ကရင်ပြည်နယ်၊ မြဝတီမြို့၊ စစ်ကောင်စီတပ်စခန်းအနီးက ကျေးရွာတွေကို ဧပြီ ၅ ရက် မနက် ၄ နာရီလောက်ကစတင်ပြီး စစ်ကောင်စီရဲ့ ခလရ ၂၇၅ တပ်ဘက်ကနေ လက်နက်ကြီးတွေနဲ့ ပစ်ခတ်တိုက်ခိုက်နေတယ်လို့ ဒေသခံတွေက ပြောပါတယ်။
ဒါအပြင် မနက် ၉ နာရီလောက်က လက်ခတ်တောင်၊ ကွင်းကလေး၊ ထီးမူးထ၊ ဝှေ့ရှမ်း၊ ဇရပ်ဖြူကုန်း၊ ပေါလော၊ သံပုရာ၊ ခြေတော်ရာ ဘုရားတောင်နေရာတွေကို လေကြောင်းကနေ ၃ ကြိမ်လာရောက် ဗုံးကြဲတိုက်ခိုက်ခဲ့ပါတယ်။
စစ်ကောင်စီရဲ့ ခလရ ၂၇၅၊ သင်္ကန်းညီနောင်ဗျူဟာနဲ့ တပ်စခန်းတွေကို KNLA၊ PDF ပူးပေါင်းစစ်ကြောင်းတွေရဲ့ ပိတ်ဆို့တိုက်ခိုက်ခံနေရတာကြောင့် မြေပြင်လက်နက်ကြီးအပြင် လေကြောင်းကနေ နေ့တိုင်းလိုလို ပစ်ကူပေးပစ်ခတ်နေတာလို့ ဒေသခံတွေက ပြောပါတယ်။
ဒေသခံတဦး”အခြေအနေက ထုနေတာ အကြီးအကျယ်ပဲ။ ဘာတွေနဲ့ ကြဲနေလဲတော့ မသိဘူး။ ဒီမနက် ၄ နာရီလောက်က ထပ်ချနေတာ အခုထက်ထိပဲ။ လေယာဉ်ကလည်း သုံးခေါက်လာသွားတယ်။ အခုပဲ ကျမခေါင်းရင်းက ဖြတ်သွားတယ်။ ကျောက်မိုင်း၊ ၂၇၅ နဲ့ မေတ္တာလင်းမြိုင်က တဆက်တည်းပဲ။ အဲဒီဘက်မှာ တော်လှန်ရေးအင်အားစုတွေက ပိတ်ထားတယ်”လို့ ပြောပါတယ်။
မြေပြင်လက်နက်ကြီးအပြင် လေကြောင်းတိုက်ခိုက်မှုတွေကြောင့် မြစန္နီ၊ ဝှေ့ရှမ်း၊ သင်္ကန်းညီနောင်၊ မဲကနယ်၊ မေတ္တာလင်းမြိုင်၊ မင်းလက်ပံ၊ မယ်ဝါးခီး ၊ ပဟိကလော်၊ မယ်ထော်သလေး၊ အင်းကြင်မြိုင်၊ ဖလူး၊ ရသေ့ဂူစတဲ့ကျေးရွာက သောင်းနဲ့ချီတဲ့ ဒေသခံတွေဟာ ထွက်ပြေးတိမ်းရှောင်နေရပြီး နေထိုင်စားသောက်ရေးမှာ အခက်အခဲတွေနဲ့ ရင်ဆိုင်နေရတယ်လို့ စစ်ရှောင်အရေးကူညီပေးနေသူတွေ ဆီက သိရပါတယ်။
