မွန်ပြည်နယ်နဲ့ တနင်္သာရီအစပ်မှာရှိတဲ့ မလွှဲတောင်စစ်ဆေးရေးဂိတ်ကို တော်လှန်ရေး ပူးပေါင်းတပ်ဖွဲ့တွေက မတ် ၂၉ ရက်နေ့မှာ ဝင်ရောက်တိုက်ခိုက်ပြီးနောက် စစ်ကောင်စီက ရေဖြူမြို့နယ်ထဲက ကျေးရွာတွေကို ရဟတ်ယာဉ်နဲ့ ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ယောက် ဒဏ်ရာရရှိခဲ့တယ်လို့ ဒေသခံတွေက ပြောပါတယ်။

မွန်-တနင်္သာရီအစပ် ရေး-ထားဝယ် အမှတ် ၈ ပြည်ထောင်စုလမ်းမပေါ်က အင်အား ၃၀ လောက်ရှိတဲ့ မလွှဲတောင်စစ်ဆေးရေးဂိတ်ကို မွန်ပြည်တော်လှန်ရေးတပ်(MSRF) ပူးပေါင်းတပ်တွေက မတ် ၂၉ ရက် မွန်းတည့် ၁၂ နာရီလောက်မှာ ဝင်ရောက်တိုက်ခိုက်ခဲ့ပြီး တော်လှန်ရေးတပ်ဖွဲ့တွေ ပြန်ဆုတ်သွားခဲ့ပေမယ့် စစ်ကောင်စီက အနီးအနားကျေးရွာတွေကို ရဟတ်ယာဉ်နဲ့ပစ်ခတ်ခဲ့ပါတယ်။

စစ်ကောင်စီက မလွှဲတောင်ဂိတ်အနီး ရေဖြူမြို့နယ်ထဲက လော့သိုင်းကျေးရွာအုပ်စုထဲမှာရှိတဲ့ လော့သိုင်းရွာ၊ ကျွဲတလင်းရွာနဲ့ အလယ်စခန်းရွာ၊ ရာဖူးကျေးရွာအုပ်စုထဲမှာရှိတဲ့ ရာဖူးရွာနဲ့

ကျောက်တလင်းရွာတို့ နေ့လယ် ၁ နာရီကနေ  ညနေ ၅ နာရီအထိ ရဟတ်ယာဉ်နဲ့ ဗုံးကြဲခဲ့တာကြောင့် ရာဖူးရွာသား အမျိုးသမီးတဦး ဒဏ်ရာရရှိခဲ့ပါတယ်။

ရေဖြူဒေသခံတယောက်က “အခု ‌ဗုံးကြဲခံရလို့ ရွာလုံးကျွတ်တွေကို တိမ်းရှောင်နေရပါတယ်။ အခုလက်ရှိ အထိအခိုက်စာရင်း သိထားရတာကတော့ ရာဖူးဒေသခံအမျိုးသမီးတဦး ဒဏ်ရာရပြီး အိမ် ၂ လုံး မီးလောင်ထားပါတယ်။ အခု အခြေအနေက ပြန်ငြိမ်နေပြီ‌ဆိုပေမယ့် ‌စိတ်ချရတဲ့ အခြေအနေ မဟုတ်သေးပါဘူး” လို့ ပြောပါတယ်။

မလွှဲတောင်စစ်ဆေးရေးဂိတ် တိုက်ခိုက်ခံရပြီးနောက် စစ်ကောင်စီက ရဟတ်ယာဉ်နှစ်စီးနဲ့ ဗုံးကြဲတိုက်ခိုက်နေပြီး တိုက်ပွဲနဲ့ပတ်သက်တဲ့ အသေးစိတ်ကိုတော့ ထုတ်ပြန်ပေးသွားမယ်လို့ မွန်ပြည်တော်လှန်ရေးတပ်ရဲ့ ပြောရေးဆိုခွင့်ရှိသူ နာဲနဂါး(နိုင်နဂါး) က ဒီဗွီဘီကို ပြောပါတယ်။

ပြီးခဲ့တဲ့ မတ် ၂၃ ရက်နေ့ကလည်း ရေး-ထားဝယ် အမှတ် ၈ ပြည်ထောင်စုလမ်းမပေါ်က အင်အား ၃၀ ကျော်ရှိတဲ့ မလွှဲတောင်စစ်ဆေးရေးဂိတ်ကို တော်လှန်ရေးပူးပေါင်းတပ်တွေက ဒရုန်းနဲ့ဗုံးသီး ၄ လုံး ကြဲချတိုက်ခိုက်ခဲ့တာကြောင့် စစ်ကောင်စီတပ်သားတွေက ဂိတ်ကိုပိတ်ပြီး ထွက်ပြေးခဲ့ပါတယ်။