ထိုင်းနိုင်ငံမြောက်ပိုင်းမှာ ဧပြီ  ၈ ရက် မနေ့က တနေ့တည်း နယ်စပ်ကနေ ဝင်လာတဲ့ စိတ်ကြွဆေး ၇ သန်းနီးပါး ဖမ်းဆီးရမိတယ်လို့ မယ်ဆိုင်ဒေသတွင်းသတင်းမှာ ဖော်ပြပါတယ်။ 

မနေ့မနက် မနက် ၁ နာရီလောက်က တာဝန်ရှိသူတွေဟာ လမ်းပွန်းမြို့နယ် မဲ့ထားစစ်ဆေးရေးဂိတ်ကနေ ယာဉ်အသွားအလာတွေ စောင့်ကြပ်စစ်ဆေးနေစဉ် ချင်းမိုင်ဘက်က ဝင်လာတဲ့ ငှက်ပျောသီးတင် အဖြူရောင်ဟိုင်းလပ်စ်ကား  တစီးကို စစ်ဆေးခဲ့ပါတယ်။

စစ်ဆေးချက်အရ ငှက်ပျောဖီး ငှက်ပျောခိုင်တွေအောက်မှာ ရောင်စုံအိတ်တွေပါလာတာ တွေ့ရလို့ ဖွင့်ဖောက်စစ်ဆေးရာမှာတော့ အထဲမှာ စိတ်ကြွဆေး စုစုပေါင်း ၅,၈၀၀,၀၀၀ ကို တွေ့ရှိရတယ်လို့ ဆိုပါတယ်။ ဒီကိစ္စနဲ့ ပတ်သက်ပြီး ထိုင်း-မြန်မာနယ်စပ် ဝိန်းဟိုင်မြို့နယ်က ကားမောင်းသမား ၁ ဦးနဲ့ အဖော် ၁ ဦးတို့ကို ရဲတပ်ဖွဲ့က ဖမ်းဆီးစစ်ဆေးနေတယ်လို့ ဆိုပါတယ်။ 

နောက်ဖြစ်စဉ်တခုမှာ မနေ့ မနက် ၆ နာရီလောက်က နယ်ခြားစောင့်တပ်နဲ့ ကွန်မန်ဒိုတပ်ပူးပေါင်းအဖွဲ့တွေဟာ ချင်းမိုင်ခရိုင် ချင်းဒေါင်းမြို့နယ် မယ်နာ့အုပ်စု ကင်ပန်တောင်း စစ်ဆေးရေးဂိတ်မှာ  လုံခြုံရေးစောင့်ကြပ်စစ်ဆေးစဉ် အနက်ရောင်အိမ်စီးကားတစီးကိုပါ စစ်ဆေးခဲ့ပါတယ်။ 

ယာဉ်မောင်းသမားမှာ မသင်္ကာဘွယ်အပြုအမူရှိတာကြောင့် ကားတစီးလုံး မွှေနှောက်စစ် ဆေးရာက အိတ် ၄ အိတ်ကို တွေ့ရှိပြီး အဆိုပါအိတ်တွေထဲကနေ ၉၉၉ အမှတ်တံဆိပ် စိတ်ကြွဆေး စုစုပေါင်း ၁ သန်းကို တွေ့ရှိတာလို့ ဆိုပါတယ်။ ကားမောင်းသမားက အဲဒီအထုတ်တွေကို အခကြေးငွေ ဘတ် ၁ သိန်းခွဲနဲ့ အငှားသယ်ပေးခဲ့တာလို့ ထွက်ဆိုသွားပါတယ်။ 

အဲဒီနေ့ တရက်တည်းမှာပဲ ချင်းမိုင်ခရိုင် မဲ့အိုင်းမြို့နယ် မြန်မာနယ်စပ် တောအုပ်ထဲကနေ နောက်ထပ်စိတ်ကြွဆေး ၁၅၈, ၀၀၀ ကို သိမ်းဆည်းရမိခဲ့ပါတယ်။ 

ထိုင်းစစ်တပ် နဲ့ နယ်ခြားစောင့်ရဲတွေ ပူးပေါင်းပြီး နယ်စပ်လုံခြုံရေးကင်းလှည့်စစ်ဆေးစဉ်  ည ၈ နာရီဝန်းကျင်မှာ မလိကာအုပ်စု ဘန့်ပထိရွာအနီး တောအုပ်ထဲကို လူတစုဝင်ရောက်လာကြောင်း၊ စစ်ဆေးဖို့ ရပ်မိန့်ပေးလိုက်ရာမှာ တဖက်က ရပ်မပေးဘဲ သေနတ်နဲ့ ပြန်ပစ်တာကြောင့် နှစ် ဖက်အပြန်အလှန်တိုက်ပွဲဖြစ်ခဲ့တယ်၊ မနေ့ညက အဲဒီနေရာကို ထိန်းချုပ်ထားပြီး ဒီကနေ့မနက် ပြန်သွားစစ်ဆေးရာမှာတော့ ကျောပိုးအိတ် နှစ်လုံးထဲကနေ စိတ်ကြွဆေး ၁၅၈၀၀၀ နဲ့ အတူ ပြောင်းရှည်သေနတ်တလက်ပါ သိမ်းဆည်းရမိကြောင်း တာဝန်ရှိသူက သတင်းထောက်တွေကို ပြောပါတယ်။  

photo-Maesaipress