ပြင်သစ်နိုင်ငံ၊ အဂျာစီယိုမြို့ရဲ့ ကော်စီကာကျွန်းမှာ ကျင်းပခဲ့တဲ့ AIDA ကမ္ဘာ့ချန်ပီယံရှစ် အလွတ်ရေငုပ်ပြိုင်ပွဲမှာ ရုရှားနိုင်ငံသား အဲလက်စ်ဆီ မိုလ်ချန်နော့ဗ်က ကမ္ဘာ့စံချိန်သစ် တင်နိုင်ခဲ့ပါတယ်။
မကြာသေးတဲ့ တနင်္ဂနွေနေ့မှာ မိုလ်ချန်နော့ဗ်က ရေယက်ပြား ၂ ခုနဲ့အတူ CWTB မြေထဲပင်လယ်ရဲ့ ၁၂၅ မီတာအနက်အထိကို အဆင်း အတက် ပြုလုပ်နိုင်ခဲ့တာ ဖြစ်ပါတယ်။
၂၀၂၃ ခုနှစ်တုန်းက သူကိုယ်တိုင်တင်ထားခဲ့တဲ့ ကမ္ဘာ့စံချိန်ဟောင်းကို ဒီရုရှားနိုင်ငံသားက ၁ မီတာအသာနဲ့ ချိုးဖျက်နိုင်ခဲ့တာပါ။
တရက်တည်းမှာတင် ဆုအမျိုးအစားအားလုံးကို ကြေညာပေးခဲ့ပေမဲ့လည်း ရလဒ် အနှစ်ချုပ်ချိန်မှာတော့ ကမ္ဘာ့စံချိန်ရှင်က ဆွတ်ခူးနိုင်ခဲ့ခြင်း မရှိပါဘူး။
ဒီလိုမျိုး ဆုရရှိသူတွေဟာ ရေငုပ်ပြိုင်ပွဲ အမျိုးအစား ၄ ခုစလုံးမှာ ခံနိုင်ရည်ရှိကြောင်း သက်သေပြရတာမျိုး ဖြစ်ပါတယ်။
အလွတ်ရေငုပ်ပြိုင်ပွဲရဲ့ မတူညီတဲ့ စည်းကမ်း ၄ ခုထဲမှာတော့ ဘာအကူအညီမှမပါဘဲ ကြိုးနဲ့သာ အတက် အဆင်းလုပ်ရတဲ့ FIM၊ ရေယက်ပြားတခုသုံး CWT၊ ကြိုးရော/ရေယက် ပြားပါ မပါဝင်တဲ့ CNF နဲ့ ရေယက်နှစ်ခုပြား ၂ ခုသုံး CWTB တို့ ပါဝင်ပါတယ်။
နောက်ထပ် ရုရှားနိုင်ငံသူဖြစ်တဲ့ မာရီယားနား ဂီလစ်စပီ ကလည်း အမျိုးသမီးရေငုပ်ပြိုင်ပွဲကို ၃ နှစ်ဆက်တိုက် အနိုင်ရရှိခဲ့ပါတယ်။
အဲဒီ ရုရှားနိုင်ငံသူဟာ ကော်စီကာပြိုင်ပွဲရဲ့ အမျိုးအစား ၄ ခုထဲက ၃ ခုဖြစ်တဲ့ FIM, CNF နဲ့ CWTB တို့မှာ ဆုအသီးအသီး ရရှိခဲ့တာပါ။
ခရိုအေးရှားနိုင်ငံသား ပီတာ ကလိုဗာ ကတော့ အမျိုးသားရေငုပ်ပြိုင်ပွဲကို အနှစ်ချုပ် အနိုင်ရခဲ့ပြီး FIM မှာ ရွှေတံဆိပ်နဲ့ CWTB မှာ ကြေးတံဆိပ်ဆု ရရှိခဲ့ကြောင်း သိရပါတယ်။
Source-Reuters
