အများပြည်သူအလုပ်ပိတ်ရက်အဖြစ် ဩဂုတ် ၂၃  ရက်မှ ၃၁ ရက်အထိ တစ်ဆက် တစ်စပ်တည်း ထပ်မံတိုးမြှင့်သတ်မှတ်ကြောင်း အာဏာသိမ်းစစ်ကောင်စီက ဩဂုတ် ၂၀ ရက်မှာ ကြေညာပါတယ်။

ကိုဗစ်-၁၉ ရောဂါကူးစက်ပြန့်ပွားမှုကို  ထိရောက်စွာ ကာကွယ်ထိန်းချုပ်ကုသနိုင်ဖို့အတွက် အများပြည်သူ အလုပ်ပိတ်ရက်ကို နောက်ထပ် သီတင်းတပတ်ကြာ တိုးမြှင့်သတ်လိုက်တာပါ။

ကိုဗစ်-၁၉ ရောဂါကူးစက်မှုကို ဆက်လက်ထိန်းချုပ်ပြီး ပုံမှန်အခြေအနေသို့ အမြန်ပြန်လည်ရောက်ရှိနိုင်ဖို့ ထူးခြားတဲ့ အခြေအနေအရ နိုင်ငံတော် ဗဟိုဘဏ်နဲ့ ပုဂ္ဂိလကဘဏ်တွေမှအပ တစ်ဆက်တစ်စပ်တည်း အများပြည်သူအလုပ်ပိတ်ရက်အဖြစ် တိုးမြှင့်သတ်မှတ်ကြေညာလိုက်တာပါ။

ကိုဗစ်-၁၉ ရောဂါအခြေအနေကြောင့် အခုလို ရုံးပိတ်ရက်တွေကို ထပ်ခါထပ်ခါတိုးမြှင့် ကြေညာနေတာ စုစုပေါင်း ၅ ကြိမ်ရှိသွားပြီဖြစ်ပါတယ်။

အလားတူ  ပုဂ္ဂလိက ကျောင်း၊ ဘုန်းတော်ကြီးသင် ပညာရေးကျောင်းတွေအပါအဝင် အခြေခံပညာစာသင်ကျောင်းတွေအားလုံးကိုလည်း    ဩဂုတ် ၂၃  ရက်မှ ၃၁ ရက်အထိ ယာယီ ဆက်လက် ပိတ်ထားမယ်လို့ စစ်ကောင်စီက ကြေညာထားပါတယ်။

မြန်မာနိုင်ငံမှာ မနေ့ကတရက်တည်း ကိုဗစ်-၁၉ ရောဂါကူးစက်ခံရသူ ၃၀၀၀ ကျော်နဲ့ ထပ်မံသေဆုံးသူ ၁၅၁ ယောက်ရှိပြီး လက်ရှိအချိန်ထိ ကိုဗစ်-၁၉ ကြောင့် သေဆုံးသူစုစုပေါင်း ၁၄,၀၉၆ ယောက်နဲ့ ရောဂါကူးစက်ခံရသူ စုစုပေါင်း ၃၆၈,၇၆၈ ယောက်ရှိပြီလို့ စစ်ကောင်စီ ကျန်းမာရေးဝန်ကြီးဌာနက ဩဂုတ် ၂၀ ရက်ညမှာ ထုတ်ပြန်ပါတယ်။ 

PhotoCredit-BEHS (6) Myaungmya