ရန်ကုန်၊ မင်္ဂလာဒုံမြို့နယ်၊ ထောက်ကြန့်စျေးလမ်းဆုံအနီးက ထောက်ကြန့်စျေးမှတ်တိုင်၊ ပြည်လမ်းမပေါ်မှာ ဩဂုတ် ၁၇ ရက် မနက်ပိုင်းက YBS 35 တက်ကြိတ်ခံခဲ့ရတာကြောင့် ဘုန်းကြီးတပါး ပျံလွန်သွားတယ်လို့ မြို့ခံတွေက ပြောပါတယ်။
ကားကြိတ်ခံရလို့ ပျံလွန်တဲ့ ဘုန်းကြီးဟာ မှော်ဘီမြို့နယ်ဘက်ကနေ ထောက်ကြန့်ဈေးကို နေ့တိုင်း ဆွမ်းခံကြွနေကျဖြစ်တယ်လို့ သိရပြီး မနက် ၈ နာရီခွဲလောက်က ပြည်လမ်းမကို လမ်းဖြတ်ကူးနေချိန် ရန်ကုန်ဘက်ကို မောင်းနှင်လာတဲ့ YBS 35 က ဝင်တိုက်ခဲ့တာ ဖြစ်ပါတယ်။
မြို့ခံကယ်ဆယ်ရေးအဖွဲ့ဝင်တဦးက “သက်တော်က ၅၀ ကျော်လောက်ပါ။ မှော်ဘီဘက်က လာတယ်လို့ပဲ သိရပါသေးတယ်။ ဘုန်းဘုန်းဆီက သံသပိတ်တလုံးပဲ တွေ့ရတယ်။ ကျောင်းကို စုံစမ်းနေပါတယ်။ ဘယ်လိုဖြစ်တာလဲဆိုတော့ ဘုန်းဘုန်းက ဒီလမ်းမကြီးကို ဖြတ်ကူးရင်း အတိုက်ခံရတာ။ မနက် ၈ နာရီခွဲလောက်။ ကားဘယ်ဘက် ရှေ့ဘီးအောက်ထဲ ညပ်နေတာ။ ပွဲချင်းပြီးပါ” လို့ ပြောပါတယ်။
YBS 35 ဟာ ထောက်ကြန့်-မော်တင် ပြေးဆွဲနေတဲ့ ယာဉ်လိုင်းဖြစ်ပြီး ယာဉ်တိုက်မှုကြောင့် YBS 35 ယာဉ်မောင်းကို ထောက်ကြန့်ရဲစခန်းမှာ ခေါ်ယူဖမ်းဆီးထားတယ်လို့ သိရပါတယ်။
အဆိုပါနေရာကို ထောက်ကြန့်မြို့ အရပ်ဘက်အသင်းတွေနဲ့ သက်ဆိုင်ရာအဖွဲ့တွေက လာရောက်ကူညီခဲ့ကြပြီး ဘုန်းကြီးရုပ်အလောင်းကို ဘက်စုံအသင်းက အင်းစိန်ပြည်သူ့ဆေးရုံကို ပို့ဆောင်ပေးခဲ့ပါတယ်။
