ထိုင်းနိုင်ငံတောင်ပိုင်း ဆုန်ခလာခရိုင် ဟတ်ယိုင်မြို့နယ်ထဲမှာ မလေးရှားသွားမယ့် မြန်မာတွေ စီးနင်းလိုက်ပါလာတဲ့ ကားတစီး မနေ့က စစ်ဆေးရေးဂိတ်ကို တိမ်းရှောင်ရင်း လမ်းဘေးချိုင့်ထဲ ထိုးကျသွားခဲ့ပါတယ်။ ကားပေါ်ပါလာသူတွေဟာ ထိုင်းနိုင်ငံဝင်ခွင့် အထောက်အထား မရှိတာကြောင့် တရားမ၀င် ၀င်ရောက်မှုနဲ့ ဖမ်းဆီးခံခဲ့ရပါတယ်။ ဟတ်ယိုင်မြို့နယ် ရဲတပ်ဖွဲ့တာဝန်ရှိသူတွေဟာ မမန်နေ့မနက်က ခွန်လန်ရပ်ကွက် မြူနီစီပါယ်ရုံးရှေ့ အာရှလမ်းမကြီးပေါ်မှာ ရှောင်တခင်စစ်ဆေးရေးဂိတ်ဖွင့်ပြီး စောင့်ကြပ်စဉ်  မသင်္ကာဖွယ် အီဇူးစူးဟိုင်းလပ်ကားတစီးမောင်းလာကြောင်း၊ အဆိုပါကားဟာ ရဲတွေကို တွေ့တာနဲ့ ချက်ချင်းနောက်ပြန်ကွေ့သွားပြီး တနေရာအရောက်မှာတော့ အရှိန်နဲ့ လမ်းဘေးချိုင့်ထဲ ထိုးကျသွားတယ်လို့ ဟတ်ယိုင်ရဲစခန်းတာဝန်ရှိသူက သတင်းထောက်တွေကို ပြောပါတယ်။ ကားကိုစစ်ဆေးရာ ယာဉ်မောင်းမှာ အသက် ၄၀ နှစ်ရွယ် နိုင်းစူရတ်ဆိုသူ ထိုင်းတဦးဖြစ်ပြီး ကားထဲမှာ ပြွတ်သိပ်ပြီး ထည့်လာတဲ့ မြန်မာနိုင်ငံသား အမျိုးသား ၁၄ ဦး နဲ့ အမျိုးသမီး  ၁ ဦး တို့ကို တွေ့ရတာလို့ ဆိုပါတယ်။ သူတို့တွေဟာ ကားရှေ့ခန်းမှာ ၆ ဦး၊ ကားနောက်ခန်း အုပ်မိုးထားတဲ့ မိုးကာအောက်မှာ အထုတ်အပိုးတွေနဲ့အတူ ၈ ဦး လဲလျောင်းလျက်အနေအထားနဲ့ ကြပ်ညှပ်လိုက်ပါလာကြတာလို့ ဆိုပါတယ်။ ကားသမားကို စစ်ဆေးချက်အရ သူတို့တွေအားလုံး တရားမ၀င် ၀င်ရောက်လာတဲ့ မြန်မာ တွေဖြစ်ပြီး မလေးရှားနိုင်ငံကို အလုပ်သွားလုပ်ဖို့ဖြစ်ကြောင်း၊ သူ့တာဝန်ကတော့ သူတို့တွေကို ဖတ်ထလုန်းမြို့နယ်ကနေ ဟတ်ယိုင်ထိပို့ပေးဖို့ တဦးကို ဘတ် ၃ ထောင်နှုန်းနဲ့ သယ်ဆောင်ခဲ့တာလို့ ပြောပါတယ်။ တာဝန်ရှိသူတွေက ယာဉ်မောင်းကို ထိုင်းနိုင်ငံထဲ တရားမ၀င်သူများအား ခေါ်ဆောင်လာမှု၊ သူတို့ အဖမ်းမခံရရေး သိုဝှက်အားပေးကူညီမှုတွေနဲ့ အရေးယူသွားမှာဖြစ်ပြီး မြန်မာ ၁၅ ဦးဟာ လည်း နိုင်ငံထဲ တရားမ၀င်ဝင်ရောက်မှု၊ နေထိုင်ခွင့်အထောက်အထား သက်တမ်းကုန်ဆုံးမှု တွေနဲ့ အရေးယူသွားမယ်လို့ ဟတ်ယိုင်ရဲတပ်ဖွဲ့က ပြောသွားပါတယ်။ ကိုးကား - မန်နေဂျာအွန်လိုင်း