မွန်ပြည်နယ်၊ ဘီးလင်းမြို့နယ်က စစ်စခန်းတခု ဒရုန်းနဲ့ တိုက်ခိုက်ခံရပြီး မကွေးတိုင်း၊ ထီးလင်းမှာတော့ စစ်ကောင်စီတပ်စွဲထားတဲ့ နေရာ ၂ ခု တိုက်ခိုက်ခံရလို့ စစ်သား ၂ ဦး သေဆုံး၊ ၁၀ ဦး ဒဏ်ရာရတယ်လို့ သိရပါတယ်။

ဘီးလင်းမြို့နယ်က အမှတ် ၈ စစ်ဆင်ရေးကွပ်ကဲမှုဌာနချုပ်(စကခ ၈) လက်အောက်ခံ မဲပလီစခန်းကို ဧပြီ ၂၇ ရက်နေ့မှာ တော်လှန်ရေးပူးပေါင်းတပ်တွေက ဒရုန်းနဲ့ ဗုံးသီးချ တိုက်ခိုက်ခဲ့တယ်လို့ သထုံ ပြည်သူ့ကာကွယ်ရေးတပ်ဖွဲ့(TPDF) က ပြောပါတယ်။

စကခ ၈ ရဲ့ရှေ့တန်းအခြေပြုဗျူဟာစခန်းဖြစ်တဲ့ မဲပလီတပ်စခန်းရဲ့ ရှေ့ကင်းတဲနဲ့ စခန်းဝင်းအတွင်းကို မွန်းလွဲ ၂ နာရီခွဲလောက်က ဒရုန်းနဲ့ ဗုံးသီး ၂ လုံးချ တိုက်ခိုက်ခဲ့တာဖြစ်ပြီး ဒရုန်းတစင်း မော်တာလောင်ကျွမ်း ပျက်စီးခဲ့ပေမဲ့ ပစ်မှတ်နေရာကို ထိခဲ့တယ်လို့ သထုံပြည်သူ့ကာကွယ်ရေးတပ်ဖွဲ့ TPDF တာဝန်ခံက ပြောပါတယ်။

“မဲပလီစခန်းရဲ့ကင်းတဲနဲ့ စခန်းဝင်းအတွင်းကို ဒရုန်းနဲ့ဗုံးသီး ၂ လုံးချတိုက်ခိုက်တာပါ။ ပစ်မှတ်ကို ထိပြီး စစ်ကောင်စီ ထိခိုက်မှုရှိနိုင်တယ်ဆိုပေမယ့် အတိအကျမသိရသေးတော့ ဆက်လက်စုံစမ်းနေတုန်းပါပဲ။ သူရိယစစ်ကြောင်းဒရုန်း Team က ဒရုန်းတစင်း မော်တာလောင်ပြီး ပျက်စီးခဲ့တယ်” လို့ ပြောပါတယ်။

မဲပလီစခန်း တိုက်ခိုက်ခံရပြီးနောက် စခန်းအတွင်းက ၈၁ မမ လက်နက်ကြီးတွေနဲ့ ၃ ကြိမ် ပြန်လည်ပစ်ခတ်ခဲ့ပေမယ့် ‌တော်လှန်ရေးတပ်ဖွဲ့တွေ အထိအခိုက်မရှိ ဆုတ်ခွာနိုင်ခဲ့သလို အရပ်သား ထိခိုက်မှုလည်းမရှိဘူးလို့ ဆိုပါတယ်။

အဲဒီ တိုက်ခိုက်မှုကို သထုံပြည်သူ့ကာကွယ်ရေးတပ်ဖွဲ့ TPDF၊ KNLA၊ သူရိယစစ်ကြောင်း ဒရုန်း Team၊ YEF ဒရုန်း Team တို့က ပူးပေါင်းဆောင်ရွက်ခဲ့ပါတယ်။

ဧပြီ ၂၇ရက်နေ့ မနက်ပိုင်းမှာလဲ သထုံပြည်သူ့ကာကွယ်ရေးပူးပေါင်းတပ်ဖွဲ့တို့က သိမ်ဆိပ်ရဲစခန်း၊ ခမရ ၉ နဲ့ အမတ ၃၁၄တို့ကို ဒရုန်းနဲ့ ဗုံးသီးချပြီးတိုက်ခိုက်ခဲ့ပါတယ်။

