ကချင်ပြည်နယ်၊ ဖားကန့်မြို့နယ်၊ ကာမိုင်း - လဝါး လမ်းဆုံဂိတ်မှာ စစ်ဆေးရေးပြုလုပ်နေတဲ့ စစ်ကောင်စီလက်အောက်ခံ ပြည်သူ့စစ်အဖွဲ့က အမျိုးသားတယောက်ကို သေနတ်နဲ့ ပစ်သတ်ခဲ့တယ်လို့ ဒေသခံတွေဆီက သိရပါတယ်။
ဧပြီ ၁၁ ရက် ညပိုင်းမှာ လဝါးကျေးရွာက ဥယျာဉ်ခြံကိုသွားတဲ့ အမျိုးသားတယောက်ကို စစ်ဆေးရေးဂိတ်မှာရှိတဲ့ ပြည်သူ့စစ်တပ်ဖွဲ့က သေနတ်နဲ့ ၄ ချက် ပစ်သတ်ခဲ့ကြောင်း ဒေသခံတွေက ပြောပါတယ်။
ဒေသခံတယောက်က “အမြဲတမ်းလည်း ဥယျာဉ်ခြံထဲသွားဖို့ အဲနားက ဖြတ်သွားနေကျပဲ။ အပစ်ခံရတာက ည ၇ နာရီလောက်က အပစ်ခံရတာ။ ၄ ချက် အပစ်ခံရတယ်။ မနက်မှပဲ အလောင်းသွားကောက်ပြီး သင်္ဂြိုလ်လိုက်ရတယ်။ ဘာကြောင့် ပစ်လဲတော့ မသိဘူး” လို့ ပြောပါတယ်။
ပစ်ခတ်ခံရလို့ သေဆုံးသူဟာ အသက် ၄၀ ကျော်အရွယ် ဦးဂျန်မော်တူးအောင်ဖြစ်ပြီး လည်ပင်း၊ ကျောနဲ့ ခြေထောက်မှာ ကျည်ဆန်ထိမှန် ဒဏ်ရာ ၄ ချက် ရခဲ့တယ်လို့ သိရပါတယ်။
ပြီးခဲ့တဲ့ ၂၀၂၃ ခုနှစ်၊ မတ် ၃၀ ရက်နေ့ကလည်း ကာမိုင်းစစ်ဆေးရေးဂိတ်မှာ စစ်ဆေးခံပြီးမောင်းနှင်လာတဲ့ မော်တော်ယာဉ်ကို စစ်ကောင်စီတပ်က သေနတ်နဲ့လှမ်းပစ်တဲ့အတွက် ကိုမိုက်မိုက်ဆိုသူ ယာဉ်မောင်း သေဆုံးခဲ့ပါသေးတယ်။
