လတ်တလောဒရုန်းနဲ့ တိုက်ခိုက်ခံထားရတဲ့ နေပြည်တော်မှာ သင်္ကြန်ပွဲကို စည်ကားသိုက်မြိုက်စွာ ပြုလုပ်နိုင်ဖို့ ရုရှားနိုင်ငံ၊ တရုတ်နိုင်ငံနဲ့ ကိုရီးယားနိုင်ငံက မဏ္ဍပ်တွေအပြင် ကိုရီးယားနာမည်ကြီး K Pop အဖွဲ့နဲ့ နာမည်ကြီး အဆိုတော်တွေပါ ဖိတ်ခေါ်ကျင်းပဖို့ စစ်ကောင်စီက စီစဉ်နေပါတယ်။
စစ်ကောင်စီကတော့ နေပြည်တော် လမ်းလျှောက်သင်္ကြန် ပြုလုပ်ဖို့အတွက် မြို့တော်ဝန်မဏ္ဍပ်နဲ့ မြို့တော်ဝန်မဏ္ဍပ်အနီးမှာ ဝန်ကြီးဌာနအလိုက် မဏ္ဍပ်တွေ စတင်ဆောက်လုပ်နေပြီး ဌာနအလိုက် ယိမ်းအကအဖွဲ့တွေရဲ့ ကြိုတင်လေ့ကျင့်မှုတွေလည်း ပြုလုပ်နေပါတယ်။
ရုရှားနိုင်ငံသံရုံးက မဏ္ဍပ်တခု၊ ကိုရီးယားနိုင်ငံက သရုပ်ဆောင်တွေနဲ့ နာမည်ကြီး K-Pop အဖွဲ့အပြင် မြန်မာ-တရုတ် ချစ်ကြည်ရေးအသင်းလည်း လာရောက်ဆင်နွှဲမှာဖြစ်တယ်လို့ စစ်ကောင်စီပြန်ကြားရေးဝန်ကြီးက နေပြည်တော် လမ်းလျှောက်သင်္ကြန် ကျင်းပရေး ကော်မတီအစည်းအဝေးမှာ ပြောပါတယ်။
ကိုရီးယားနိုင်ငံက နာမည်ကြီး K-Pop အဖွဲ့အပြင် ရုရှားနိုင်ငံနဲ့ နီးနီးကပ်ကပ် ပူးပေါင်းနေတဲ့ စစ်ကောင်စီဟာ ရုရှားက လူငယ်အနုပညာရှင်အဖွဲ့ဖြစ်တဲ့ တာဗီဒါအက်ထ်က ပင်တိုင်အမျိုးသမီးအဆိုတော် နီကာဒါဗစ် ဦးဆောင်တဲ့ အနုပညာအဖွဲ့လည်း လာရောက်မှာဖြစ်ပြီး မြန်မာလူငယ်အဆိုရှင် မိုးအာကာဝင်း ဆိုသူနဲ့ တွဲကာ မြန်မာ-ရုရှား နှစ်ဘာသာနဲ့ ရေးထားတဲ့ သီချင်းတွေလည်း ဖျော်ဖြေသွားမယ်လို့ သိရပါတယ်။
ရန်ကုန်၊ မန္တလေး၊ နေပြည်တော်နဲ့ တည်ငြိမ်အေးချမ်းတဲ့ မြို့နယ်တွေမှာ သင်္ကြန်ပွဲတော်ကို စည်စည်ကားကား ပြုလုပ်နိုင်ဖို့ သင်္ကြန်မဏ္ဍပ် ဆောက်လုပ်ခွင့်တွေကို ဖြေလျော့မှုတွေ ပြုလုပ်ပေးနေတယ်လို့ သိရပါတယ်။
နေပြည်တော်ရှိ စစ်ရုံးချုပ်နဲ့ အေလာလေတပ်တို့ကို ပြည်သူ့ကာကွယ်ရေးတပ်မတော် (PDF) တပ်တွေက ဧပြီ ၄ ရက် မနက်ပိုင်းမှာ ဒရုန်းအစင်း ၃၀ လောက်နဲ့ တိုက်ခိုက်ခဲ့တာမှာ ၁၃ စင်းကို သိမ်းဆည်းရမိတယ်လို့ စစ်ကောင်စီက သတင်းထုတ်ထားပါတယ်။
