စပိန်နိုင်ငံ ပမ်ပလိုနာ (Pamplona) မြို့မှာ တပတ်တာကျင်းပနေတဲ့ ဆန်ဖယ်မင်း (San Fermin) နွားရိုင်းလွှတ်ပြေးပွဲရဲ့ စတုတ္ထမြောက်နေ့အဖြစ် ဇူလိုင် ၁၀ ရက်က ဒဏ်ရာရရှိသူပေါင်း ၁၀ ဦးအထိ ရှိတယ်လို့ အရေးပေါ်ဝန်ဆောင်မှုအဖွဲ့က အတည်ပြုပါတယ်။
အန္တရာယ်များပြီး စိတ်လှုပ်ရှားဖို့ကောင်းတဲ့ ဒီပွဲတော်မှာ ဒဏ်ရာရရှိခဲ့သူတွေထဲက ၆ ဦးကို ဆေးရုံဆီ ပို့ဆောင်ပေးခဲ့ပေမဲ့ တဦးတယောက်မှ နွားရိုင်းဦးချိုနဲ့ မထိုးမိခဲ့ဘူးလို့ သိရပါတယ်။
ဒီပွဲတော်ရဲ့ ပထမနေ့နဲ့ ဒုတိယနေ့တွေမှာ ဒဏ်ရာရရှိသူ ၄ ဦးစီရှိခဲ့ပြီး တတိယနေ့မှာ နောက်ထပ် ၃ ဦးနဲ့ စတုတ္ထနေ့မှာ ၁၀ ဦးအထိ ထိခိုက်မိခဲ့တာကြောင့် လက်ရှိအချိန်အထိ ဒဏ်ရာရရှိသူ စုစုပေါင်း ၂၂ ဦး ရှိနေပြီဖြစ်ပါတယ်။
နှစ်စဉ်နှစ်တိုင်း ကမ္ဘာတဝန်းက ထောင်နဲ့ချီတဲ့ ခရီးသွားတွေဟာ ဒီလို စိတ်လှုပ်ရှားဖွယ်ရာ နွားရိုင်းလွှတ်ပြေးပွဲကို ကြည့်ရှုနိုင်ဖို့အတွက် လာရောက်ကြလေ့ရှိပါတယ်။
၈၇၅ မီတာအထိ ရှည်လျားတဲ့ ဒီပြေးလမ်းပေါ်မှာ နွားရိုင်းတွေကို လွှတ်ပေးရင်း ဒီပွဲတော်မှာ ပါဝင်သူတွေက ၂ မိနစ်ကနေ ၃ မိနစ်ကြာအောင် ပန်းတိုင်အထိ ပြေးလွှားရတာမျိုးပဲ ဖြစ်ပါတယ်။
ဒီပွဲတော်ကို ဇူလိုင် ၇ ရက်ကနေ ၁၄ ရက်အတွင်း နေ့စဉ် မနက် ၈ နာရီတိုင်းမှာ စတင်ကျင်းပသွားမှာ ဖြစ်ပါတယ်။ ဒါ့အပြင် ၂၀၂၃ ခုနှစ်ဟာ အမေရိကန်စာရေးဆရာကြီး အားနက်စ် ဟဲမင်းဝေး (Ernest Hemingway) က ဒီပွဲတော်ကို ပထမဆုံးအကြိမ် လာရောက်ခဲ့တဲ့ နှစ်ပေါင်း ၁၀ဝ ပြည့် အထိမ်းအမှတ်လည်း ဖြစ်ပါတယ်။
၁၉၂၆ ခုနှစ်တုန်းက “The Sun Also Rises” လို့ အမည်ရတဲ့ ဟဲမင်းဝေးရဲ့ ဝတ္ထုစာအုပ်ထဲမှာ ဒီပွဲတော်အကြောင်း ထည့်သွင်းရေးသားခဲ့တာကြောင့် ကမ္ဘာတဝန်းမှာ လူသိများလာခဲ့ပါတယ်။
Source - Reuters
