ်ခတ်ခဲ့တာမှာ ဘုရားဆိပ်နယ်ကျေးရွာ၊ တောင်သူဌေးကုန်းကျေးရွာအတွင်း ကျရောက် ပေါက်ကွဲခဲ့ပါတယ်။
ကျေးရွာအတွင်း လက်နက်ကြီးကျရောက်ပေါက်ကွဲတာကြောင့် အသက် ၃၀ နှစ်အရွယ် ကိုရဲလင်းဌေးနဲ့ အသက် ၃၅ နှစ်အရွယ်မမိုးမိုးအေးတို့ နေရာမှာပဲသေဆုံးခဲ့ပြီး အမျိုးသား ၂ ဦးနဲ့ အမျိုးသမီး ၃ ဦး ထိခိုက်ဒဏ်ရာရခဲ့တဲ့အပြင် နေအိမ် ၁၀ လုံးလည်း လက်နက်ကြီးထိမှန် ပျက်စီးခဲ့ပါတယ်။
တောင်ကလေးရွာသားတယောက်က “နေ့လယ်ဘက်ကြီး လက်နက်ကြီးပစ်လိုက်တာ၊ တောင်သူဌေးကုန်းရွာထဲ ၅ လုံး လုံးကျတာ။ အမျိုးသား ၁ ဦးနဲ့ အမျိုးသမီး ၁ ဦးသေပြီး ၅ ဦး ဒဏ်ရာရတယ်။ ဗုံးခိုကျင်းထဲ ဝင်ပုန်းတဲ့သူပါ သေတာ။ လက်နက်ကြီးတွေက တောက်လျှောက် ပစ်နေတာ။ အနီးနားမှာရှိတဲ့ ရွာသားတွေအကုန်လုံး လန့်နေရတယ်” လို့ ပြောပါတယ်။
ဘီးလင်းမြို့နယ်၊ ဇီးဝန်းရွာအခြေစိုက် အမှတ် ၃၁၄ အမြောက်တပ်ကလည်း မေ ၂၄ ရက် ည ၆ နာရီကျော်မှာ လက်နက်ကြီး ၅ လုံးထပ်ပစ်ခဲ့ပြီး ရွှေရောင်ပြ ကျေးရွာအပြင်ဘက်ကို ကျရောက်ပေါက်ကွဲခဲ့လို့ သီးပင်စားပင်တွေ ထိခိုက်ပျက်စီးခဲ့ပါတယ်။
ကေအဲန်ယူသထုံခရိုင် အတွင်းအရေးမှူး ပဒိုစောအေးနိုင်က “မစောတံတား အချိုးခံပြီး နောက်ပိုင်းမှာ လက်နက်ကြီးပစ်တာ ပိုစိပ်လာတယ်။ အဲနေ့ကလည်း စစ်ကောင်စီ တပ်ရင်းနှစ်ခုက တိုက်ပွဲမရှိဘဲ ရွာထဲကို ရည်ရွယ်ချက်ချက်ရှိရှိပစ်လို့ အရပ်သား ထိခိုက်ပျက်စီးမှုတွေရော ရှိသွားတာပါ” လို့ ပြောပါတယ်။
မေ ၁၉ ရက်နေ့ကလည်း တိုက်ပွဲမရှိဘဲ အမှတ် ၈ စစ်ဆင်ကွပ်ကဲမှုဌာနချုပ် ရှေ့တန်းပိန္နဲတောတပ်စခန်းက လက်နက်ကြီး ၆ လုံးပစ်ခတ်ခဲ့တာကြောင့် ရွာသား ၂ ဦး ဒဏ်ရာရရှိခဲ့ပြီး နေအိမ် ၁ လုံး ပျက်စီးခဲ့ပါတယ်။
