ကချင်ပြည်နယ်၊ ဖားကန့်မြို့နယ်မှာ မတ် ၅ ရက် ညက ကျောက်စိမ်းကုမ္ပဏီဝန်ထမ်း အမျိုးသား ၂ ဦး ဖမ်းဆီးခံခဲ့ရတယ်လို့ သိရပါတယ်။
ဆိပ်မူကျေးရွာအုပ်စု၊ ကောင်ဆန်ကျေးရွာမှာရှိတဲ့ ကျောက်စိမ်းကုမ္ပဏီလုပ်ကွက်အတွင်း အမည်မသိ လက်နက်ကိုင်အဖွဲ့က ဝင်ရောက်ပြီး ဝန်ထမ်းအမျိုးသား ၂ ဦးကို ဖမ်းဆီးသွားတာလို့ ရေမဆေးကျောက်ရှာဖွေသူတဦးက ပြောပါတယ်။
“ည ၈ နာရီလောက် လုပ်ကွက်ထဲ လာဖမ်းသွားတယ်။ သေနတ်ကိုင်ထားတဲ့ အင်အား ၂၀ လောက်က လာဖမ်းသွားတာ။ အဖမ်းခံရတာ ကုမ္ပဏီဝန်ထမ်းပဲ။ ဘာလို့ဖမ်းလဲတော့ မသိရဘူး။ အဲ့လိုဝင်ဖမ်းသွားတော့ အနားက လုပ်ကွက်လည်း နားသွားတယ်။”
အမည်မသိ လက်နက်ကိုင်အဖွဲ့က မြန်မာ့တကောင်းကုမ္ပဏီမှာ ကျောက်စိမ်းလုပ်ငန်း လုပ်ကိုင်နေသူ ဝန်ထမ်း ၂ ဦးကို ဖမ်းဆီးသွားတာ ဖြစ်ပါတယ်။
စစ်အာဏာသိမ်းပြီးနောက်ပိုင်း ဖားကန့်မြို့နယ်မှာ လက်နက်ပြ ဖမ်းဆီးမှု၊ သေနတ်ပစ်ခတ်မှု၊ ပိုင်ရှင်မဲ့ အလောင်းစွန့်ပစ်မှု၊ အနုကြမ်းစီး ဓားပြတိုက်မှု၊ လုယက် သတ်ဖြတ်မှု၊ ပြန်ပေးဆွဲမှုတွေ မကြာခဏ ဖြစ်ပွားနေပြီး စစ်ကောင်စီလက်အောက်ခံ ရဲတပ်ဖွဲ့ကတော့ ဖြစ်စဉ်အတော်များများကို ဖမ်းဆီးအရေးယူနိုင်တာတွေ မရှိသေးပါဘူး။
