အိန္ဒိယနိုင်ငံ၊ မီဇိုရမ်ပြည်နယ်မှာ မေလပထမအပတ်အတွင်း မုန်တိုင်း ၄ ကြိမ်တိုက်ခတ်ခဲ့တဲ့အတွက် စစ်ဘေးရှောင်တွေရဲ့ နေအိမ်တွေ ပျက်စီးခဲ့ပြီး အကူအညီတွေ လိုအပ်နေတယ်လို့ စစ်ဘေးရှောင် အကူအညီပေးနေသူတွေက ပြောပါတယ်။
မေ ၁ ရက်၊ ၂ ရက်၊ ၄ ရက်နဲ့ ၆ ရက်တွေမှာ လေပြင်းတွေ တိုက်ခတ်ခဲ့တာမှာ မီဇိုရမ်ပြည်နယ်အတွင်းက ခရိုင် ၇ ခုမှာ မြန်မာစစ်ဘေးရှောင်စခန်း ၅၄ ခုရှိပြီး လေမုန်တိုင်းကြောင့် စခန်း ၁၇ ခုလောက်က အားလုံးနီးပါးပျက်စီးခဲ့တယ်လို့ သိရပါတယ်။
စစ်ဘေးရှောင်တဦးက “ဒီမှာနေတာကြာလာတာနဲ့အမျှ ဒုက္ခတွေအမျိုးမျိုးကြုံနေရတယ်၊ အလုပ်အကိုင် ခက်ခဲတယ်၊ စားဝတ်နေရေး အကျပ်အတည်းတွေ ကြုံနေရတယ်ပေါ့၊ အဓိကက ပညာရေးကျန်းမာရေးကိစ္စတွေ အဆင်မပြေဘူးပေါ့၊ မုန်တိုင်းကလည်း ၄ ကြိမ်တိုက်တယ်၊ ကြိုတင်ပြင်ဆင်မှုလည်း မရှိဘူး မမျှော်လင့်ထားဘူးပေါ့” လို့ ပြောပါတယ်။
လေမုန်တိုင်းကြောင့် စစ်ဘေးရှောင်စခန်းအတွင်းက နေအိမ်တွေ၊ ခရစ်ယာန်ဘုရားကျောင်းနဲ့ စာသင်ကျောင်းတွေ ပြိုကျပျက်စီးခဲ့တယ်လို့ သိရပါတယ်။
စစ်ရှောင်နေအိမ်တွေ ပြန်လည်တည်ဆောက်ဖို့နဲ့ ကလေးတွေ ကျောင်းဖွင့်ချိန်အမီ စာသင်ကျောင်းတွေ ပြန်လည်မတည်ဆောက်နိုင်မှာကို စစ်ဘေးရှောင်တွေက စိုးရိမ်နေကြပါတယ်။
အိုင်ဇောခရိုင်အတွင်းက စစ်ဘေးရှောင်တဦးက “မုန်တိုင်းက တခေါက် ၂ ခေါက်ဆို တော်သေးတယ်၊ မိုးရွာတာနဲ့ မုန်တိုင်းက ပါလာတယ်၊ အိမ်တွေကလည်း ဝါးထရံကာဆိုတော့ အကုန်ပျက်စီးကုန်လို့ အတော်ဒုက္ခရောက်နေရတယ်၊ အခုကတော့ မပျက်စီးတဲ့ အိမ်တွေနဲ့ပဲ ပေါင်းပြီးနေကြတာပေါ့” လို့ ပြောပါတယ်။
အိန္ဒိယနိုင်ငံ မီဇိုရမ်ပြည်နယ်နဲ့ နယ်နိမိတ်ချင်းထိစပ်နေတဲ့ ချင်းပြည်နယ်ရဲ့ တိုက်ပွဲတွေကြောင့် မီဇိုရမ်ပြည်နယ်ဘက်ကို ထွက်ပြေးတိမ်းရှောင်ရသူ ၆၀,၀၀၀ နီးပါးရှိနေတယ်လို့ ချင်းရေးရာအဖွဲ့ ရဲ့ အစီအရင်ခံစာအရ သိရပါတယ်။
