ချင်းပြည်နယ်၊ ပလက်ဝမြို့နယ်၊ ဆမီးမြို့မှာ မြေမြုပ်မိုင်းနင်းမိပြီး အရပ်သား တဦးသေဆုံးခဲ့ကြောင်း ဒေသခံတွေက ပြောပါတယ်။
ဧပြီ ၁ ရက် မနက် ၁၁ နာရီအချိန်မှာ ဆမီးမြို့အပြင်ဘက် တောင်ယာသွားတဲ့လမ်းမှာ အမျိုးသား တဦး မိုင်းနင်းမိခဲ့တာပါ။
မိုင်းနင်းမိသူဟာ ဆမီးမြို့ အမှတ်-၂ ရပ်ကွက်မှာ နေထိုင်တဲ့ အသက် ၆၅ နှစ်အရွယ် ဦးလိုက်ထန် ဖြစ်ပါတယ်။
ဦးလိုက်ထန်ဟာ မြေမြုပ်မိုင်းနင်းမိလို့ ခြေ နှစ်ဖက်ပြင်းထန်ဒဏ်ရာရရှိခဲ့ပြီး ရခိုင်ပြည်နယ် ဆေးရုံတခုမှာ ဧပြီ ၂ ရက် မနက် ၉ နာရီအချိန်မှာ သေဆုံးခဲ့ပါတယ်။
ဆမီးဒေသခံတဦးက“သူ့ယာခင်းကိုသွားတဲ့ လမ်းမှာပေါ့နော် မိုင်းနင်းမိပြီးတော့ ခြေ နှစ်ဖက်ပြတ်ထွက်သွားတာပေါ့။ ဒဏ်ရာကပြင်းထန်တဲ့ အခါကျတော့ သူ့ကိုဆေးရုံကို သွားပို့တာပေါ့။ ဆေးရုံမှာဘဲ သေသွားတယ်” လို့ ပြောပါတယ်။
သေဆုံးသူအရပ်သားနင်းမိခဲ့တဲ့ မြေမြုပ်မိုင်းဟာ ၂၀၂၃ နှစ်ကုန်ပိုင်းနဲ့ အခုနှစ်အစောပိုင်း ဆမီးမြို့မှာ စစ်ကောင်စီတပ်နဲ့ ရက္ခိုင့်တပ်တော်(AA) တို့ရဲ့ တိုက်ပွဲအကြားထောင်ထားခဲ့တဲ့ လက်ကျန်မိုင်းတွေဖြစ်တယ်လို့ ဒေသခံတွေက ပြောပါတယ်။
