ကရင်ပြည်နယ်၊ ကော့ကရိတ်မြို့နယ်၊ ပိုင်ခလန်ရွာအနီးမှာရှိတဲ့ ဖုချိမူ စစ်ကောင်စီတပ်စခန်းကနေ ထိုင်းနိုင်ငံဘက်ကို ထွက်ပြေးလာတဲ့ စစ်ကောင်စီတပ်သားတွေဟာ ကိုယ်ဝန်ဆောင်အမျိုးသမီးတဦးနဲ့ အမျိုးသား ၃ ဦးတို့ကို မေ ၁၉ ရက်မှာ ပစ်သတ်သွားခဲ့တယ်လို့ ဒေသခံတွေက ပြောပါတယ်။
ထိုင်း-မြန်မာနယ်စပ်မှာရှိတဲ့ စစ်ကောင်စီအင်အား ၁၀၀ လောက်ရှိတဲ့ ဖုချိမူ စစ်ကောင်စီစခန်းကို KNLA ပူးပေါင်းတပ်ဖွဲ့တွေက ဝင်ရောက်တိုက်ခိုက်တာကြောင့် စခန်းက စစ်ကောင်စီတပ်သားတချို့ဟာ မေ ၁၈ ရက် ညပိုင်းက ထိုင်းဘက်ကို ဝင်ရောက်ထွက်ပြေးခဲ့ပါတယ်။
ထွက်ပြေးတဲ့ စစ်ကောင်စီတပ်သားတွေဟာ မေ ၁၉ ရက်မှာ လမ်းမှာတွေ့တဲ့ အသက် ၃၀ အရွယ် ကိုယ်ဝန် ၅ လရှိတဲ့ အမျိုးသမီးတဦးနဲ့ အမျိုးသား ၃ ဦးကို သတ်ဖြတ်သွားခဲ့ပါတယ်။
ပိုင်ခလန်ရွာခံတဦးက “ဖုချိမူစခန်းကနေ ထွက်ပြေးတာက အကုန်လုံးက ၃၀ ကျော်လောက်ရှိတယ်။ ကျန်တာကတော့ စခန်းမှာပဲ ကျန်ခဲ့တာလား၊ လက်နက်ချတာလား၊ တခြားလမ်းကြောင်းကပဲ ထွက်ပြေးတာလားတော့ သေချာမသိသေးဘူး။ ထွက်ပြေးတဲ့သူတွေက လက်နက်နဲ့အတူ ထိုင်းထဲဝင်ပြေးတာ။ ထွက်ပြေးတဲ့သူတွေက သတင်းပေါက်မှာစိုးလို့ လမ်းမှာတွေ့တဲ့သူတွေ အကုန်သတ်နေတာ” လို့ ပြောပါတယ်။
စစ်ကောင်စီပစ်သတ်သွားတဲ့ ကိုယ်ဝန် ၅ လရှိတဲ့ အမျိုးသမီးဟာ ကိုယ်ဝန်ရက်ချိန်းပြဖို့ နယ်စပ်ကို ဆိုင်ကယ်နဲ့မောင်းတဲ့ အမျိုးသားတဦးနဲ့ လာတဲ့အချိန် စစ်ကောင်စီတပ်သားတွေနဲ့ လမ်းမှာဆုံပြီး ၂ ဦးလုံး ပစ်သတ်ခံလိုက်ရတာပါ။
အသတ်ခံရတဲ့ တခြားအမျိုးသား ၂ ဦးထဲက တဦးက အသက် ၅၀ အရွယ်ရှိပြီး ခြံထဲသွားဖို့ ထွက်လာတဲ့အချိန် စစ်သားတွေပစ်သတ်တာ ခံရသလို နောက်တဦးက အသက် ၂၀ အရွယ်ရှိပြီး ဥယျာဉ်ခြံထဲက တဲမှာအိပ်နေတုန်း စစ်ကောင်စီတပ်သားတွေက ဝါးရင်းတုတ်နဲ့ ရိုက်သတ်ခဲ့ပါတယ်။
သေဆုံးသွားတဲ့ ၄ ဦးက ဖုချိမူနားက ဒေသခံတွေမဟုတ်ဘဲ အကြောင်းတခုခုကြောင့် ခရီးသွားတာနဲ့ အလုပ်လုပ်ဖို့ လာနေကြတဲ့သူတွေ ဖြစ်တယ်လို့ ဒေသခံတွေက ပြောပါတယ်။
စစ်ကောင်စီတပ်သားတွေ လက်နက်အပြည့်အစုံနဲ့ စခန်းစွန့်ခွာ ထွက်ပြေးတာတွေ ရှိနေတဲ့အတွက် အနီးအနားက ဒေသခံတွေဟာ သတိနဲ့ သွားလာနေထိုင်နေကြရပြီး အပြင်မထွက်ရဲအောင် ကြောက်လန့်နေတယ်လို့ ဒေသခံတွေက ပြောပါတယ်။
ထိုင်း-မြန်မာနယ်စပ်မှာရှိတဲ့ ဖုချိမူ စစ်ကောင်စီတပ်စခန်းဟာ စကခ ၁၃ လက်အောက်ခံ တပ်ရင်းတွေဖြစ်တဲ့ ခြေမြန်တပ်ရင်း ခမရ ၅၅၈၊ ခမရ ၅၆၁ နဲ့ ခြေလျင်တပ်ရင်း ခလရ ၉၉၃ အခြေချ တပ်စွဲထားတဲ့စခန်း ဖြစ်ပါတယ်။