မကွေးတိုင်း၊ ယောဒေသ၊ ထီးလင်းမြို့နယ်မှာတော့ စစ်ကောင်စီတပ်စွဲထားတဲ့ နေရာ ၂ ခု တိုက်ခိုက်ခံရလို့ စစ်ကောင်စီတပ်သား ၂ ယောက် သေဆုံးပြီး ၁၀ ယောက် ဒဏ်ရာရရှိခဲ့တယ်လို့ Yaw Revolution Army -YRA ထီးလင်းအဖွဲ့က ဧပြီ ၂၇ ရက်နေ့မှာ ထုတ်ပြန်ပါတယ်။

ဧပြီ ၂၅ ရက်နေ့ မနက် ၉ နာရီအချိန်မှာ ထီးလင်းမြို့နယ် ရွှေအောင်သာအထိုင်တပ်စခန်းကို ဒရုန်းနဲ့ ၆၀ မမ ဗုံးသီး ၃ လုံးကြဲချတိုက်ခိုက်ခဲ့ပြီး အထိုင်စခန်းက ဂိုဒေါင်မီးလောင်ခဲ့သလို စစ်ကောင်စီတပ်သား ၂ ဦး သေဆုံးပြီး ၇ ဦး ထိခိုက်ဒဏ်ရာရရှိခဲ့တယ်လို့ သိရပါတယ်။

YRA-ထီးလင်းတာဝန်ခံက “ရွှေအောင်သာစခန်းက ထီးလင်းမြို့တောင်ဘက် ၁၅ မိုင်အကွာကပါ၊ ပထမအကြိမ်ပစ်တော့ ဂိုဒေါင်မီးလောင်ပြီး ၂ ယောက် သေဆုံးပါတယ်၊ လက်နက်ကြီးတွေနဲ့ ပြန်ပစ်ပါတယ်၊ ရွှေအောင်သာက အိမ်ခြေ ၃၀ ကျော်ရှိတဲ့ရွာလေးပါ၊ အာဏာသိမ်းစ သူတို့ တပ်လာထိုင်တော့ ရွာသားတွေက ရှောင်နေကြရတာပါ”လို့ ပြောပါတယ်။

ဧပြီ  ၂၆ ရက်နေ့ မနက် ၇ နာရီအချိန်မှာလည်း ထီးလင်းမြို့နယ်၊ ရေမျက်နီနယ်မြေရဲကင်းစခန်းကို ဒရုန်းနဲ့ ၆၀ မမဗုံး ၂ လုံးကြဲချပြီးနောက် လက်နက်ငယ်တွေနဲ့ ပစ်ခတ်ခဲ့လို့ စစ်ကောင်စီတပ်သား ၃ ယောက် ထိခိုက်ဒဏ်ရာရရှိခဲ့တယ်လို့ သိရပါတယ်။

YRA-ထီးလင်းတာဝန်ခံက “ရေမျက်နီကိုပစ်တော့ သူတို့က ကတုတ်ကျင်းထဲ ဝင်ပုန်းကြတာ ပြန်မပစ်ဘူး။ ဒဏ်ရာရတဲ့သူတွေကိုတော့ စခန်းမှာပဲ ဆေးကုနေကြတယ်။ သူတို့မနိုင်တဲ့ လူနာတွေဆိုရင် ကျော-ကပစဘက်ကနေ လာခေါ်လေ့ရှိတယ်” လို့ ဆက်ပြောပါတယ်။

ထီးလင်းမြို့ပေါ်က စစ်ကောင်စီနဲ့ ပျူစောထီးပူးပေါင်းစစ်ကြောင်းက မြို့နဲ့ ၅ မိုင်ပတ်လည်က ကျေးရွာတွေကို စစ်ကြောင်းထိုးပြီး ရိက္ခာလုယူတာတွေ လုပ်ဆောင်နေတယ်လို့လည်း သိရပါတယ်။