ရန်ကုန်၊ လှိုင်သာယာမြို့နယ်၊ ဘုရင့်နောင်အမှတ် (၂) တံတားအဆင်းလမ်းမှာ ကားတိုက်ခံရပြီး မီးစက်ပိမိကာ သေဆုံးနေတဲ့ အမျိုးသား ၂ ဦးရဲ့ ရုပ်အလောင်းကို ဒီဇင်ဘာ ၉ ရက် မနက် ၆ နာရီလောက်က တွေ့ရှိခဲ့တယ်လို့ မြို့ခံကယ်ဆယ်ရေးအသင်းတွေက ပြောပါတယ်။
သေဆုံးသူတွေဟာ တံတားအဆင်းလမ်းမှာ လမ်းပြုပြင်နေကြတဲ့ လမ်းလုပ်သားတွေ ဖြစ်ကြတဲ့ အသက် ၁၈ နှစ်အရွယ် အမျိုးသား ၁ ဦးနဲ့ အသက် ၃၀ ဝန်းကျင် အမျိုးသား ၁ ဦးတို့ ဖြစ်ပါတယ်။
ညဘက်မှာ လမ်းပြုပြင်ရေးပစ္စည်းတွေကို စောင့်ကြည့်ဖို့အတွက် လမ်းမပေါ် အိပ်နေကြချိန်မှာ လမ်းအကာ ဘလောက်တုံးတွေနဲ့ မီးစက်ကို FUSO ကုန်တင် ၁၂ ဘီးကားက ဝင်တိုက်ခဲ့ပြီး အလုပ်သမား ၂ ဦး အိပ်နေတဲ့ အပေါ် ပိမိခဲ့တာလို့ သိရပါတယ်။
လှိုင်သာယာ PRO RESCUE တာဝန်ရှိသူတဦးက “မနက် ၆ နာရီလောက်မှာ တွေ့တာပါ။ ရုပ်အလောင်းတွေက တောင့်နေပြီ။ လမ်းအဆင်းမှာ ပေ ၃၀ လောက်ကို ဘလောက်တုံးတွေ ကာထားတာ၊ အတိုက်ခံရသူ ၂ ဦးက မီးစက်နားမှာ လမ်းပစ္စည်းတွေကို ညစောင့်အိပ်ရင်း ဖြစ်တာပါ။ မိသားစုတွေနဲ့ အဆက်အသွယ်ရပြီ။ ကားသမားကတော့ ထွက်ပြေးသွားတယ်” လို့ ဆိုပါတယ်။
ယာဉ်တိုက်မှုဖြစ်တာကို လမ်းအလုပ်သမားတွေ ရောက်လာတဲ့ မနက်ပိုင်းမှ သိရှိခဲ့တာဖြစ်ပြီး သေဆုံးရုပ်အလောင်း ၂ ခုစလုံးဟာ ကုန်တင်ကားအရှေ့ပိုင်းနဲ့ မီးစက်အောက်မှာ ညှပ်နေခဲ့တာကြောင့် ကယ်ဆယ်ရေးအဖွဲ့တွေ ရောက်ရှိပြီး နာရီဝက်ကျော်ကြာမှ ဆွဲထုတ်နိုင်ခဲ့ပါတယ်။
ရုပ်အလောင်း ၂ ခုစလုံးကို လှိုင်သာယာမြို့နယ်ဆေးရုံ ရင်ခွဲဌာနကို အရပ်ဘက်အသင်းယာဉ်နဲ့ ပို့ဆောင်ပေးထားပြီး ကုန်တင်ကား ယာဉ်မောင်းမှာ ထွက်ပြေးတိမ်းရှောင်သွားတယ်လို့ သိရပါတယ်။
