မွန်ပြည်နယ်၊ ကျိုက်မရောမြို့နယ်၊ ကော့ဝမ်းကျေးရွာက စစ်ကောင်စီလက်အောက်ခံ ပြည်သူ့စစ်စခန်းတခုကို မွန်တော်လှန်ရေးပူးပေါင်းတပ်ဖွဲ့တွေက သိမ်းပိုက်နိုင်ခဲ့တယ်လို့ ဘီလူးကျွန်းအခြေစိုက် BELU ယက္ခဒီပ ပြည်သူ့ကာကွယ်ရေးတပ်ဖွဲ့က ပြောပါတယ်။

ဧပြီ ၉ရက်နေ့ မွန်းလွဲ ၁ နာရီမှာ မွန်တော်လှန်ရေးပူးပေါင်းတပ်တွေက ကော့ဝမ်းရွာက ပြည်သူ့စစ်စခန်းကို အလစ်အငိုက်ဝင်ရောက်ခဲ့ပြီး ပြည်သူ့စစ်တွေက ပြန်မခုခံနိုင်ဘဲ လက်နက်ချအညံ့ခံခဲ့လို့ ပြည်သူ့စစ်ခေါင်းဆောင်အပါအဝင် ပြည်သူ့စစ် ၄ ယောက်ကို အရှင်ဖမ်းမိခဲ့ပြီး သေနတ် ၁၀ လက်နဲ့ ကျည် ၅၄၃ တောင့်လည်း သိမ်းဆည်းရရှိခဲ့ပါတယ်။

BELU ယက္ခဒီပြည်သူ့ကာကွယ်ရေးတပ်ဖွဲ့တာဝန်ရှိသူတယောက်က “ကျနော်တို့ ရုတ်တရက် ဝင်စီးလိုက်တော့ သူတို့ဘက်ကပြန်လည်တိုက်ခိုက်ဖို့မဖြစ်နိုင်တော့ တိုက်ပွဲတော့မဖြစ်သွားပါဘူး။ လက်နက်တွေနဲ့အတူ ၄ ဦးကို အရှင်ဖမ်းမိတယ်။ တိုက်ပွဲမဖြစ်သွားတဲ့အတွက် အထိအခိုက် မရှိသွားပါဘူး” လို့ ပြောပါတယ်။

မွန်ပြည်သစ်ပါတီ(စစ်အာဏာရှင်တိုက်ဖျက်ရေး) NMSP-AD ပြန်ကြားရေးတာဝန်ခံ နိုင်ကောင်းစကား ကလည်း ဖမ်းဆီးရမိခဲ့တဲ့ ပြည်သူ့စစ် ၄ ဦးထဲက ကော့ဝမ်းပြည်သူ့စစ်ခေါင်းဆောင်ကို ဆက်လက်ထိန်းသိမ်းထားပြီး ကျန်တဲ့ ၃ ယောက်ကို ပြန်လွှတ်ပေးခဲ့တယ်လို့ ပြောပါတယ်။

“သူတို့စစ်အာဏာရှင်ရဲ့ထောက်တိုင်ဖြစ်တဲ့ ပြည်သူ့စစ်ဖြစ်လို့ အကြိမ်ကြိမ်သတိပေးခဲ့ပေမယ့် ဝေ့လယ်ကြောင်ပတ်‌လုပ်နေလို့ အချိန်မီ ဝင်စီးခဲ့တာပါ။ ပြည်သူ့စစ်ခေါင်းဆောင်ကလွဲပြီး ကျန်တဲ့ ၃ ဦးကိုတော့ ကျနော်တို့လွှတ်ပေးလိုက်ပါပြီ” လို့ပြောပါတယ်။

ကော့ဝမ်းပြည်သူ့စစ်စခန်းကို NMSP-AD၊ BELU ယက္ခဒီပြည်သူ့ကာကွယ်ရေးတပ်ဖွဲ့နဲ့ SG Production  အဖွဲ့တို့က ပူးပေါင်း ဝင်ရောက်သိမ်းပိုက်ခဲ့တာဖြစ်ပြီး ပြီးခဲ့တဲ့ မတ် ၂ ရက်နေ့ကလည်း မုဒုံမြို့နယ်၊ ကမာဝက်မြို့နဲ့ ကော့ပီးထူးကျေးရွာက ပြည်သူ့စစ်ခေါင်းဆောင် ၃ ယောက်ကို လက်နက် ၁၅ လက်၊ ကျည်ဆံအမြောက်အမြားနဲ့အတူ NMSP-AD က ဖမ်းဆီးခဲ့ပါတယ်။