ရှမ်းပြည်မြောက်ပိုင်း သိန္နီမြို့မှာ သြဂုတ် ၂၅ ရက်က ကိုဗစ်-၁၉ သံသယလူနာ ၇၇ ဦးကို ရောဂါပိုးရှိမရှိ စစ်ဆေးရာက ရဲတပ်ဖွဲ့ဝင် ၁၀ ဦးအပါအဝင် ကူးစက်ခံထားရသူ ၂၉ ဦး စံချိန်တင် ထပ်မံတွေ့ရှိခဲ့တယ်လို့  ဒေသခံတွေဆီက သိရပါတယ်။

ရောဂါကူးစက်ခံရ​တဲ့ အတည်ပြုလူနာနဲ့ သံသယ သေဆုံးသူ များပြားလာတဲ့အတွက် သြဂုတ် ၂၅ ရက်နေ့က မြို့နယ်ပြည်သူ့ဆေးရုံမှာ သံသယလူနာတွေကို ကိုဗစ်ရောဂါ ရှိမရှိ စစ်ဆေးရာက သိန္နီမြို့နယ် ရဲစခန်းက ရဲတပ်ဖွဲ့ဝင် ၁၀ ဦး၊ Oriental Highway Company Limited က ဝန်ထမ်း ၉ ဦး၊ အမှတ် ၁ ရပ်ကွက်က ၂ ဦး၊ အမှတ် ၃ ရပ်ကွက်က ၆ ဦး၊ အမှတ် ၄ ရပ်ကွက်က ၂ ဦး စုစုပေါင်း အတည်ပြုလူနာ ၂၉ ဦးကို ထပ်မံတွေ့ရှိခဲ့တာပါ။

ရဲတပ်ဖွဲ့ဝင် ၁၀ ဦးဟာ ပြီးခဲ့တဲ့ ရက်ပိုင်းက ရောဂါပိုးတွေ့ရှိထားပေမယ့် အများပြည်သူ ကြားသွားလာနေတဲ့ မြို့နယ်ရဲတပ်ဖွဲ့မှူးနဲ့အတူ ရဲစခန်းမှာ တာဝန်ထမ်းဆောင်နေသလို လူစည်းကားရာနေရာတွေမှာ ကျန်းမာရေးအကာအကွယ်မပါဘဲ အရပ်သားပုံစံ အသွင်ယူသွားလာနေသူတွေလို့ မြို့ခံတွေက ပြောပါတယ်။

"အခုထပ်မံပြီးပိုးတွေ့တဲ့ ရဲတွေက လူစည်းကားတဲ့နေရာတွေ လူစုလူဝေးနေရာတွေ အကုန်ရောက်နေတာ။ ကျနော်တို့မြို့​လေးကို ရောဂါပိုးလိုက်ဖြန့်နေတာလား မသိဘူး" လို့ အမှတ် ၂ ရပ်ကွက်မှာ နေထိုင်တဲ့ မြို့ခံတစ်ဦးက ပြောပါတယ်။

ဇွန်လ ၂၁ ရက်နေ့ကနေ စတင်ပြီး ကိုဗစ်-၁၉  အတည်ပြုလူနာ ၁၅၂ ဦး၊ အတည်ပြုသေဆုံးသူ ၁ ဦးနဲ့ သံသယသေဆုံးသူ ၂၆ ဦးရှိပြီလို့ သိန္နိမြို့ခံ လူမှုကူညီရေးလုပ်ဆောင်နေသူတစ်ဦးက ပြောပါတယ်။