ကေအိုင်အေ ပူးပေါင်းတပ်တွေရဲ့ ကချင်ပြည်နယ်ထိုးစစ်အတွင်း မတ်လ ၈ ရက် မနေ့ နေ့လယ်ပိုင်းက ဝိုင်းမော်မြို့နယ်၊ အောင်မြေ ၁ ကျေးရွာရှိ စစ်ကောင်စီတပ်လက်အောက်ခံ ပြည်သူ့စစ်စခန်းကို   ကချင်တော်လှန်ရေးတပ်တွေက တိုက်ခိုက်သိမ်းပိုက်ခဲ့ကြောင်း ဒေသခံတွေထံက သိရပါတယ်။ 

အောင်မြေ ၁ ကျေးရွာ က လီဆူပြည်သူ့စစ်တွေ စခန်းချတပ်စွဲထားတဲ့ အင်လုန်ခ (Nlung Hka) တပ်စခန်းကို ကချင်လွတ်လပ်ရေးတပ်မတော် (ကေအိုင်အေ)နဲ့ တော်လှန်ရေး ပူးပေါင်းတပ်ဖွဲ့တွေက တိုက်ခိုက်သိမ်းပိုက်ခဲ့တာဖြစ်ပါတယ်။

ဒေသခံအမျိုးသားတဦးက “အင်လုန်ခ တံးတား တဘက်ခြမ်းကနေ ပြည်သူ့စစ်စခန်းကို လှမ်းပစ်ပြီး ဒီနေ့ (မတ် ၈ ရက်) နေ့လယ် ၁ နာရီလောက်မှာ စခန်းသိမ်းနိုင်သွားတယ်"လို့ ပြောပါတယ်။

ကေအိုင်အေတိုက်ခိုက်သိမ်းပိုက်လိုက်တဲ့ ပြည်သူ့စစ်စခန်းဟာ လီဆူပြည်သူ့စစ်ခေါင်းဆောင်  ဦးရွှေမင်း ဦးဆောင်ဖွဲ့စည်းထားတဲ့ ဝိုင်းမော်မြို့နယ်က အကြီးဆုံး ပြည်သူ့စစ်တပ်စခန်း ဖြစ်ပြီး ထိခိုက်သေဆုံးမှုကိုတော့ သက်ဆိုင်ရာအဖွဲ့အစည်းတွေက ထုတ်ပြန်ထားတာ မရှိသေးပါဘူး။

လီဆူပြည်သူ့စစ်အဖွဲ့ကို မတ်လ ၇ ရက် မနက်ပိုင်းမှာ ဝိုင်းမော်မြို့နယ် ခါးရှိကျေးရွာအနီး ကေအိုင်အေက ပစ်ခတ်တိုက်ခိုက်ခဲ့တဲ့အတွက် ပြည်သူ့စစ်ခေါင်းဆောင် ဦးရွှေမင်းအပါအဝင် သုံးဦး သေဆုံးခဲ့ပါတယ်။