ကချင်ပြည်နယ်၊ ဝိုင်းမော်မြို့နယ်မှာ မတ် ၁၅ နေ့လယ်ပိုင်းက ကုန်တင်ယာဉ် ၂ စီး မျက်နှာချင်းဆိုင် တိုက်မိပြီး ကလေးငယ် ၁ ယောက် အပါအဝင် ၇ ယောက် ထိခိုက်ဒဏ်ရာရခဲ့တယ်လို့ သိရပါတယ်။
မိုင်းနားကျေးရွာလမ်းဆုံအနီးမှာ သဲကျောက်တင်လာတဲ့ ကားနဲ့ ထင်းတွေ တင်လာတဲ့ ကားတို့ တိုက်မိပြီး ကားပေါ်က ကလေးငယ်အပါအဝင် အမျိုးသား၊ အမျိုးသမီးတွေ ဒဏ်ရာရခဲ့တာလို့ ဒေသခံတွေက ပြောပါတယ်။
ဒေသခံတယောက်က “နေ့လယ် ၁ နာရီလောက်က မိုင်းနားလမ်းဆုံအနီးမှာ ထင်းသယ်တဲ့ တုန်ဖုံးကားနဲ့ သဲကျောက်တင်တဲ့ တုန်ဖုံးကား မျက်နှာချင်းဆိုင်တိုက်မိတာ။ ထင်းသယ်တဲ့ ကားမှောက်ပြီး ကားပေါ်က အမျိုးသမီးတွေနဲ့ ကလေးတယောက် ဒဏ်ရာရသွားတယ်။ အမျိုးသားတယောက်ကတော့ ထင်းတွေပိမိလို့ ဒဏ်ရာပြင်းထန်တယ်” လို့ ပြောပါတယ်။
ထင်းသယ် မော်တော်ယာဉ်တိမ်းမှောက်ပြီး ယာဉ်ပေါ်လိုက်ပါလာတဲ့ အသက် ၂ နှစ်အရွယ် ကလေးငယ်အပါအဝင် အမျိုးသမီး ၆ ယောက် ပွန်းပဲ့ ဒဏ်ရာရရှိခဲ့ပြီး အမျိုးသားတယောက်ကတော့ ညာနံရိုးကျိုးခဲ့တာကြောင့် လူမှုကူညီရေးအဖွဲ့တွေက မြစ်ကြီးနား ပြည်သူ့ဆေးရုံဆီ ပို့ဆောင်ပေးခဲ့ ကြပါတယ်။
ဝိုင်းမော်မြို့နယ်မှာ ပြီးခဲ့တဲ့ ဖေဖော်ဝါရီ ၁၅ ရက်ကလည်း ဆဒုံး-ကန်ပိုင်တည်လမ်းမှာ တာယာတင်လာတဲ့ မော်တော်ယာဉ်တစီးတိမ်းမှောက်လို့ ယာဉ်မောင်းသေဆုံးပြီး ယာဉ်ပေါ်ပါ အမျိုးသားတယောက် ထိခိုက်ဒဏ်ရာ ရှိခဲ့ပါတယ်။
ပုံ-လူမှုကူညီရေးအသင်း
